Chto taki Illa Biahun, jaki na dziaržaŭnym TB vylivaje brud na fondy salidarnaści i štab Cichanoŭskaj?

Illu 29 hadoŭ. Va ŭsich sacyjalnych sietkach jahonym rodnym horadam paznačana Maskva, ale chłopiec pry hetym źjaŭlajecca hramadzianinam Biełarusi. Vučyŭsia ŭ himnazii №7 Minska na vulicy Zacharava. Pa skančeńni škoły hod pavučyŭsia ŭ Łondanie, paśla hetaha praciahnuŭ adukacyju ŭ BDUIR, adnak zakančvaŭ u 2016 Maskoŭski technałahičny instytut. Kali žyŭ u Maskvie, papracavaŭ u banku «Cińkof», a apošnija paŭtara hoda da vybaraŭ byŭ supracoŭnikam EPAM.

U cełym mała čym admietny prahramist, jakich u Minsku tysiačy. Adnak letam 2020 Biahun pierapyniaje svaju karjeru ŭ hetym kirunku i sychodzić u pieradvybarčy štab Valeryja Capkały. Kažuć, što pry štabie źjaŭlaŭsia redka, u asnoŭnym pracu vioŭ addalena. U kamandu jaho pryvioŭ Andrej Łankin, jaki taksama vyjšaŭ ź IT-asiarodździa.

«Capkała jaho navat nie viedaŭ, nakolki mahu mierkavać, — kaža adzin ź siabraŭ štaba Capkały. — Čym jon zajmaŭsia, dakładna skazać niemahčyma, chiba što Łankin viedaŭ. U nas jość čat siabraŭ inicyjatyŭnaj hrupy, dyk jon niadaŭna kazaŭ, što zajmaŭsia padačaj skarhi ŭ Viarchoŭny sud ab nierehistracyi našaha kandydata, ale heta nie tak. Chiba što zajmaŭsia skarhami ad ludziej na bolš nizavym uzroŭni, zdajecca, pa Leninskim rajonie Minska».

Tym nie mienš, Biahun paličyŭ, što ŭ Biełarusi jamu moža pahražać niebiaśpieka, tamu amal adrazu paśla prezidenckich vybaraŭ źjechaŭ u Litvu. Mahčyma, matyvam dla takoha kroku było kachańnie, mahčyma, inšyja pryčyny, ale fakt zastajecca faktam.

U Litvie Biahun spačatku sprabavaŭ dapamahać u Fondzie salidarnaści, — na toj momant jon jašče nie nazyvaŭsia navat BYSOL, — a mienavita akazvać padtrymku tym stačkamam na pradpryjemstvach, jakija syšli ŭ zabastoŭku.

«Na toj momant nie było jašče nijakaj struktury, čałaviek z kamandy Capkały, dobra, niachaj pasprabuje dapamahčy, — raskazvaje kiraŭnik BYSOL Andrej Stryžak. — Pracavaŭ kropkava, pa strajkavych aktyŭnaściach». Adnoj z prablem tych zabastovak było toje, što jany nie byli strukturavanyja, i kali navat strajkoŭcam chacieli pieravieści dapamohu, to nie było jasna, praz kaho heta rabić. Zrešty, u Fondzie salidarnaści kažuć, što i tady heta nie pieraškodziła pieravieści peŭnym stačkamam niemałyja hrošy. Ale stałaj supracy ź Biehunom nie atrymałasia.

«Ja jaho bačyŭ, moža, raz ci dva ŭ budynku, dzie raźmiaščajecca naš ofis, — kaža Stryžak. — Pieršy raz hety čałaviek vyklikaŭ u mianie sumnievy jašče ŭ žniŭni, kali paśla stasavańnia ź im u adnaho z stačkamaŭcaŭ pačalisia prablemy, ale tady pra heta niejak zabylisia, bo było vielmi šmat spraŭ. Potym ža pačalisia historyi z apublikavańniem pracoŭnaj pierapiski.

Chaču adznačyć, što Biahun jaŭna nie zastaŭsia abdzielenym, jamu było vypłačana padtrymki ci 1500 jeŭra, ci 3000 jeŭra, dakładna nie pamiataju. Usio, što jon moh, jon uchapiŭ», — kaža Stryžak.

Ciapier ža Biahun raskazvaje ŭ pieradačy kiraŭnika ANT Marata Markava pra ciomnyja schiemy, jakija nibyta vykarystoŭvaje BYSOL. Sam Markaŭ, vyhladaje, prosta źziaje ad takoha surazmoŭcy i takich adkazaŭ.

«Toje, što dziaržaŭnaja prapahanda sprabuje zrabić ź mianie hałoŭnaha voraha — heta mianie navat ciešyć krychu, — uśmichajecca Andrej Stryžak. — Heta značyć, što jany nie viedajuć jak usio pabudavana. Sistema ž pracavała i praciahvaje pracavać, aktyŭnyja adnosiny z dvarovymi inicyjatyvami, pierabudova dapamohi zvolnienym i hetak dalej. A što tyčycca Biehuna, to pracuje cełaja sietka ludziej na dyskredytacyju aktyŭnaściaŭ. Dumaju, praz paru tydniaŭ buduć ahučanyja i inšyja proźviščy».

Nie saromiejecca Biahun raskazvać i pra pracu štaba Śviatłany Cichanoŭskaj. Ź vidam znaŭcy jon raskazvaje, chto tam kim lalkavodzić, a kaho tam źlivajuć. Daradca Cichanoŭskaj Franak Viačorka skazaŭ «Našaj Nivie», što pra isnavańnie Biehuna jon daviedaŭsia tolki paru dzion tamu z efiru na ANT. «Mahu dakładna skazać, što jon nikoli nie byŭ u štabie Cichanoŭskaj. Heta vyhladaje jak niejkaja śpiecapieracyja zvonku, metanakiravanaja pravakacyja», — dzielicca Franak.

Jašče adzin čałaviek sa štaba Cichanoŭskaj paćvierdziŭ «Našaj Nivie», što ŭ štabie Biehuna nie było nikoli. «Paru razoŭ bačyli jaho ŭ adnym budynku. My znachodzimsia na piatym paviersie, a fond «Kraina dla žyćcia», jakim kiruje Maryja Maroz, na dziasiatym, voś tam jon byvaŭ». Sprava ŭ tym, što ŭ «Krainie dla žyćcia» pracavała Kaciaryna Kanaplova, jakuju źviazvajuć ź Biehunom ramantyčnyja adnosiny.

Čytajcie pra heta taksama: 
«Byŭ strach, što padarviomsia ŭ mašynie razam sa Śviatłanaj». Znajomimsia z Maryjaj Maroz, jakaja žyvie ź Cichanoŭskaj u Vilni i kiruje novym fondam

Pavialičyć

Raniej Kanaplova była aktyvistkaj štaba Viktara Babaryki, adkazvała za łahistyku — kaho z žurnalistaŭ uziać u pajezdku pa krainie, dzie raśsialić ludziej. Potym jana taksama apynułasia ŭ Vilni. «Na padstavie čaho jon moža niešta kazać? Isnavaŭ čat «Krainy dla žyćcia», dzie była i Kanaplova, tudy kidalisia naviny. Jaho viała Luboŭ Šybaršyna ź Minska, dyk jana mahła časam pakrytykavać, što Franak nie toje skazaŭ, nie toje napisaŭ. Moža, niešta ŭ kuryłcy na dziasiatym paviersie moh pačuć taksama».

Jašče adna krynica infarmacyi dla Biehuna — heta byłaja sakratarka Andreja Stryžaka Śviatłana Hałuza. Jana blizkaja siabroŭka Biehuna i Kanaplovaj. Majučy dostup da pryvatnaj pierapiski Stryžaka, Hałuza narabiła šmat skrynšotaŭ, i ciapier jany pacichu źjaŭlajucca ŭ publičnym dostupie. Ničoha aburalnaha ŭ toj pierapiscy niama, ale navat ź jaje dziaržprapahanda sprabuje niešta vysmaktać, choć atrymlivajecca nie duža pierakanaŭča.

Naprykład, kolki šumu na roznych BT i ANT zrabiŭ skryn, dzie Stryžak, Matolka i Pratasievič abmiarkoŭvajuć toje, jak pałamać nohi Biehunu, a ŭ inšym čacie ŭvohule abmiarkoŭvajecca zabojstva «apalnaha» prahramista. Naturalna, nijakich zamachaŭ na jaho nie było i być nie mahło — ale dadzieny zahad zrabić «siensacyju».

U pačatku studzienia Biahun viarnuŭsia ŭ Biełaruś. Sam jon skazaŭ, što zrabiŭ heta z asabistych pryčyn, treba było rašyć peŭnyja pytańni. Nakolki viadoma «NN», heta pytańnie apieki dziciaci, jakoje jany nijak nie mohuć vyrašyć z byłoj žonkaj.

Praź niejki čas paśla viartańnia Biahun prapaŭ, šukali ŭsim śvietam, ale nidzie nie znachodzili. Ale mienš čym praz sutki chłopiec adšukaŭsia i zajaviŭ, što ničoha ź im nie adbyvałasia. U intervju dev.by sam Biahun zaznačaŭ, što intaresu z boku siłavych orhanaŭ da jaho nie było, maŭlaŭ, u ich chapaje bolš važnych spraŭ. U chutkim časam chłopiec źjaviŭsia na ANT i na Kruhłym stale Juryja Vaskrasienskaha.

«NN» stała viadoma, što na radzimu prahramist usio ž viartacca pabojvaŭsia, i navat padkłaŭ peŭnuju padušku biaśpieki. Jon paprasiŭ u Juryja Vaskrasienskaha harantyj, što ŭ Biełarusi jaho nichto nie aryštuje. Vaskrasienski kaža, što rašyŭ hetaje pytańnie, paśla čaho viartańnie stała mahčymym. Darečy, Vaskrasienski havoryć, što hatovy dapamahčy ŭ pytańni biaśpiečnaha viartańnia na radzimu i inšym uciekačam, prosić źviartacca da jaho.

«Da nas Biahun dałučyŭsia, bo heta intelihientny, razumny, adukavany čałaviek, jaki razumieje, što niama inšaha varyjantu, aproč dyjałohu. Nakolki ja razumieju, intervju Markava — heta była jahonaja ŭłasnaja inicyjatyva. Pa-pieršaje, jon chacieŭ danieści miesiedž, što možna viartacca ŭ Biełaruś, a, pa-druhoje, jon aburany ŭsimi tymi machlarstvami, ź jakim sutyknuŭsia ŭ Vilni. U Biehuna vialikija palityčnyja ambicyi, jakija jon budzie realizoŭvać ciapier u našaj «piasočnicy», — kaža Juryj Vaskrasienski.

Ciapier Biahun sumiesna z Andrejem Łankinym pracuje nad stvareńniem płatformy «Dyjałoh», dzie buduć abjadnanyja kraŭdfandynh, pietycyi i hałasavanki. «Sprava ŭ tym, što našu pietycyju na petitions.by ab palityčnaj amnistyi trojčy vydalali z sajta biez tłumačeńnia pryčyn, tamu saśpieła patreba ŭ svajoj placoŭcy», — havoryć Vaskrasienski.

Mabyć, imia Illi Biehuna na bližejšy čas stała prapišacca ŭ dziaržaŭnych ŚMI. U situacyi adsutnaści kampramata na inšy bok sydzie luby «ekśpiert» u hetym pytańni, navat kali ničoha značnaha i skandalnaha nie viedaje i nie moža viedać.

• 2
• 2
• 0
• 0
• 0
• 1