U Jeŭrapiejskim humanitarnym univiersitecie (EHU) zaćvierdžanyja novyja ŭmovy akazańnia finansavaj dapamohi studentam ź Biełarusi.
Z nastupnaha navučalnaha hoda (2016/2017) košt apłaty navučańnia budzie pryviazany nie da pamieru hrupy, a da ahulnaŭniviersiteckaha rejtynhu abituryjenta na momant pastupleńnia.
Na bakałaŭrskich prahramach vočnaj formy navučańnia źjaviacca biaspłatnyja miescy dla abituryjentaŭ ź Biełarusi z rejtynham 9,41 bała i vyšej. Jak rastłumačyli BiełaPAN u pres-słužbie EHU, kolkaść biaspłatnych miescaŭ nie budzie pryviazanaja da peŭnaj kolkaści studentaŭ-biełarusaŭ u toj ci inšaj hrupie, jak heta było raniej. «Zamiest hetaha finansavaja padtrymka budzie naŭprost zaležać ad rejtynhu abituryjenta pry pastupleńni va ŭniviersitet i na praciahu jaho/iaje vučoby. Heta značyć, što my dapuskajem mahčymaść taho, što cełaja hrupa studentaŭ-biełarusaŭ budzie vučycca biaspłatna, kali, skažam, pry pastupleńni na prahramu «Suśvietnaja palityka i ekanomika» ich rejtynh budzie składać 9,41 i vyšej», — adznačyli ŭ pres-słužbie.
Akramia taho, biaspłatnyja miescy dla navučańnia na vočnaj formie ŭvodziacca taksama pa prahramach «Vizualny dyzajn i miedyja» i «Mižnarodnaje prava i prava Jeŭrapiejskaha sajuza», dzie ich raniej nie było.
Maksimalny hadavy košt navučańnia dla biełarusaŭ z nastupnaha hoda składzie 2.000 jeŭra zamiest raniejšych 2.500 jeŭra i budzie ŭžyvacca da abituryjentaŭ z rejtynham ad 8,60 bała i nižej.
Pry pastupleńni na kirunak «Miedyja i kamunikacyja» na biaspłatnaje navučańnie mohuć raźličvać abituryjenty z rejtynham 9,81 i vyšej, a maksimalny košt navučańnia zapłaciać abituryjenty z rejtynham 9,0 i nižej. Košt navučańnia dla abituryjentaŭ z rejtynham ad 9,01 da 9,40 składzie 800 jeŭra ŭ hod, ad 8,61 da 9,0 — 1.400 jeŭra, dla hramadzian inšych krain — 2.500 jeŭra.
Rektar EHU prafiesar Devid Polik ličyć, što novy padychod u akazańni studentam ź Biełarusi finansavaj dapamohi «dapamoža pryciahnuć jašče bolš šyrokaje koła abituryjentaŭ, zabiaśpiečyć prazrystaść pry raźmierkavańni hrantaŭ pamiž studentami i ŭmacuje palityku finansavaj padtrymki studentaŭ univiersitetam», adznačyli ŭ pres-słužbie.
Rejtynh abituryjentaŭ vočnaha bakałaŭryjatu ŭ EHU raźličvajecca na asnovie siaredniaha aryfmietyčnaha ad siaredniaha bała atestata pa humanitarnych pradmietach, adznaki pa ekzamienie pa zamiežnaj movie, adznaki pa ekzamienie pa ese ci kampazicyi i adznaka pa profilnym pradmiecie. Pry pastupleńni na prahramu «Miedyja i kamunikacyja» abituryjenty taksama padajuć partfolia, jakoje aceńvajecca dadatkovymi bałami ad 0,1 da 1,0.
Na asnovie rejtynhu pry pastupleńni abituryjentu ŭstanaŭlivajecca taryf na navučańnie, jaki sapraŭdny na praciahu pieršaha siemiestra. Pa vynikach siesii finansavaja padtrymka pieraraźmiarkoŭvajecca ŭ zaležnaści ad akademičnych dasiahnieńniaŭ studentaŭ, dalej rejtynh pieraličvajecca pa vynikach kožnaha hoda navučańnia.
U 2015/16 navučalnym hodzie siaredni pamier finansavaj dapamohi, jaki akazvajecca kožnamu biełaruskamu studentu EHU, składaje 658 jeŭra. Finansavuju padtrymku akazvajuć Jeŭrapiejskaja kamisija, Saviet ministraŭ Paŭnočnych krain, a taksama ŭrady krain Zachodniaj Jeŭropy i ZŠA. Studenty taksama mohuć pretendavać na imiannyja i inšyja stypiendyi, jakija vydajucca za vysokuju akademičnuju paśpiachovaść, aktyŭnuju navukovuju i tvorčuju dziejnaść.
U miežach pryjomnaj kampanii 2016 hoda EHU budzie ažyćciaŭlać pryjom abituryjentaŭ na piać bakałaŭrskich, šeść mahistarskich i adnu doktarskuju prahramu.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary