Instruktar «Vahniera» z pazyŭnym «Brest»: Biełaruś — taki ž kirunak, jak i inšyja. A my spatrebimsia pierad vybarami
Kanały rasijskich vajenkaraŭ raspaŭsiudzili zvarot biełarusa, jaki słužyć u «Vahniery». Hety bajavik — były śpiecnazaviec z Horak. Raskazvajem, chto jon.
Čałaviek na videa — 42-hadovy Alaksiej Biarhovin. Jon užo viadomy bajavik «Vahniera», pra jakoha miedyja pisali niekalki hadoŭ tamu, bo jon byŭ siarod dvuch biełarusaŭ, što vajavali ŭ Sudanie. Mužčyna naradziŭsia ŭ horadzie Horki ŭ zvyčajnaj siamji: jahonaja maci — łabarantka, a baćka — elektryk.
Nieviadoma, dzie jon vučyŭsia, ale maje vyšejšuju adukacyju. Ź dziacinstva zajmaŭsia boksam. Sam mužčyna niekali kazaŭ dla knihi «Biełaruski Danbas», što z 2003 pa 2010 słužyŭ u «elitnych čaściach śpiecnaza». Źviestki, atrymanyja «Našaj Nivaj» ad «Kibierpartyzanaŭ», heta paćviardžajuć nie całkam: z 2003-ha pa 2005-y jon pracavaŭ spačatku ŭ kałhasach, a paśla kantraloram na KPP na Mazyrskim NPZ. Tolki ŭ kancy 2005-ha, kali vieryć infarmacyi z bazy miescaŭ pracy, mužčyna pajšoŭ na słužbu.
Spačatku jon pracavaŭ u Spartovym kamitecie Uzbrojenych siłaŭ i mieŭ zvańnie praparščyka, a paralelna, vidać, atrymlivaŭ vyšejšuju adukacyju. U 2008-m mužčyna pierajšoŭ u minskuju čaść śpiecnaza 3214 i dasłužyŭsia tam da kamandzira ŭzvoda i zvańnia lejtenanta, ale zvolniŭsia ŭ sakaviku 2010-ha pa zakančeńni kantrakta, jak udakładniaje Biełaruski rasśledvalnicki centr. Paralelna sa słužbaj padpracoŭvaŭ kiroŭcam u niekalkich pryvatnych firmach.
Asabistaje žyćcio nie skłałasia: u 2009-m jon raźvioŭsia z žonkaj, pakinuŭšy joj dvuch synoŭ. U 2010-m, pa źviestkach «Kibierpartyzanaŭ», atrymanych «Našaj Nivaj», na Biarhovina navat zaviali «kryminałku» za niaspłatu alimientaŭ, ale, vidać, u vyniku z žonkaj jon niejak damoviŭsia.
Karjera taksama nie išła: mužčyna adkryŭ IP, ale biznes chutka razvaliŭsia, pa jaho słovach, «jaho zadušyła łukašenkaŭskaja biurakratyja». Taksama na im paviśli daŭhi — heta paćviardžaje i toje, što ŭ 2016-m Biarhovinu zabaranili vyjezd z Rasii i Biełarusi za niaspłatu adnaho ź ich.
Admietna, što da vajny Biarhovin jeździŭ va Ukrainu trojčy — u 2010-m, 2012-m i 2013-m. Jak minimum adzin raz u horad Dniepr (były Dnieprapiatroŭsk).
Mužčyna prymaje rašeńnie jechać vajavać na Danbas na baku Rasii. Jon prybyŭ tudy ŭviesnu 2015-ha. Byŭ lohka paranieny, praz paŭhoda «navajavaŭsia» i viarnuŭsia ŭ Biełaruś. Navat skončyŭ Sielskahaspadarčuju akademiju ŭ rodnych Horkach. Pa viersii «Bajpoła», paśla viartańnia jaho dapytvali, ale jon raskazaŭ, što «prosta vaziŭ humanitarnyja hruzy». Jamu nichto nie pavieryŭ, ale i pakarańnia jon nie atrymaŭ.
U 2017-m mužčyna znoŭku jedzie ŭ Rasiju — hetym razam u Krasnadar. U kancy hoda Biarhovin vyrašaje ŭstupić u PVK «Vahnier» i padpisvaje kantrakt. Siarod admietnych zadač — uvosień 2018-ha jon byŭ u Sudanie razam ź inšymi bajcami PVK.
Viadoma, što Biarhovin pieryjadyčna viartaŭsia ŭ Krasnadar. Da prykładu, 5 žniŭnia 2021 hoda jon zamaŭlaŭ sabie ježu na adras: vulica Fiedasiejeva, dom 29/1. Nieviadoma, kamu naležyć hety dom, ale kala jaho staić cełaja budka z achovaj.
Ciapier jon vajskovy instruktar — vučyć maładych vahnieraŭcaŭ kiravać ciažkaj technikaj.
U videa, jakoje raspaŭsiudzili siońnia Z-kanały, mužčyna kaža, što vielmi rady, što «Vahnier» pryjedzie ŭ Biełaruś: maŭlaŭ, «u Biełarusi siońnia samaje mocnaje padraździaleńnie ŭ śviecie, jakoje moža ŭmacavać armiju pierad vybarami 2024-ha hoda». Taksama Biarhovin kaža, što, pa jaho mierkavańni, situacyja vakoł PVK «Vahnier» była tonka spłanavanaj apieracyjaj, kab vyvieści ich u Biełaruś i stvaryć napružańnie va Ukrainie i krainach NATA.
Santymientaŭ da radzimy ŭ jaho słovach nie adčuvajecca. «Dla mianie Biełaruś — taki ž kirunak, jak i inšyja», — kaža vahnieraviec.
«Naša Niva» — bastyjon biełaruščyny
PADTRYMAĆBrat udavy Zielcara: Kadebisty išli ŭ kvateru pa mianie6
Kamientary
v Biełaruś łukašienko, kak i jadiernoje oružije.