Raniej chacieła žyć va Ukrainie — ciapier raskazvaje, što tam nacysty. Chto takaja Anastasija Bieniedzisiuk, novy tvar prapahandy
Anastasija Bieniedzisiuk, maładaja žurnalistka BT, raniej zdymała siužety pra karanavirus i adukacyju. Siońnia jana raskazvaje pra vajnu va Ukrainie ŭ styli samych čarnasocienskich rasijskich prapahandystaŭ. Raskazvajem, što pra jaje viadoma.
Va Ukrainie hiei i nacysty
Ciapier na BT niaredka vychodziać siužety Bieniedzisiuk na temu vajny va Ukrainie. Voś tolki słova «vajna» ŭ ich nie pačuješ.
Aśviatlajecca ŭsio čakana: ukrainskija vajskoŭcy vystaŭlajucca nacystami, jakija prykryvajucca mirnymi žycharami i dziećmi.
Anastasija robić repartažy pra ŁHBT-vajskoŭcaŭ va USU, raskazvaje pra chiby ŭkrainskaha telebačańnia, dakazvaje, što Ukrainie stvarajuć imidž achviary zachodnija pijar-ahienctvy.
U jakaści śpikieraŭ u jaje siužetach vystupajuć vieteran rasijskaha śpiecnaza, rasijski redaktar małaviadomaha praŭładnaha časopisa (i heta na biełaruskim telebačańni!).
U tych siužetach rasijanie nie bambiać Charkaŭ i Kijeŭ, ad rasijskich rakiet nie haryć Maryupal, a vojski RF kali i fihurujuć, to vyklučna evakujujuć ludziej i dapamahajuć miascovamu nasielnictvu. Biełaruś taksama nie nadaje svaju ziamlu dla tankaŭ i samalotaŭ Rasii, a kłapocicca pra ŭkrainskich biežancaŭ.
Pra toje, što bolšaść ukraincaŭ čamuści biažyć u Jeŭropu, a nie da rasijskich «vyzvalicielaŭ», karespandentka nie zhadvaje.
Taksama zusim niadaŭna Anastasija zaviała svoj telehram-kanał. Tam krychu bolš za 300 padpisantaŭ. Publikuje ŭ im spasyłki na svaje siužety i repościć samuju lutuju rasijskuju prapahandu, nakštałt čarnasocienskaha kanała «Caŕhrad», źbiraje padborki chvalebnych kamientaroŭ na adras Łukašenki.
«Joj skazali zrabić — jana zrobić»
Anastasii 29 hadoŭ. Jana rodam z Ašmianaŭ, vučyłasia ŭ miascovaj škole №1.
Dziaŭčyna była aktyŭnaj jašče ŭ školnyja časy: niaredka ŭdzielničała ŭ raznastajnych kanfierencyjach. Taksama jana była aktyŭnaj pijanierkaj, u 2010 hodzie stała pieramožcaj rajonnaha etapu i dypłamantam 2 stupieni abłasnoha etapu ŭ konkursie «Lidar-2010» (konkurs talentaŭ, jaki arhanizuje BRSM).
Paśla škoły Bieniedzisiuk pajšła ŭ žurnalistyku. Vučyłasia ŭ BDU na śpiecyjalnaści «aŭdyjovizualnaja žurnalistyka», na płatnym, była starastaj hrupy.
BDU Bieniedzisiuk skončyła ŭ 2015 hodzie, ale jašče padčas vučoby pačała pracavać na telekanale STB, jaki tady jašče nie byŭ ruparam samaj piakielnaj prapahandy.
Adzin z byłych kaleh raskazvaje pra karespandentku:
«Jana pryjšła na STB zusim maładoj žurnalistkaj. Bieniedzisiuk była vielmi pracavitaj dziaŭčynaj, vielmi. Jana była hatovaja fanatyčna, uparta pracavać, pracavać šmat, nie spać načami. I prafiesija žurnalista dla jaje była vielmi važnaj.
Ale jana była hatovaja rabić toje, što skažuć, navat kali nie była ŭ zachapleńni. Adnojčy na pres-kanfierencyi joj treba było začytać adkryta prapahandysckaje pytańnie, spuščanaje źvierchu — było zaŭvažna, što joj niajomka, soramna, ale jana začytała.
Uvohule, miarkuju, kab źmianiłasia ŭłada, to tak ža ščyra i apantana Naścia b «mačyła» vorahaŭ umoŭnaha Paźniaka. Praca dla jaje była cikavaja jak ramiastvo, a nie jak baraćba, jak u taho ž Azaronka.
Ja bačyŭ siońniašnija jaje siužety na BT — jany žudasnyja. Ale, miarkuju, heta nie tamu, što jany adpaviadajuć jaje ŭnutranym pierakanańniam. Joj prosta skazali zrabić, značyć jana zrobić.
Kali ja jaje viedaŭ, nie zaŭvažaŭ za joj asablivaj palityzavanaści, nikoli nie čuŭ i dyfirambaŭ Łukašenku».
«Mnie zdavałasia, Bieniedzisiuk było zaŭsiody treba, kab jaje canili. I budziem ščyrymi, praz svaju pracazdolnaść jana hetaha zasłuhoŭvała, — kaža «Našaj Nivie» inšy eks-supracoŭnik STB. — Ale, mahčyma, nie zaŭsiody jana heta atrymlivała».
«Na STB Anastasija zajmałasia «sacyjałkaj»: siužety pra ŽKH, babul, usiakaje takoje. Reparciorkaj jana była dobraj, navat z samaj panyłaj temy mahła zrabić niešta cikavaje, — raskazvaje «Našaj Nivie» Michaił Pranovič. Jon kaža, što pracavaŭ na STB razam z Anastasijaj, a paśla doŭha siabravaŭ ź joju. —
Ale joj zaŭsiody nie padabalisia ŭmovy pracy na STB, zaŭsiody nie chapała zarobku. Paśla jana pierajšła na BT, ale i tam była niezadavolenaja tym ža».
«Kazała: jak pačnucca mitynhi, zvolniusia»
Na BT Bieniedzisiuk była reparcioram, zdymała standartnyja siužety dla pieradač «Panarama» i «Na kantroli prezidenta»: pra studentaŭ-zamiežnikaŭ, palihony śmiećcia, kupańnie znakamitaściaŭ na Vadochryšča i pośpiechi biełaruskich daktaroŭ.
«Ale jana pastajanna šukała niejkuju inšuju pracu ci prynamsi kazała pra heta. Navat dumała, što dobra było b źjechać ź Biełarusi. Jašče ŭ 2018 hodzie niekalki razoŭ chacieła źjechać va Ukrainu, kab žyć i pracavać u Kijevie, navat była hatovaja vyvučyć ukrainskuju movu. Pytałasia ŭ mianie, ci ja nie maju znajomych tam. Hledziačy na jaje siońniašnija siužety pra Ukrainu, mnie ciapier vielmi cikava, čamu tady jaje tak ciahnuła ŭ Kijeŭ, — kaža Pranovič. —
Raniej Anastasija zaŭsiody zdavałasia mnie pryjemnaj i dobraj dziaŭčynkaj. I za hady siabroŭstva jana nikoli nie zdradžvała, zaŭsiody dapamahała. Šmat u čym jana ŭvohule była libierałkaj, z tych ludziej, jakija kažuć: «tak, ja pracuju na BT, ale mnie heta ŭsio nie vielmi padabajecca».
Za Łukašenku jana taksama nikoli nie vykazvałasia.
Ja sustrakaŭsia z Anastasijaj u 2020 hodzie za paru dzion da vybaraŭ. Pili kavu, była jašče adna dziaŭčyna z BT. Razmaŭlali pra ŭsio toje, što adbyvajecca — i ŭsie chacieli, kab pieramoh niechta inšy, kab pieramahła Cichanoŭskaja, usie skardzilisia, što tak drenna zrabili z Babarykam.
Taksama Anastasija kazała, što jak pačnucca mitynhi, kali ludzi vyjduć, to jana adrazu zvolnicca, vyjdzie na Płošču, bo nibyta nie moža heta ŭsio ciarpieć.
I voś 17 žniŭnia 2020 supracoŭniki BT vyjšli na zabastoŭku. Ja taksama pryjšoŭ, bo krychu pracavaŭ tam.
Baču — šmat ludziej, bieł-čyrvona-bieły ściah na ŭvachodzie… Zvaniu Anastasii, a jana vielmi choładna adkazvaje mnie, što jana ŭ kamandziroŭcy niedzie ŭ Minskaj vobłaści. Paśla čaho jana prosta kidaje słuchaŭku — na tym našaje siabroŭstva ź joj i skončyłasia».
«Mahčyma, jana prosta prahnie pryznańnia»
U ščyraści siońniašnich pramoŭ Bieniedzisiuk jaje były siabar vielmi sumniajecca.
«Pieršyja paŭhoda paśla vybaraŭ Anastasija ŭvohule zdymała siužety amal vyklučna pra kavid. Nijakaj palityki. I tut — babach! — pavieryła ŭ toje, što ŭkraincy (da jakich jana chacieła źjechać žyć) fašysty i nacysty, jakija farmirujuć ŁHBT-vojski? — sumna paśmichajecca Michaił Pranovič. —
Niekatoryja siužety Anastasii vyhladajuć tak, nibyta ich zabrali ŭ Azaronka i addali joj. Amal takija ž moŭnyja abaroty, pryjomy — sama jana nikoli tak nie havaryła.
Ja nie vieru, što jana tak siabie pavodzić praz hrošy — jakija tam hrošy, na tym BT. Miarkuju, što jana prahnie pryznańnia, uvahi, bolš vysokaj pasady, moža być».
«U Bieniedzisiuk vielmi krytyčny skład rozumu. Čamu jana robić siońnia toje, što robić — nie viedaju. Ale jana dakładna bačyła, što adbyvałasia ŭ žniŭni 2020, — kaža adzin ź jaje byłych kaleh. — Mahčyma siońnia — heta strach?»
«Naša Niva» adnaŭlaje zbor danataŭ — padtrymać prosta
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ1
Kamientary