U Biełastoku vyklikali «na pajadynak» i źbili da straty prytomnaści 16-hadovaha biełarusa
U centry Biełastoka da straty prytomnaści źbili 16-hadovaha padletka ź Biełarusi. Napadnikaŭ było troje, dvoje ź ich taksama niepaŭnaletnija. Baćka chłopčyka Alaksiej (imiony biełarusaŭ u tekście źmienienyja) padaŭ zajavu ŭ palicyju i raskazaŭ pra zdareńnie vydańniu Most.
Incydent adbyŭsia ŭ paniadziełak, 25 listapada, kala 16.00. 16-hadovy Vadzim sustreŭsia ź siabrami kala biełastockaha handlovaha centra Galeria Jurowiecka. Jany taksama ź Biełarusi.
«Choładna ž na vulicy ciapier, jon, byvaje, zachodzić tudy na paŭhadzinki pahrecca. Ja jamu ŭžo patelefanavaŭ, što treba nam sustrecca i pajści ŭ «Biedronku», a potym razam dadomu», — raskazvaje Alaksiej.
Pa słovach mužčyny, paśla taho, jak syn skončyŭ hetuju razmovu, da jaho padyšoŭ znajomy, jakoha zavuć Isa, i prapanavaŭ jamu «vyjści pabarocca». Raniej Vadzim moh udzielničać u siabroŭskich pajadynkach, ale, nakolki viadoma, u abstalavanaj zale.
«Kaliści moj syn kazaŭ, što jon zajmaŭsia baraćboj. Ale jon zajmaŭsia hetym paŭhoda maksimum. Čačeniec (nacyjanalnaść napadnika nie paćvierdžanaja. — Zaŭv. Most) — jaho matyvy nieviadomyja — zachacieŭ pasprabavać. Jon zajmajecca adzinaborstvami i šukaje sabie supiernikaŭ. Ale roźnica ž vialikaja — 16-hadovy chłopiec suprać mužčyny», — kaža biełarus.
Pavodle jaho słoŭ, Isa maje kala 22 hadoŭ.
Nie padaŭ ruku
Vadzim pahadziŭsia na prapanovu. Jon vyjšaŭ z handlovaha centra da Isy. Kala bakavoha vychadu toj byŭ nie adzin, a z dvuma polskimi znajomymi, adnakłaśnikami Vadzima.
«Syn kazaŭ, što padyšoŭ, padaŭ ruku Isu, a toj u adkaz nie padaŭ. Nu, syn razhubiŭsia. Sieŭ na prystupki, maŭlaŭ, što budziem rabić? I jany ŭtroch nalacieli na jaho — Vadzim staŭ prykryvacca».
Vadzimu ŭdałosia vyrvacca — chłopiec pabieh nazad da handlovaha centra, bližej da ludziej.
«Isa pabieh za im. Syn spytaŭ: «Čamu Vy mianie bjacie «v krysu» (ciškom, niesumlenna. — Zaŭv. Most)?» — dadaje Alaksiej.
Apošniaje, što pamiataje Vadzim, — jak Isa ŭdaryŭ jaho ŭ skroń. Vierahodna, chłopiec na niekatory čas straciŭ prytomnaść. Paźniej, ačomaŭšysia, ubačyŭ, što jaho akružyli minaki, a z handlovaha centra vybiehli siabry.
Pa słovach biełarusa, tvar syna byŭ padrapany, a z rota sačyłasia kroŭ. Vadzim nie adrazu zaryjentavaŭsia, dzie znachodzicca.
Nie pieršy raz pravakavaŭ kanflikty?
Siabry Vadzima zmahli razbłakavać jaho telefon i patelefanavali baćku. Alaksiej prybieh na miesca incydentu praz 15 chvilin.
«Užo stajała palicyja, jana ŭsich apytvała. Nie viedaju, praŭda ci nie, ale pa čutkach jon [napadnik] užo nie pieršy raz stvaraje takija kanfliktnyja situacyi», — adznačaje Alaksiej.
Mužčyna nie viedaje, na hlebie čaho ŭspychnuŭ kanflikt. Jon taksama adznačaje, što z adnakłaśnikami, jakija źbivali syna, raniej prablem nie ŭźnikała. Padletak taksama nie moža adkazać na pytańnie, čamu jaho źbili.
Siamja padała zajavu ŭ palicyju. Pa słovach Alaksieja, u palicejskich taksama vyklikała ździŭleńnie, što pryčyna bojki niajasnaja, — jany vykazali zdahadku, što heta mahło adbycca z-za dziaŭčyny ci hrošaj. Ale Alaksiej nastojvaje: syn nie razumieje, čamu tak adbyłosia.
«Zdajecca, jany siabravali [z adnakłaśnikami] i ź Isoj narmalna razmaŭlali. Navat było takoje, što jany sustrakalisia — nu, chłopcy maładyja, dzieści tam na matach — chto lepš bjecca. Ale heta było pa-siabroŭsku».
«Admazki», što abražaŭ maci
Chutkaja dastaviła baćku i syna ŭ balnicu. Vadzimu zrabili tamahrafiju. Pavodle zaklučeńnia chirurha, strasieńnia mozhu ŭ chłopca niama, a atrymanyja traŭmy — źniešnija: udary naniesienyja ŭ hałavu i nos. U epikryzie zafiksavanaja karotkačasovaja strata prytomnaści.
Dadomu siamja viarnułasia tolki ŭviečary. Tady ž na telefon Vadzima stali prychodzić paviedamleńni ad Isy — u ich jon nibyta prasiŭ nie padavać zajavu ŭ palicyju i «prydumlaŭ admazki», što Vadzim pry pabočnych asobach abražaŭ jaho maci.
U palicyi Vadzima apytali ź pierakładčykam i paviedamili, što vyvučać zapisy kamier nazirańnia i vykličuć śviedak. Telefon Vadzima kanfiskavali dla pravierki. Biełarusy taksama płanujuć pajści ŭ škołu, kab padniać pytańnie pra pavodziny adnakłaśnikaŭ syna.
Most 25 listapada adpraviŭ Isu paviedamleńnie ŭ miesiendžar z prośbaj ahučyć jaho viersiju padziej. Ale toj praihnaravaŭ paviedamleńnie. Taksama małady čałaviek nie adkazvaŭ na zvanki, a paśla zabłakavaŭ ich.
Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ1
Kamientary