Siastry Michaiła Žyźnieŭskaha nie praciahvajuć kantrakt na Homielskim miasakambinacie
Z hamialčankaj Natallaj Žyźnieŭskaj, siastroj zahinułaha na kijeŭskim Majdanie ŭ studzienia 2014 hoda Michaiła Žyźnieŭskaha, nie praciahvajuć kantrakt na Homielskim miasakambinacie.
Jak paviedamiła Žyźnieŭskaja, u adździele kadraŭ pradpryjemstva jaje prainfarmavali pra heta, nie tłumačačy pryčyn zvalnieńnia. Pavodle słoŭ Natalli, jana prapracavała na miasakambinacie bolš za piać hadoŭ, na apošniaj pasadzie — rabočaj u kaŭbasnym cechu — jana pracavała amal dva hady. Kantakt zakančvajecca 12 červienia. Pavodle słoŭ Žyźnieŭskaj, da jaje nikoli nie było pretenzij i zaŭvah pa pracy.
«U cechu ŭsie viedali, što moj brat zahinuŭ na Majdanie, kazali mnie ŭ tvar, što ja siastra bandyta. A asabliva im stała zajzdrosna, kali pračytali ŭ internecie, što baćki buduć atrymlivać pažyćciovuju stypiendyju za śmierć Mišy. Mnie nie davali prachodu, asabliva kiraŭnictva, dakarali i za Mišu, i za stypiendyju baćkam. Zaraz pakidajuć mianie biez srodkaŭ da isnavańnia», — adznačyła Žyźnieŭskaja.
Načalnik adździeła kadraŭ miasakambinata Alena Blińnikava zapeŭniła BiełaPAN, što ŭ rašeńni ab niepraciahu kantrakta Žyźnieŭskaj «niama nijakaj palityki», a źviazanaje jano z pretenzijami kiraŭnictva kaŭbasnaha cecha da jakaści pracy hetaj rabotnicy.
«Pierš čym nie praciahnuć kantrakt, najmalnik pytajecca ŭ niepasrednaha kiraŭnika, a ŭ načalnika cecha jość zaŭvahi da jaje pa pracy. Da taho ž najmalnik nie abaviazany tłumačyć, čamu nie praciahvaje kantrakt. U nas paŭtary tysiačy čałaviek, i z kantraktami praca idzie štodnia, niekamu praciahvajuć, niekamu nie — zvyčajny praces. Ja navat sumniavajusia, što dyrektar viedaje jaje ŭ tvar, — absalutna nijakaha praduziataha staŭleńnia niama. A pra jaje brata ja naohuł pieršy raz čuju. Z nahody hibieli jaje brata, mahčyma, i była čutka na pradpryjemstvie, ale nidzie heta nie afišavałasia. Kali navat spytać u cechu, dzie jana pracuje, moža, nichto i nie viedaje, što ŭ jaje tam brat zahinuŭ. Heta nie palityka sto pracentaŭ. Heta prosta rabočy čałaviek, jaki pavinien pryjści a vośmaj hadzinie i nie adciahvajučysia rabić svaju pracu», — rastłumačyła Blińnikava.
Žyźnieŭskaja paśla kansultacyi ź jurystami maje namier asprečyć svajo zvalnieńnie.
Člen ŭkrainskaj arhanizacyi UNA-UNSA hamialčanin Michaił Žyźnieŭski byŭ zabity 22 studzienia 2014 hoda na vulicy Hrušeŭskaha ŭ Kijevie strełam u serca. Jon staŭ adnoj ź pieršych achviar supraćstajańnia ź siłavikami. 18 listapada 2015 hoda pradstaŭnik Hienieralnaj prakuratury Ukrainy paviedamiŭ, što Žyźnieŭskaha paraziła kula, jakuju vykarystoŭvajuć u MUS dla prypynieńnia transpartnych srodkaŭ.
26 listapada 2014 hoda ŭ Kijevie adkryli pomnik zahinułamu. Baćkam byŭ uručany orden Hierojaŭ Niabiesnaj sotni.
Kamientary