«Pa nieaficyjnaj infarmacyi, jon u SIZA KDB». U Minsku źnik vieteran «Ałmaza», śpiecyjalist pa vybuchoŭkach
49-hadovy Viačasłaŭ Sidarakin źnik u pačatku lutaha. Dzie jon, dakładna nieviadoma — dačka miarkuje, što mužčynu zatrymali biełaruskija śpiecsłužby. U pačatku 2000-ch Sidarakin słužyŭ u śpiecyjalnym padraździaleńni pa baraćbie z teraryzmam «Ałmaz». Sidarakin dasłužyŭsia da padpałkoŭnika, byŭ načalnikam słužby piratechničnaha zabieśpiačeńnia i prymianieńnia śpiecyjalnych srodkaŭ. U 2003 hodzie Łukašenka ŭznaharodziŭ jaho ordenam «Za słužbu Radzimie» III stupieni.
Apošnim časam Viačasłaŭ Sidarakin pracavaŭ u Rasii, dzie zajmaŭsia demantažom zbudavańniaŭ — praca taksama była źviazanaja z vybuchovymi rečyvami.
Pra źniknieńnie Sidarakina «Našaj Nivie» raspaviała jaho starejšaja dačka Hanna.
«Baćka žyŭ pamiž Minskam i Maskvoj. Zimoj jon byŭ u Biełarusi — i 9 lutaha jon prosta źnik. Baćka źbiraŭsia ŭviečary sustrecca sa znajomaj, ale nie pryjšoŭ na sustreču, — raskazvaje Hanna. — Pieršy tydzień my zusim ničoha nie viedali, šukali jaho. Ja bajałasia, što jaho ŭvohule zabili.
Ale paśla ŭ nas źjaviłasia infarmacyja, što baćka zatrymany i znachodzicca ŭ SIZA KDB. Aficyjnaha paćviardžeńnia hetamu niama, nam nichto ničoha nie kaža, pieradačy dla jaho nie prymajuć. Na suviaź sa mnoj ci babulaj, jaho mamaj, nichto nie vychodziŭ. Adpaviedna, u jakim jon statusie i z čym źviazana zatrymańnie, ja taksama nie viedaju. U čym jaho abvinavačvajuć — nieviadoma.
Ale jość infarmacyja, što jon byŭ zatrymany nie adzin, a było jašče niekalki čałaviek. Chto jany, ja kazać nie budu.
Ja miarkuju, što heta źviazana z tym, što raniej baćka słužyŭ u orhanach, pryčym u zusim niaprostym padraździaleńni. Bo jon nie byŭ źviazany z palitykaj, nie ŭdzielničaŭ u Maršach, nie zatrymlivaŭsia padčas akcyj».
Hanna kaža, što Viačasłaŭ Sidarakin słužyŭ u «Ałmazie» da 2008 hoda.
«Jon taksama zajmaŭsia navučańniem śpiecyjalistaŭ, jeździŭ za miažu vučyć — ja tak razumieju, z dazvołu i viedama načalstva. Ale ž jaho abvinavacili ŭ niezakonnaj pradprymalnickaj dziejnaści — maŭlaŭ, hetyja pajezdki jon rabiŭ za śpinaj kiraŭnictva — i asudzili ŭ 2008 hodzie.
Nie pamiataju, kolki dali, ale baćka vyjšaŭ amal praz try hady, u lutym 2011 hoda», — zhadvaje Hanna.
Praŭda, inšyja krynicy raspaviali «Našaj Nivie», što Sidarakin byŭ asudžany za toje, što dapamoh znajomym źnieści budynak — dla čaho vynies z pracy krychu vybuchovaha rečyva.
Paśla vychadu na volu Viačasłaŭ raźvioŭsia z žonkaj i razam z čatyrma dziećmi pierabraŭsia ŭ Rasiju. Z tych časoŭ i pa siońnia Sidarakin pracavaŭ u rasijskaj kampanii, jakaja zajmajecca demantažom zbudavańniaŭ: u tym liku z vykarystańniem chimičnych srodkaŭ i vybuchoŭki.
Naprykład, u Kalininhradzie Sidarakin zajmaŭsia likvidacyjaj adnoj z apor masta padčas rekanstrukcyi zbudavańnia. Navat trapiŭ u naviny — pra jaho pracu napisała miascovaje ŚMI zastroyschiki39.ru.
Biełarus vykarystoŭvaŭ chimičny sposab — pramiežkavy pamiž fizičnym razbureńniem kanstrukcyi i vybucham. U aporach masta praroblivajucca adtuliny, u jakija zakładvajucca jomistaści-hienieratary, zaradžanyja techničnaj sollu. Chimikat zapalvajecca ad elektryčnaha razradu, i ŭ vyniku reakcyi vyłučajecca haz, cisk jakoha razburaje aporu. Dla razbureńnia apory treba zrabić kala dziasiatka padobnych pracedur. Reakcyja zarada doŭžycca ŭsiaho 30 siekund i supravadžajecca niahučnym chłapkom. Bolš času ŭ hetym vypadku zajmaje zbor i vyvaz adkidaŭ.
«Heta byli charošyja hrošy, jon dobra zarablaŭ, — kaža dačka. — Jamu vielmi padabałasia takaja praca, baćka jašče chacieŭ zaniacca pracaj u harach: źbivać łaviny na harnałyžnych kurortach, uzryvać kamienistyja ŭčastki, na jakich chacieli śvidravać kałodziežy».
Kab paćvierdzić ci abvierhnuć infarmacyju pra zatrymańnie Viačasłava Sidarakina, «Naša Niva» niekalki razoŭ zvaniła aficyjnamu pradstaŭniku KDB, ale słuchaŭku tak i nie źniali. My nakiravali aficyjny zapyt u pres-słužbu viedamstva.
«Baćka niespraviadliva zatrymany. Toje, što adbyvajecca, —niezakonna, jon nie złačynca», — kaža dačka.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary