«Nazvaŭ Emaniuela słovam z čatyroch litar, pieršaja — «S». Borys Džonsan mocna vyłajaŭsia na Makrona 

U svaim padkaście Unprecedented Huta Chary, jaki zajmaŭ pry Džonsanie pasadu kiraŭnika adździeła pa suviaziach z hramadskaściu ŭrada Vialikabrytanii, paviedamiŭ, što heta adbyłosia paśla taho, jak francuzski prezident pajechaŭ u Maskvu na sustreču z Uładzimiram Pucinym u lutym 2022 hoda, dzie siadzieŭ ź im za niezvyčajna doŭhim stałom, piša Bi-bi-si.

«Napružanaść paŭstała na rańnim etapie, kali takija ludzi, jak Emaniuel Makron, prezident Francyi, pajechali ŭ Maskvu, kab havaryć z Pucinym. Pa-mojmu, Borys u pryvatnym kole nazvaŭ heta vanitnym. A Makron, ja miarkuju, u svaju čarhu adčuvaŭ napružańnie praz toje, što Borys bolš za ŭsich staraŭsia dapamahčy Ukrainie ŭ vajskovym płanie. A kali brytanskaja presa adčytvała naš urad za słabuju reakcyju na kryzis ź biežancami [ŭ pieršyja tydni vajny], Makron padliŭ masła ŭ ahoń, raskrytykavaŭšy Borysa, i jaho słovy byli na ŭsiu pieršuju pałasu, zdajecca, haziety Guardian u piatnicu», — skazaŭ Huta Chary.

Pieršapačatkova ŭłady Brytanii chacieli, kab žychary Ukrainy, u jakich jość svajaki ŭ Vialikabrytanii, padavali dakumienty na brytanskija vizy asabista ŭ pasolstvach Brusiela i Paryža, u toj čas jak patoki ludziej sprabavali vybracca z krainy paśla raptoŭnaha napadu Rasii.

Makron zajaviŭ, što Brytanija šmat abiacaje, ale mała robić, i dadaŭ: «Ja tolki spadziajusia, što kali mužčyny i žančyny, jakija pieražyli žach i pierasiekli Jeŭropu, kab dabracca da svaich svajakoŭ u Vialikabrytanii, da ich dabiarucca, tam da ich pastaviacca lepš, [čym na etapie ź vizami]».

Jak raspaviadaje Huta Chary, Borys paśla hetaha zusim vyjšaŭ ź siabie, niahledziačy na toje, što pa słovach jaho daradcy, jon zvyčajna nie schilny da prajaŭ hnievu i mocnych vyrazaŭ.

Chary śćviardžaje, što premjer-ministr nazvaŭ Makrona słovam z čatyroch litar, jakija pačynajucca na «C», — vielmi brudnaj łajankaj, maksimalna abraźlivaj u anhlijskaj movie, a taksama «admarozkam» i «pucinskim lizabludam».

«Nam treba nadavać pa mordzie hetym žabnikam», — nibyta skazaŭ Džonsan, dadaŭšy jašče niekalki virtuoznych vyrazaŭ na tuju ž temu.

Pa słovach Chary, padobny čorny «humar šybienika» byŭ, vidavočna, ničym inšym, jak miechanizmam, jaki dazvalaje psichicy spravicca z kryzisam ad uśviedamleńnia pačatku vialikaj vajny ŭ Jeŭropie.

Praź niekalki tydniaŭ jany, viadoma ž, pamirylisia. Jany vielmi dobra paładzili. Navat razam vypili viski na samicie «Vialikaj siamiorki», skazaŭ Huta Chary.

U atačeńni Borysa Džonsana pakul nie kamientavali słoŭ jaho byłoha daradcy.

• 64
• 14
• 3
• 2
• 1
• 2