Rasijski palitołah Kaciaryna Šulman u prahramie Deutsche Welle vykazałasia pra aryšt Ihara Strałkova, represii ŭ Rasii, padrychtoŭku da novych vybaraŭ, a taksama pra toje, ci pahražaje Pucinu novaja sproba pieravarotu.
Navošta Kreml pačaŭ zatrymlivać tych, kaho raniej nie ličyŭ niebiaśpiečnymi
Na pohlad Šulman, paśla niaŭdałaha miaciažu pavinny być represii. Heta palityčny zakon. «Kali suprać vas niechta paŭstaŭ i vy heta pieražyli, vy pavinny pakarać tych ludziej, jakija spakusilisia na vašu ŭładu», — kaža jana.
Ale, jak zaŭvažaje palitołah, «asablivaść momantu takaja, što karać tych, chto niepasredna zrabiŭ sprobu zamachu, nie atrymlivajecca, nie chočacca i niama čym, bo jany mohuć i adkazać. Pry hetym prademanstravać niejkuju lutaść nieabchodna. Voś jana i demanstrujecca na tych, chto absalutna dakładna nie budzie supraciŭlacca. Nijakich ža libierałaŭ užo nie zastałosia, antyvajennaja hramadskaść taksama małalikaja i małaviadomaja, tamu pajšli pa levym i pravym krajach».
Siarod niadaŭna zatrymanych błohier-šavinist Ihar Strałkoŭ i dyrektar Instytuta hłabalizacyi i sacyjalnych ruchaŭ, ultralevy palitołah Barys Kaharlicki.
Što tyčycca Hirkina, to Šulman ličyć, što heta publičnaje pakarańnie nievinavatych. Jana nahadvaje, što Hirkin adzin ź pieršych na pačatku miaciažu Pryhožyna skazaŭ, što jaho padtrymlivać nie treba, a nieabchodna ŭsim zhurtavacca vakoł prezidenta i ministra abarony, jakich jon da hetaha krytykavaŭ.
«Prajšło mienš za miesiac, i jany adździačyli jamu za prajaŭlenuju publičnuju łajalnaść», — padkreślivaje Šulman.
Palitołah źviartaje ŭvahu, što Hirkin pry tym, što jon papularny telehram-błohier, zusim niepapularnaja i nieŭpłyvovaja palityčnaja fihura ŭ paraŭnańni, naprykład, z Navalnym. U jaho niama ni bazy padtrymki, ni infarmacyjnaha resursu, ni struktur, pry dapamozie jakich možna mabilizoŭvać ludziej na svaju padtrymku. Da taho ž u jaho niama nijakaj padtrymki (i nie moža być) za miežami Rasii.
«Tamu hetyja ludzi nie mohuć akazać nijakaha supraciŭleńnia. Na ich prykładzie možna demanstravać ułasnuju admietnuju lutaść, jakuju nielha prademanstravać tam, dzie jana była b bolš darečy», — kaža Šulman.
Represii adnosna Hirkina, jak adznačaje palitołah, nie majuć nijakich adnosin da taho, zadavolenaja ci niezadavolenaja armija svaimi kamandzirami.
«Tut, chutčej, situacyja moža być našmat horšaj. Tamu što tyja ludzi, jakija raniej ličyli, što ŭłada pieraśleduje tolki praklatych libierałaŭ i zachodnich špijonaŭ, raptam ubačyli, što i sapraŭdnych patryjotaŭ jana taksama pieraśleduje», — papiaredžvaje Kaciaryna Šulman.
Kreml zrabiŭ staŭku na zaciažnuju vajnu?
Pa mierkavańni Šulman, pryniaćcie novych papravak u zakanadaŭstvie śviedčyć ab tym, što ŭłady vynieśli ŭroki ź niadaŭnich pamyłak i ciažkaściej papiaredniaj chvali mabilizacyi. Jana źviartaje ŭvahu na źjaŭleńnie novych artykułaŭ u Kodeksie ab administracyjnych pravaparušeńniach, jakija karajuć za niedapamohu ŭ mabilizacyi, nieakazańnie sadziejničańnia — sankcyi suprać słužbovych i jurydyčnych asob.
Šulman ličyć, što heta źviazana z tym, što padčas papiaredniaj mabilizacyi minułaj vosieńniu dziaržaŭnyja słužačyja i pradpryjemstvy niejkim čynam hety praces sabatavali:
«My viedali pra hety sabataž pa razroźnienych źviestkach ab tym, što orhany ŭłady na miescach, a tym bolej dyrektary pradpryjemstvaŭ nie vielmi śpiašajucca skaračać svoj ułasny śpisačny piersanał i, uvohule, znajomych, susiedziaŭ adpraŭlać na viernuju pahibiel.
My heta viedali z abryvačnych źviestak, toje, što nazyvajecca ŭ navucy anecdotal evidence (nieaficyjnyja danyja), a ciapier my viedajem heta ŭžo dakładna. Tamu što sistema ŭžo adreahavała. Jana pryznała fakt sabatažu tym, što ŭvodzić za jaho niejkija pakarańni».
Šulman nie ŭpeŭnienaja, što źmieny ŭ zakanadaŭstvie śviedčać ab tym, što rasijskija ŭłady rychtujucca da zaciažnoj vajny. «Heta, chutčej, pra toje, što kali spatrebicca znoŭ mabilizoŭvać, to my heta pastarajemsia zrabić niejak lepš, čym było minułym razam, padasłaŭšy sałominki ŭ tych miescach, dzie minułym razam spatyknulisia», — kaža jana.
Palitołah taksama zaŭvažaje, što hetyja kroki ŭładaŭ nie śviedčać ab tym, što druhaja chvala mabilizacyi abaviazkova budzie, ale padrychtoŭka da jaje idzie, što ŭzmacniaje jaje imaviernaść. Jana źviarnuła taksama ŭvahu, što mabilizacyja nie zavieršana, bo nie było ab hetym zahada.
Akramia taho, jość roznyja formy cisku dla taho, kab ludzi zaklučali kantrakty.
«Lahčej cisnuć na vajskoŭcaŭ terminovaj słužby. My bačym, jak byli pastupova źniatyja ŭsie abmiežavańni dla zaklučeńnia kantrakta. Ciapier niama abmiežavańniaŭ pa hadach. Heta možna rabić z 18-ci hadoŭ. Niama abmiežavańniaŭ pa adukacyi i terminie słužby.
Ciapier zaklučyć kantrakt možna ź pieršaha dnia słužby. Kali vy ŭžo znachodziciesia pad uładaj svajho kamandzira, to jon moža samymi roznymi sposabami presavać vas dla taho, kab vy hety kantrakt zaklučyli. Toje ž, chacia ź mienšaj kolkaściu mahčymaściej, moža rabić vaš načalnik na pracy.
Bo na pracadaŭcaŭ taksama nakładzieny abaviazak zabiaśpiečyć peŭnuju kolkaść kantraktnikaŭ. Im zahadana razdavać takija bonusy, jak zachavańnie zarobku (zakonam heta nie praduhledžvajecca; tolki pracoŭnaje miesca zachoŭvajecca). A ŭ asobnych vypadkach ad pracadaŭcaŭ patrabujuć, kab jany pahašali kredyty», — apaviadaje palitołah.
Ci admieniać budučyja prezidenckija vybary ŭ Rasii?
Šulman ličyć važnym dla ŭładaŭ rabić vyhlad, što ŭ krainie jość niejkaja vybarčaja kampanija i hałasavańnie:
«Sistema budzie da kanca trymacca za svaju elektaralnuju lehitymnaść. I heta nie zaŭsiody zrazumieła zvonku: čamu b nie admianić hetyja vybary. Nie. Vybary nie buduć admianiacca. Jany buduć pravodzicca i pa mahčymaści ŭ termin».
Nieabchodnaść praviadzieńnia vybaraŭ palitołah tłumačyć dźviuma metami. Pieršaja — administracyjnaja sistema pavinna prademanstravać, što jana moža arhanizoŭvać takija mierapryjemstvy masavaj łajalnaści. Heta nieabchodna dla pravierki dyscyplinavanaści i łajalnaści čynoŭnictva.
Druhaja — heta nieabchodna dla hramadzian dziela taho, kab administracyjna zaležny elektarat prademanstravaŭ svaju administracyjnuju zaležnaść: pryjšoŭ i pravilna prahałasavaŭ.
Taksama ŭładam treba paćvierdzić unutranuju lehitymnaść pierad hramadzianami i źniešnim śvietam. Chacia adnosna apošniaha jość šmat sumnieńniaŭ.
«Kali sistema dažyvie, to jana budzie heta rabić, — adznačaje Šulman i źviartaje ŭvahu na prykmiety padrychtoŭki:
— Pa-pieršaje, my bačym niejkuju ŭciečku z narad, na jakich idzie pošuk sensu. Pa-druhoje, my ŭbačym abkatku niejkich z hetych sensaŭ na adzinym dni hałasavańnia, jaki budzie ŭ vieraśni. Heta davoli zajmalnaje mierapryjemstva — rehijanalnyja vybary — dla tych, chto hetym cikavicca.
Akramia taho, sama represiŭnaść zakanatvorčaha paradku dnia kanca viesnavoj siesii parłamienta tłumačycca jašče i tym, što nieabchodna paśpieć pryniać usio, što treba, da nastupnaj siesii. Bo nastupnaja siesija ŭžo pieradvybarčaja. Tam užo treba razdavać hramadzianam pirahi dy pyški, a nie siniaki dy šyški».
Ci pahražaje Pucinu miaciež abo pałacavy pieravarot
Šulman adznačaje, što statystyčna pahroza pieravarotu — pastajannaja niebiaśpieka dla piersanalisckich aŭtakratyj. Jany našmat čaściej źmianiajucca. A aŭtakraty ŭ takich sistemach našmat čaściej traciać uładu praz zmovu ci miaciež, čym praz masavyja pratesty ci pa ŭłasnaj voli.
Aktualnuju situacyju Pucina palitołah nie biarecca aceńvać:
«Rana pakul rabić vysnovy. Ułada vytryvała. Kali suprać miaciežnikaŭ nichto nie vystupiŭ, to nichto asabliva i nie vystupiŭ u ich padtrymku. Jany sami niejkim čynam starhavalisia i, mahčyma, praciahvajuć tarhavacca. Ale ŭłada siabie zachavała».
Šulman źviartaje ŭvahu na svojeasablivuju reakcyju ŭładaŭ na miaciež. Niama toj represiŭnaj aktyŭnaści, jakuju varta było b čakać. «Jość niejkija tumannyja źviestki pra toje, što toj ci inšy hienierał prapaŭ i nie vychodzić na suviaź z rodnymi i blizkimi. Ale niama nijakich publičnych adstavak, ni publičnaha asudžeńnia. Nikoha ni ŭ čym nie abvinavačvajuć. Nikoha nie zvalniajuć», — kaža jana.
Šulman źviartaje ŭvahu na źmieny ŭ zakanadaŭstvie, jakija dazvalajuć hubiernataram stvarać vajenizavanyja farmiravańni ŭ formie narodnaha apałčeńnia. Faktyčna heta dazvolić im mieć ułasnyja armii: «Zamiest taho, kab adnavić svaju manapoliju na dziaržaŭnaje nasille, dziaržava … ciapier jaje raspylaje jašče šyrej».
Tamu, jak ličyć palitołah, pahroza nikudy nie dziełasia:
«Šmat zastajecca haračych i nie vielmi haračych hałoŭ, jakija razvažajuć nad tym, što jany lepšyja za Pryhožyna. Razumniejšyja, bolš kiemlivyja, advažnyja i paśladoŭnyja. I jany zrobiać toje, čaho jon zrabić nie zdoleŭ. Ci, prynamsi, pasprabujuć. Ryzyka nikudy nie dziełasia. Pryčyny, jakija sparadzili pryhožynski miaciež, nie likvidavanyja».
Čytajcie jašče:
«Jon svaryŭsia na ludajedaŭ za ich niedastatkovy apietyt». Navalny nazvaŭ Strałkova palitviaźniem
U Rasii ŭklučyli ŭ śpis «inšaahientaŭ» jašče 9 čałaviek, siarod ich Dudź i Šulman
Mahčyma, razhortvajecca novaja apieracyja začystki. Infarmacyja pra zatrymańni prychodzić z roznych rehijonaŭ krainy2
Kamientary
nikomu nie raju źviartać uvahu na hetaha "palitołaha"