Čamu Łatušku dali bolš hadoŭ «zavočnaj kałonii», čym Cichanoŭskaj?
Siońnia haradski sud Minska zavočna adpraviŭ u kałoniju niekalkich palitykaŭ. Śviatłanu Cichanoŭskuju pakarali zavočna 15 hadami, Paŭłu Łatušku — 18. Čym Łatuška bolš razzłavaŭ režym? Spytali jaho samoha.
Pavieł Łatuška kaža, što nie choča paraŭnoŭvać terminy, bo «ŭ Biełarusi niama sudoŭ, niama prakuroraŭ, niama advakataŭ, a rašeńnie prymaje asabista Łukašenka».
«Ja pryznaju, što Śviatłana Cichanoŭskaja źjaŭlajecca abranaj prezidentkaj i my praciahvajem baraćbu, — adznačaje palityk. — Tut pytańnie nie ŭ našych terminach. Pytańnie ŭ tym, što my možam i pavinny zrabić dziela taho, kab vyzvalić palitźniavolenych, dziela taho, kab źmianić situacyju ŭ našaj krainie i likvidavać hety režym».
Pavieł Łatuška kaža: «siońnia Łukašenka sudziŭ pustuju kletku».
«Ja nie sudździa, nie prakuror i nie mahu vynosić abvinavačvańniaŭ ci prysudaŭ, ale ja pierakanany, što ŭ hetaj kletcy budzie siadzieć Łukašenka i ŭsie jahonyja pamahatyja. Jany adkažuć na narmalnym kryminalnym pracesie za tyja złačynstvy, jakija jany robiać nie suprać mianie i nie suprać Śviatłany Cichanoŭskaj, a suprać biełarusaŭ, biełaruskaha narodu. Ja ŭ heta vieru», — vykazaŭsia pradstaŭnik Abjadnanaha pierachodnaha kabinieta pa tranzicie ŭłady.
Na dumku palityka, svaim prysudam Łukašenka dasyłaje jamu sihnał, ale razumieje, što ŭ adkaz pačuje «nie, nie spynić».
Pavieł Łatuška nahadvaje: Łukašenka jašče 1 vieraśnia 2020 hodu skazaŭ, što jon pierakročyŭ čyrvonuju rysu i za toje adkaža.
«Jon usprymaje ŭsich dziaržaŭnych słužboŭcaŭ, jak ludziej, jakija pavinny być jamu čymści abaviazanyja. Jon nie razumieje, što toj chto pracuje ŭ dziaržavie — pracuje dla dziaržavy, pavinien pracavać dla dziaržavy i biełaruskaha narodu, a nie prysłužvać adnoj asobie», — davodzić palityk.
Pavodle jaho, Łukašenka ŭsprymaje zychod słužboŭcaŭ da jaho ŭ apazicyju jak zdradu.
«Hałoŭnaje, što ja nie zdradziŭ biełaruskamu narodu i heta toje, što mianie siońnia matyvuje i ja nie maju prava jamu zdradzić. Łukašenku ja nikoli prysiahaŭ nie davaŭ», — adznačaje jon.
Pavieł Łatuška nie maje adnaznačnaha adkazu na pytańnie, ci budzie abskardžvać vyrak.
«Nie dumaŭ, ščyra kažučy, — adkazvaje jon. — Stvaryć jašče adzin dadatkovy pracesualny dzień režymu? Jaki sens? Heta nie budzie adkrytym pracesam. U mianie niama advakata. Jon, niby, jość, ale realnaha niama. Budu raicca i prymu rašeńnie. Na siońnia schilny, što nie».
Śviatłanu Cichanoŭskuju, Paŭła Łatušku pryznali vinavatymi ŭ zmovie, ździejśnienaj z metaj zachopu dziaržaŭnaj ułady niekanstytucyjnym šlacham. Inšych źniavolenym pa «spravie Kaardynacyjnaj rady» Maryju Maroz, Volhu Kavalkovu i Siarhieja Dyleŭskaha sud zavočna adpraviŭ u kałoniju na 12 hadoŭ.
U Paŭła Łatuški aršytavany ziamielny ŭčastak u Minskim rajonie, kapitalny budynak u ahraharadku Ždanovičy, hrošy na bankaŭskich rachunkach (bolš za 31,8 tysiačy jeŭra i $21,8 tysiačy dalaraŭ), a taksama inšaja majomaść.
«Naša Niva» — bastyjon biełaruščyny
PADTRYMAĆŚviatłanie Cichanoŭskaj prysudzili 15 hadoŭ, Łatušku — 18
Dziaržabvinavaŭca zaprasiŭ dla Śviatłany Cichanoŭskaj i Paŭła Łatuški pa 19 hadoŭ kałonii zavočna
Brat udavy Zielcara: Kadebisty išli ŭ kvateru pa mianie6
Kamientary