Pradali lecišča Niny Bahinskaj. Ci možna budzie viarnuć zabranuju režymam majomaść?
Za 727 rubloŭ z aŭkcyjonu pradadziena lecišča Niny Bahinskaj. Nieŭzabavie režym źbirajecca masava pazbaŭlać majomaści tych, kaho ličyć svaim voraham. Nakolki biaśpiečna nabyvać majomaść, aryštavanuju ŭ miežach palityčnych spraŭ, i jak paśla padzieńnia režymu možna budzie viarnuć svaje pravy na hetuju majomaść? U hetym raźbiraŭsia Biełsat.
Z aŭkcyjona pradadziena lecišča hramadskaj aktyvistki Niny Bahinskaj. Jaho zabrali za štrafy. Pieršapačatkovy košt — 693 rubli, pradali za 727 rubloŭ. Žančyna — simvał pratestu suprać režymu Łukašenki — pryncypova admaŭlajecca płacić štrafy pavodle palityčnych spraŭ, bo ličyć ich niezakonnymi.
«Ja viedaju, kaniešnie, pra situacyju ŭ Niny, źviazanuju z hetymi štrafami, z hetym leciščam. Vy razumiejecie, dla jaje heta vielmi pryncypovaja pazicyja. Jana ličyć, što kali niechta źbiraje hrošy, moža, niejkaja tam arhanizacyja dapamahaje zapłacić štraf čałavieku, to takim čynam hety čałaviek, jaki vyjšaŭ pratestavać suprać dziaržavy, jašče i dapamahaje hetaj dziaržavie», — tłumačyć žurnalistka «Biełsata» Luboŭ Łuniova.
Havorka idzie pra ziamielny nadzieł pamieram čatyry z pałovaju sotki ŭ sadovym tavarystvie «Fiztech» u Puchavickim rajonie. Na im staić stareńkaja haspadarčaja pabudova.
«A tyja, chto kradzie, jany drenna skončać! Abo sami — ich sumleńnie ŭsio ž taki pračniecca, zamučaje, jany nie zmohuć navat žyć na hetaj ziamli, abo ich dzieci buduć saromiecca», — kazała Nina Bahinskaja jašče ŭ 2016 hodzie, kali ŭłada aryštavała i vystaviła na aŭkcyjon hetaje i jašče adno jaje lecišča ŭ Smalavickim rajonie.
Niahledziačy na ŭsio, aktyvistka ŭ svaje stałyja hady praciahvała tudy jeździć.
«Voś hetaja słabaja maleńkaja žančyna pasadziła aharodzik, voś heta ž treba ŭskapać, treba palivać, pałoć, kab voś praz svaje palcy prajšło stolki ziamielki. Razumiejecie, usia heta ziamielka, jakaja tam jość, choć jaje i niašmat, jana prapuščanaja praź jaje palcy — i nie adzin raz, i nie adzin hod», — zaznačaje žurnalistka «Biełsata» Luboŭ Łuniova.
Dla ŭdziełu ŭ tarhach zarehistravalisia čatyry asoby. Pra jurydyčnuju zakonnaść uhody, datyčnaj aryštavanaj u miežach palityčnaj spravy majomaści, zapytalisia ŭ pradstaŭnika pradpryjemstva «BiełJurZabieśpiačeńnie». I voś jaki adkaz atrymali:
«My pradajom užo vielmi praciahły čas aryštavanuju majomaść, kali vas niešta tam u jurydyčnych pytańniach niepakoić, dyk nabiarycie sudovamu vykanaŭcu, udakładnicie heta ŭsio. My ŭsiaho tolki handlovaja placoŭka».
Pytańnie pieranakiravali ŭ adździeł prymusovaha vykanańnia Pieršamajskaha rajona Minska, jaki mienavita i vystaviŭ lecišča Niny Bahinskaj na aŭkcyjon.
«Nu ja ž nie mahu vam na hetaje pytańnie adkazać, ci budzie čałaviek abskardžvać jakija pastanovy? Heta nastolki vobłačna i razmyta. U takim razie pra ŭsie dziejańni, što ažyćciaŭlajucca, hetak ža sama možna dumać. Na siońniašni dzień nijakaja pastanova nie admienienaja — nijakich pieradumoŭ dla hetaha niama», — adkazała sudovaja vykanaŭca Maryja Sarančuk.
«Kali adnoj z padstaŭ prava ŭłasnaści budzie sudovaja pastanova, heta zaŭsiody faktar ryzyki», — miarkuje juryst u halinie nieruchomaści Alaksandr Štrykul. U svajoj praktycy jon zaŭsiody imkniecca znajści sudovuju pastanovu i praanalizavać jaje.
«Ja pakidaju za dužkami maralna-etyčnaje pytańnie takoha kštałtu nabyćcia, ale kali vy kuplajecie takoha kštałtu majomaść, kvateru, pierš za ŭsio ja kažu pra nieruchomuju majomaść, heta vielmi ryzykoŭna. Vy ž źbirajeciesia ŭ joj žyć, układvać hrošy ŭ ramont, jość ryzyki taho, što ŭ vyniku kvateru ŭ vas zabiaruć», — zaznačaje juryst u halinie nieruchomaści Alaksandr Štrykul.
Jość spadziavańnie, što paśla padzieńnia režymu Łukašenki ŭsie niezakonnyja pastanovy i vyraki ŭ palityčna matyvavanych spravach buduć skasavanyja ŭ niezaležnym sudzie. Bo pakul što abskardzić ich paprostu niemahčyma. Nieŭzabavie łukašysty abiacali masava pazbaŭlać majomaści i biełaruskaha hramadzianstva biełarusaŭ, jakija źjechali za miažu.
«Heta novaja rečaisnaść, u jakoj ciapier žyvie Biełaruś i budzie žyć da samaha kanca łukašyzmu. My nie musim ni siekundy sumniavacca, što ŭsie svaje pahrozy, jakija jany ahučvajuć, jany buduć imknucca vykanać. A vykanać jany mohuć pahrozy ŭ dačynieńni da taho, što zastajecca na terytoryi Biełarusi. Kali niama fizična čałavieka, to chacia b niejkaja nieruchomaść, napeŭna, znojdziecca», — ličyć zasnavalnik Tribuna.com Źmicier Navoša.
Žurnalist i miedyjamieniedžar sam choć i vyjechaŭ za miežy krainy, ale ŭ jaho ŭłasnaści zastałasia kvatera ŭ Fanipali, na jakuju aryšt byŭ nakładzieny jašče hod tamu.
«Ja nie ŭpeŭnieny, što hetym mušu zajmacca navat ja sam. Mnie zdajecca, što heta kraina, biez usialakich sumnievaŭ, pavinna budzie prajści praz hety praces i adkacić usio represiŭnaje zakanadaŭstva, usie niepravavyja rašeńni, što byli pryniatyja. U dačynieńni da nieruchomaści heta naohuł prosty praces, jon zaviecca restytucyjaj, jon prajšoŭ va ŭsich krainach», — udakładniaje Źmicier Navoša.
U zakanadaŭstvie termin «restytucyja» aznačaje pryznańnie niepravadziejnaści ŭhody z dalejšym viartańniem bakami ŭsiaho, što jany atrymali ŭ miežach pahadnieńnia.
«Tut spraviadlivaj jość hrašovaja kampiensacyja. Ź inšaha boku — jak budzie na praktycy. Heta značyć, naźbirajecca peŭnaja kolkaść takoha kštałtu ŭhodaŭ, mahčyma, dziaržavie budzie praściej viarnuć kvateru, čym kampiensavać. Ci jość hrošy ŭ biudžecie? Niama. Ciapier prahnazavać, jak jano budzie na praktycy, davoli składana», — kaža Alaksandr Štrykul.
Na dumku jurysta, u Biełarusi stvaryli ledź nie samuju daskanałuju sistemu rehistracyi nieruchomaści va ŭsim śviecie. Tamu viarnuć prava ŭłasnaści na niezakonna zabranuju majomaść paśla padzieńnia režymu Łukašenki budzie nieskładana.
Brat udavy Zielcara: Kadebisty išli ŭ kvateru pa mianie8
Kamientary