«I nas na try litary ŭ sudzie jany pasyłali!» Maci zabitaj nastaŭnicy z Čerykava radaja rasstrelnamu prysudu
10 studzienia ŭ Biełarusi vynieśli čarhovy śmiarotny prysud: za žorstkaje zabojstva nastaŭnicy Natalli Kastrycy ŭ Čerykavie rasstralajuć dvaich bratoŭ, 19-hadovaha Stanisłava Kościeva i jaho 20-hadovaha brata Illu.
«Naša Niva» apublikavała padrabiaznaści historyi: apovied maci bratoŭ Kościevych, a taksama ich siastry Hanny. Mienavita pretenzii Natalli Kastrycy da Hanny ŭskosna i stali pryčynaj zabojstva.
Paśla publikacyi artykuła z Redakcyjaj źviazałasia 72-hadovaja Viera Piatroŭna, mama zahinułaj nastaŭnicy. Jaje aburyli słovy siamji Kościevych. Žančyna śćviardžaje: złačyncy nie raskajvalisia i ŭ realnaści nie prasili prabačeńnia.
«Maja dačka-niabožčyca była adkaznym čałaviekam, jaki nie moh prajści mima niejkaj prablemy.
Ciapier taja Hanna raskazvaje, što nibyta Natalla ŭvieś čas da jaje čaplałasia. Ale jana nie čaplałasia, jana bačyła, što hetaja «maci» kidaje dziaciej! U 2017 hodzie maja dačka nie prosta tak źviarnułasia da sacyjalnych słužbaŭ — jana faktyčna vyratavała adnaho ź dziaciej, kali ŭbačyła, što toje łazić pa dachu vuličnaj prybiralni, łazić adno, nichto za im nie hladzić. Ale ž pra heta Kościevy vam nie raskažuć!
Siastra Kościevych kaža, nibyta jaje braty vybačalisia ŭvieś čas. Heta niapraŭda! Tak, jany paprasili prabačeńnia padčas apošniaha słova. Ale da hetaha jany zusim nie vybačalisia, nie!
Jany chiba tolki nie tancavali ŭ toj kletcy, pavodzili siabie jak hieroi! I nas, žančyn u zale, jany vusnami biazhučna pasyłali na try litary! Ja sama heta bačyła!
Kali ty ŭžo ździejśniŭ złačynstva — to pryznaj, to prasi prabačeńnia, malisia, kab ciabie pamiłavali. Ale ž nie — jany maŭčali i prosta admaŭlalisia ad pakazańniaŭ. I ich siastra taksama! — aburajecca Viera Piatroŭna. —
Vy viedali, što ŭ Natalli Kościevaj było piaciora dziaciej, a nie čaćviora? Ale adno zahinuła — jašče małymi dvoje dziaciej nahłytalisia tabletak, paśla daktary ich ratavali. Adnaho chłopca nie adkačali, jon pamior. Druhoha vyratavali — heta byŭ toj samy Illa Kościeŭ, budučy zabojca majoj dački.
Za apošnija paŭtara-dva hady da zabojstva ŭ hetaha Illi było 30 pravaparušeńniaŭ! 30! Pra heta Kościevy taksama maŭčać. Plus prablemy sa śpirtnym tam amal va ŭsich.
I Illu čakała lačeńnie ad ałkahalizmu, i siońniašni sužyciel jaho siastry na prymusovym lačeńni ad ałkahalizmu!»
Žančyna taksama ŭzhadvaje detali historyi, jakija pačuła na sudzie.
«Maja dačka adamknuła dźviery, i adzin brat jaje adrazu źbiŭ z noh, a druhi pačaŭ taptać. Jana vyrvałasia, ale jany dahnali jaje na vulicy, zaciahnuli ŭ chatu i praciahnuli bić tam.
Paśla Illa zahadaŭ bratu prynieści nož — jon vyrašyŭ jaje rezać, bo dačka ŭdaryła jaho prasam! U majoj dački na rukach — 82 udary nažom! Na joj žyvoha miesca niama!
Hetyja braty nie tolki zabili maju dačku — jany źnieśli ź jaje chaty ŭsie pradukty. Usio zabrali: miasa, cukar, jahady, kavu, jajki, navat vocat! Vocat!
Śledčy spytaŭ u ich: vy ŭ palčatkach usio rabili? Nie, adkazvajuć, paśla rukavom prosta vycirali adbitki, — raskazvaje Viera Piatroŭna. — Paśla jany pakłali maju zabituju dačku na kanapu, padpalili dom, uklučyli haz i prosta myli ruki na vulicy pad kałonkaj. A zatym viarnulisia ŭ svoj dom, vypili kavy i spakojna pajšli spać».
Ranicaj, kaža Viera Piatroŭna, chłopcaŭ zabrali ŭ milicyju, ale paśla adpuścili. Pa słovach žančyny, druhi raz u milicyju pazvaniła siastra chłopcaŭ, taja samaja Hanna, kali znajšła ŭ chlavie niezrazumieły pakiet z praduktami. Jak vyśvietliłasia paźniej, heta byli pradukty z doma zabitaj Natalli Kastrycy.
Ciapier užo Natallu, dačku žančyny, nie viarnuć. Chutka zabjuć i złačyncaŭ, Illu i Stanisłava Kościevych. Ale ž Viera Piatroŭna praciahvaje pieražyvać hetuju historyju znoŭ i znoŭ.
Śmiarotnym prysudam, jaki atrymali braty Kościevy, mama zabitaj nastaŭnicy zadavolenaja: «Jany zabili maju dačku ni za što. Ni za što. Sud razabraŭsia, dziakuj jamu».
Stała viadoma pra zatrymańnie 77-hadovaha Vasila Hustyra, adnaho z najlepšych ahraryjaŭ Biełarusi7
Kamientary