«Dajcie telefon i pakažycie sacsietki». Litoviec raskazaŭ, jak jaho dapytvali i praviarali na biełaruskaj miažy

Saŭlus apošnija hady časta jeździć u Biełaruś, bo jaho dziaŭčyna rodam adtul, i jany časta naviedvali jaje siamju ŭ Biełarusi. Dasiul nivodny ź jahonych vizitaŭ nie zajmaŭ šmat času, ale hetym razam jamu daviałosia čakać niekalki hadzin i prajści vielmi niepryjemny dopyt, mety jakoha jon dahetul nie viedaje. Na dumku Saŭlusa, dapytvać jaho mahli nie pamiežniki, a supracoŭniki biełaruskaha KDB.

Paśla pravierki pašparta na miažy dakumient Saŭlusu nie viarnuli, skazali čakać. Praz 20 chvilin uvajšoŭ małady aficer u formie. Jon nie nazvaŭsia, ale skazaŭ Saŭlusu: «Nam treba pahavaryć» i advioŭ litoŭca ŭ asobny pakoj, dzie nie było inšych ludziej. 

Aficer spytaŭ Saŭlusa, ci maje jon telefon, a kali toj adkazaŭ stanoŭča, jamu skazali «davaj telefon» i patłumačyli heta tym, što sa studzienia dziejničajuć stražejšyja pravierki.

Saŭlus razbłakavaŭ telefon i pieradaŭ jaho supracoŭniku ŭ formie. Toj staŭ raspytvać, jakimi sacyjalnymi sietkami karystajecca litoviec.

«Ja kažu, što ŭ asnoŭnym Facebook, ale maju i inšyja. Ja ŭbačyŭ, što Facebook, viadoma, užo adkryli na telefonie. My siadzieli adzin nasuprać adnaho, ja nie bačyŭ, što jon robić u maim telefonie. Jon praviaraŭ moj akaŭnt Facebook i adnačasova zadavaŭ pytańni», — raspaviadaje Saŭlus. 

Mužčyna kaža, što choć razmaŭlać ź biełaruskim aficeram jamu było niepryjemna, ale ton hutarki byŭ vietlivym. Aficer zadaŭ niekalki prostych pytańniaŭ: jak jaho zavuć, čamu jon jedzie ŭ Biełaruś i jak doŭha tut prabudzie. Taksama aficer dadaŭ: «Spadziajusia, u vašym telefonie nie budzie ničoha antybiełaruskaha». 

«Potym stali pytacca, dzie žyvu, dzie pracuju. Ja raskazaŭ pra svaju śpiecyjalnaść, ale, vidać, jamu heta było niecikava, bo ja prosty pracoŭny. Potym jon spytaŭ mianie pra mierkavańni maich kaleh na pracy, pra ludziej… Uvohule pra toje, što adbyvajecca apošnim časam. Jon nie skazaŭ, što mienavita, ale, dumaju, zrazumieła, što jon pytaŭsia pra nastroi nakont Ukrainy», — zhadvaje jon. 

Paźniej aficer spytaŭsia, u jakim horadzie žyvie Saŭlus, što ludzi ŭ Litvie havorać pra palityku. «Ja musiŭ adkazać toje, što jany chacieli pačuć. Ja adkazaŭ, što mnie heta niecikava, ja ničoha nie viedaju, i hetak dalej», — kaža litoviec. 

Pavodle jaho, usia razmova doŭžyłasia da 15 chvilin. Saŭlus kaža, što imknuŭsia nie pakazvać strachu, bo heta pryviało b tolki da novych pytańniaŭ. Jon ličyć, što aficer pracavaŭ na KDB. Paśla hetaha vypadku, jaki adbyŭsia letam, jon bolš nie jeździć u Biełaruś. 

«Jany pytalisia, kudy my jedziem, na jaki adras. Ja skazaŭ, i jon mnie namiaknuŭ, maŭlaŭ, my možam zajechać, pahladzieć, ci sapraŭdy vy tudy jeździli», — kaža Saŭlus. 

LRT znajšoŭ u sacyjalnych sietkach inšyja padobnyja śviedčańni: litoŭcy raskazvali, što sutykalisia z praciahłymi pravierkami na miažy. Adnak šmat jakija litoŭcy adznačajuć, što ni z čym padobnym nie sutykalisia i što ichnyja pajezdki adbyvajucca biez prablem. 

«Isnujuć takija mietady nadhladu, jak pryviadzieńnie ludziej u peŭnyja pamiaškańni, pytańni ad supracoŭnikaŭ biez formy, — jość infarmacyja, što takija rečy adbyvajucca», — skazaŭ LRT Hiedrus Mišucis, pres-sakratar Słužby achovy dziaržaŭnaj miažy Litvy. 

Pavodle jaho, intensiŭnaść pravierak roznaja, jość pieryjady, kali jany stražejšyja, zadajuć niezvyčajnyja pytańni pra palityku, praviarajuć telefony. Pavodle słovaŭ Hiedrusa Mišucisa, žorstkaść pravierak niepradkazalnaja, ale možna mierkavać, što jana zaležyć ad unutranaj palityki Biełarusi. 

Mišucis dadaŭ, što zakryćcio ŭ žniŭni dvuch punktaŭ propusku pryviało da značnaha skaračeńnia kolkaści padarožnikaŭ u Biełaruś. Praz tydzień kolkaść litoŭskich hramadzian, jakija vyjazdžajuć u Biełaruś, skaraciłasia na 37%, a na pačatku vosieni ŭpała ŭžo na 54% u paraŭnańni ź situacyjaj da zakryćcia punktaŭ propusku.

Na dumku Departamienta dziaržaŭnaj biaśpieki Litvy, kožny vypadak pravierki na miažy — heta novaja mahčymaść dla biełaruskaj vyviedki padabrać kandydata dla vierbavańnia z dapamohaj šantažu i psichałahičnaha cisku. Taki padbor niemahčymy biez zboru piersanalnaj infarmacyi, nieabchodnaj dla składańnia ahulnaj karciny sacyjalnaha stanovišča, suviaziaŭ i palityčnych pohladaŭ čałavieka.

• 5
• 0
• 5
• 10
• 1
• 1
• 48
• 0