Heta inšaje? Na čym padstaŭlajuć udzielnikaŭ fłešmobu «Nado!»

Prezidenckija vybary 2020 hoda supravadžalisia ŭsimi mahčymymi mirnymi formami pratestu. Harady chutka zapałanili nadpisy i murały, u jakich biełarusy vykazvali svaju niazhodu ź biaskoncaj represiŭnaj uładaj Łukašenki, vyśmiejvali vyniki sfalsifikavanaha hałasavańnia i patrabavali svabodnaj Biełarusi. 

Užo pieršaja noč supraćstajańnia na stancyi mietro «Puškinskaja» ŭ Minsku skončyłasia hibiellu pratestoŭca. Alaksandr Tarajkoŭski byŭ zastreleny ŭ noč na 10 žniŭnia siłavikami, choć stajaŭ niaŭzbrojeny, z padniatymi rukami. 

Miesca zabojstva, dzie vyras narodny miemaryjał, stała trahičnym simvałam hieraizmu i zmahańnia. Jano pryciahvała biełarusaŭ nie tolki kab zaśviedčyć svoj smutak, ale i kab vykazać abureńnie hvałtam i žorstkaściu biełaruskaha režymu. 

Pobač z drobnymi nadpisami «3%» dy «Žyvie Biełaruś», na bruku chtości ŭ pieršyja dni paśla vybaraŭ vialikimi litarami napisaŭ «Nie zabudziem!» 

Pavialičyć

Režym Łukašenki spačatku, zdavałasia, adstupiŭ pad ciskam usienarodnaha ŭzdymu, ale paśla znajšoŭ u sabie siły adnu za adnoj zacisnuć usie mahčymaści i zadušyć pratest. 

Ludziej stali zapužvać, pravodzić pakazalnyja akcyi zastrašvańnia i ŭvodzić usio bolš žorstkija praktyki. Tak, u kancy vieraśnia 2020 hoda, adkazvajučy na pytańnie pra toje, što moža pahražać tym, chto piša na asfalcie, namieśnik prakurora Frunzienskaha rajona Minska Alaksandr Bašan zajaviŭ, što ich aŭtary darma ličać, što ich nie znojduć. 

Jon paviedamiŭ, što aŭtaraŭ nadpisaŭ jany źbirajucca pryciahvać jak da administracyjnaj, tak i da kryminalnaj adkaznaści, a taksama buduć spahaniać štrafy. Sudzić źbiralisia za chulihanstva, naŭmysnaje źniščeńnie abo paškodžańnie majomaści, apahańvańnie zbudavańniaŭ i psavańnie majomaści.

Dla aŭtaraŭ tych nadpisaŭ, jakija, na dumku režymu nosiać «cyničny charaktar», «padryvajuć hramadskija asnovy, maral, maralnaść» abo «zaklikajuć da parušeńnia paradku», prakuror pahražaŭ terminami ad 3 da 10 hadoŭ turemnaha źniavoleńnia.

«Cyničnymi nadpisami» ŭ vačach sudździaŭ biez tłumačeńnia sutnaści cynizmu, viadoma, stanavilisia «3%», «Sychodź» ci «Žyvie Biełaruś».

Pavialičyć

Aŭtaraŭ dvuch vialikich nadpisaŭ «Nie zabudziem!» na Puškina sapraŭdy adšukali i stali sudzić. Im stavili ŭ vinu chulihanstva (častka 2 artykuła 339 KK) i naŭmysnaje źniščeńnie abo paškodžańnie majomaści (častka 2 artykuła 218 KK).

Pa viersii śledstva, Ihar Samusienka, Dzianis Hrachanaŭ i Uładzisłaŭ Hulis nočču 9 vieraśnia «nanieśli nadpis čyrvona-biełaha koleru na tratuarnuju plitku, tym samym ździejśniŭšy psavańnie majomaści».

Pavialičyć

Nadpis «Nie zabudziem!» abvinavačańnie paličyła «cyničnym, jaki abražaje pačućci hramadzian, demanstruje hrebavańnie maralnymi kaštoŭnaściami, nakiravanaj na pryčynieńnie škody hramadskamu paradku i hramadskaj maralnaści». Z tym ža pośpiecham cyničnymi možna było b pryznać i nadpisy «Za Radzimu!» ci «Sa śviatam!» — niama sumnieńniaŭ, što łukašenkaŭskija prakurory i sudździ dali b rady i takomu zadańniu, kali b jano było pastaŭlena.

Spravu pa druhim artykule ab źniščeńni majomaści, praŭda, spynili praz adsutnaść złačynnaha dziejańnia. Suma škody «Harramaŭtadara» pamienšała z 10 tysiač biełaruskich rubloŭ da 255 rubloŭ.

Dziela atrymańnia hetych hrošaj za niekalki dzion da suda kamunalniki pryciahnuli niekalkich adzinak techniki i rabili vyhlad, što admyvajuć daŭno zafarbavany nadpis «Nie zabudziem!» z bruku.

Pavialičyć

8 śniežnia sud Frunzienskaha rajona Minska prysudziŭ za adzin z nadpisaŭ «Nie zabudziem!» paŭtara hoda «chatniaj chimii» Maryi Babovič, a Maksima Paŭluščyka pryhavaryŭ da dvuch hadoŭ kałonii ahulnaha režymu.

U toj ža dzień i ŭ tym ža sudzie vynieśli prysudy i za druhi nadpis. Paŭtara hoda «chimii z nakiravańniem» atrymali Dzianis Hrachanaŭ i Ihar Samusienka, a Uładzisłavu Hulisu prysudzili dva hady kałonii strohaha režymu.

Usie piać apielacyjnych skarhaŭ pakinuli biez zadavalnieńnia, a prysudy — u sile.

Heta byŭ adzin z samych hučnych vypadkaŭ pa padobnych spravach, zaklikanych zastrašyć nasielnictva vykazvacca suprać ułady choć jakim, samym biaskryŭdnym sposabam. Hieahrafija sudoŭ adnoj stalicaj nie abmiežavałasia.

Nie mienš absurdnaje sudzilišča adbyłosia i ŭ Mahilovie. 18-hadovy Siarhiej Turunaŭ u noč na 15 žniŭnia, žadajučy vykazać niazhodu z falsifikacyjaj narodnaha volevyjaŭleńnia, nanios na asfalt biełaj farbaj nadpisy «3%», «Dzie 80%?» i ličbu 80 u znaku serca ŭ mikrarajonie «Jubilejny». Jaho na miescy zatrymaŭ staršy praparščyk vajskovaj čaści № 6713 unutranych vojskaŭ MUS Jaŭhien Marčanka, jaki jakraz viartaŭsia z pracy.

Pavialičyć

Tady jon abyšoŭsia tolki štrafam za znachodžańnie pjanym u hramadskim miescy, a inšych pretenzij da chłopca nie mieli. Ale kali represiŭnaja mašyna zapracavała na poŭnuju moc i byli adpracavanyja novyja karnyja praktyki, to ŭ kancy listapada 2020 hoda pra jaho pryhadali znoŭ. 

Chłopca abvinavacili ŭ psavańni majomaści, choć da taho momantu farba daŭno zmyłasia. Darožna-mastavoje pradpryjemstva zajaviła pazoŭ da jaho ab škodzie amal na 57 rubloŭ.

11 sakavika 2021 hoda sud Leninskaha rajona Mahilova prysudziŭ Turunava da 2 miesiacaŭ aryštu i vypłaty škody kamunalnamu pradpryjemstvu.

Zychodziačy z hetaj sudovaj praktyki, zaŭziatym prychilnikam Łukašenki, jakija pišuć «Nado!» na asfalcie, mahło b pahražać da pary hadoŭ kałonii strohaha režymu. I navat kali ichni nadpis sud nie paličyŭ by cyničnym (choć chto viedaje, što nasamreč mieli na ŭvazie pa hetym «treba» jahonyja aŭtary), to za psavańnie kamunalnaj majomaści ich čakali b nie mienš jak niekalki miesiacaŭ aryštu.

Ale ž u Biełarusi siońnia Kryminalny kodeks pracuje tolki ŭ adzin bok.

Nahadajem, što ŭłady Biełarusi zapuścili fłešmob: rabotnikaŭ i vajskoŭcaŭ zmušajuć prasić Łukašenku bałatavacca na 7-my termin. Rašeńnie daŭno pryniataje, masiravanaja prapahanda idzie na poŭnuju moc daŭno, ale robicca vyhlad, što heta paddanyja prosiać Alaksandra Łukašenku pra heta jak pra vialikuju łasku.

• 6
• 0
• 3
• 4
• 0
• 1
• 29
• 0