Pryhožyn pahražaje adstupleńniem z Bachmuta, nazyvaje situacyju krytyčnaj
Rasijski biznesoviec, kiraŭnik vajskovaj hrupoŭki «Vahnier» Jaŭhien Pryhožyn zajaviŭ, što hetaja PVK «chutka skončycca». Što aznačaje hetaja zajava adyjoznaha rasijanina, pasprabavała razabracca Bi-bi-si.
Pryhožyn daŭ vialikaje intervju rasijskamu vajskovamu błohieru Siamionu Piehavu, uładalniku kanała WarGonzo.
Padčas razmovy kiraŭnik «Vahniera» zajaviŭ pra składanuju situacyju na froncie i značnyja prablemy rasijskaj armii i najmitaŭ z PVK.
Ź jaho słoŭ vynikaje, što rehularnaja rasijskaja armija znachodzicca ŭ žalu vartym stanie, a ruchajučaj siłaj prasoŭvańnia sił RF u Danieckaj i Łuhanskaj abłaściach źjaŭlajecca mienavita PVK «Vahnier».
Va US RF, skazaŭ Pryhožyn, niama ŭ tym liku narmalnaha kiravańnia i stratehičnaha bačańnia.
Naprykład, jon zajaviŭ, što adsutničaje razumieńnie, što rabić rasijskim siłam paśla ŭziaćcia Bachmuta. Pryhožyn zapeŭnivaje, što raspracavaŭ apieracyju zachopu horada letaś razam z kamandujučym na toj momant rasijskich vojskaŭ Siarhiejem Suravikinym.
Płan składaŭsia ŭ tym, kab pazbavić USU nastupalnaha patencyjału da kanca 2022 hoda, źniščajučy ich reziervy kala Bachmuta.
Ale ciapier Ukrainie ŭdałosia padrychtavać novyja voinskija padraździaleńni dla kontrnastupu, jaki pavinien pačacca najbližejšym časam — da 15 maja, miarkuje Pryhožyn.
Rasijskija siły da hetaha nastupu nie hatovyja, zapeŭnivaje jon.
Pa stanie na siońnia, kaža Pryhožyn, bajcam «Vahniera», jakija viaduć bai za Bachmut, krytyčna nie chapaje bojeprypasaŭ. Zapasy ich majucca na składach rehularnaj rasijskaj armii, zapeŭnivaje jon.
PVK byccam by treba 80 tysiač snaradaŭ na dzień, ale Pryhožyn prosić Minabarony RF dać choć by 4 tysiačy. Ale nie atrymlivaje i hetaha.
Praz adsutnaść bojeprypasaŭ straty «Vahniera» vyraśli ŭ 5 razoŭ, kaža ŭładalnik PVK.
«Na siońniašni dzień my prychodzim da taho, što PVK «Vahnier» zakančvajecca, PVK «Vahnier» praź niejki karotki čas pierastanie isnavać. My pojdziem u historyju. Ničoha strašnaha, tak byvaje».
Z-za nazvanaj situacyi Pryhožyn maje namier źviarnucca ŭ rasijskija pravaachoŭnyja orhany z prośbaj pryciahnuć čynoŭnikaŭ Minabarony RF da adkaznaści.
Kali situacyja sa «snaradnym hoładam» nie budzie vyrašanaja, to «Vahnier» vyjdzie z Bachmuta — całkam abo častkova.
«Kali deficyt bojeprypasaŭ nie budzie papoŭnieny, to my vymušanyja budziem u arhanizavanym paradku, kab nie biehčy, jak bajaźlivyja pacuki, abo vychodzić abo zastacca hinuć. Vierahodna, častku padraździaleńnia my budziem vymušanyja vyvieści z hetaj terytoryi, a potym… pasyplecca ŭsio astatniaje. My bjem u nabat!»
Ale pry hetym Jaŭhien Pryhožyn kaža, što «razvaročvać harmaty» suprać Kramla vahnieraŭcy nie płanujuć, niahledziačy na ciažkuju situacyju pad Bachmutam.
Varta zaŭvažyć, što bai za Bachmut u Danieckaj vobłaści bajcy «Vahniera» i rasijskaja rehularnaja armija viaduć užo 10 miesiacaŭ.
Pa stanie na kaniec krasavika, ukrainskija siły ŭtrymlivajuć tolki častku žyłych kvartałaŭ na zachadzie horada, a taksama dźvie darohi, jakija viaduć z Bachmuta da Časavaha Jara i Kanstancinaŭki.
Z-za taktyki, jakaja składajecca ŭ praviadzieńni šturmaŭ chvalami i za košt pieravažna byłych źniavolenych, «Vahnier» niasie vielizarnyja straty asabovaha składu.
Pavodle źviestak brytanskaj raźviedki, na pačatak hoda va Ukrainie vajavali blizu 50 tysiač «vahnieraŭcaŭ». Da kanca sakavika ich kolkaść istotna źmienšyłasia.
U pryvatnaści, staršy vajskovy daradca delehacyi Vialikabrytanii ŭ ABSIE Ijen Stabs paviedamiŭ, što paśla bitvaŭ u rajonie Bachmuta zahinuli abo byli paranienyja 30 tysiač rasijskich vajskoŭcaŭ i «vahnieraŭcaŭ».
«Hetyja straty ŭ žyvoj sile buduć praciahvać strymlivać rasijskija nastupalnyja apieracyi ŭ rajonie Bachmuta, a taksama na bolš šyrokim teatry bajavych dziejańniaŭ, i značnyja straty «Vahniera», vierahodna, buduć pahražać jaho zdolnaści zachavać svaju ŭpłyvovuju rolu siarod rasijskich sił, jakija vajujuć va Ukrainie», — zajaŭlaje Amierykanski instytut vyvučeńnia vajny (ISW).
Pavodle źviestak raźviedki, Kreml užo šukaje zamienu «Vahnieru».
«Rasijskaje vajskovaje kiraŭnictva, padobna, choča zamianić ich inšaj PVK, jakaja była b bolš padkantrolnaj jamu. Adnak nivodnaja z rasijskich pryvatnych vajskovych kampanij z tych, pra jakija viadoma, nie źjaŭlajecca supastaŭnaj z «hrupaj Vahniera» ŭ pamierach i bajazdolnaści».
Kiraŭnictva RF, napeŭna, ličyć, što hramadstvu budzie lahčej usprymać vialikija straty siarod najmitaŭ PVK, čym u rehularnaj armii.
Čytać taksama:
Pryhožyn viartaje prychilnaść Pucina — ISW
Biełaruś dała zbroju PVK «Vahnier», a Kitaj admoviŭ — Financial Times
Brat udavy Zielcara: Kadebisty išli ŭ kvateru pa mianie10
Kamientary