Bjuci-srodki dla vahiny: što heta takoje i ci ŭchvalaje hiniekołah
Kaśmietyka dla intymnych zon? Nie pavierycie, ale isnuje i takoje. Pahladzieli, što pradstaŭlena na rynku takich srodkaŭ i jak heta možna kupić u Biełarusi, a taksama spytali ŭ hiniekołaha, nakolki heta biaśpiečna.
Pamada
Jašče ŭ 2017-m kampanija V Magic stvaryła pradukt Feminine Lips Stick. Jon blizki chutčej da hihijeničnaj pamady: taki balzam musić supakojvać skuru ŭ zonie bikini, kali jana suchaja i vy adčuvajecie na skury razdražnieńnie. Pa abiacańniach vytvorcaŭ, pamada dla vahiny musić uvilhatniać skuru i palapšać pach ad jaje. Kažuć, što hety pradukt jašče i palapšaje seksualnaje žyćcio.
Kali vy natchnilisia apisańniem, daviadziecca zamaŭlać pamadu z-za miažy, bo na ajčynnych markietpłejsach jaje nie pradajuć. Anałahičnyja pradukty na Amazon kaštujuć ad 80 dalaraŭ.
Pałačka «cnatlivaści» dla skaračeńnia ścienak vahiny
Heta tavar možna zakazać na Ozon pa košcie kala 25 rubloŭ za štuku. Hetuju pałačku prapanujuć dla «žančyn, jakija spaznali radaść maciarynstva», i akramia jaje, dla zvužeńnia vahiny vykarystoŭvajuć taksama kapsuły i śviečki.
Ale pałačka kitajskaj vytvorčaści — badaj, samy ekzatyčny varyjant takoj kaśmietyki na miažy ź miedycynaj. Składajecca jana z žamčužnaha parašku, talku, efirnaha masła barnieołu i tak zvanaj «travy hary Maduła». Pošukavik nie daje adkazu na pytańnie, što ž heta za trava, i treba vielmi mocna daviarać vytvorcu, kab vykarystoŭvać u intymnych zonach pradukty z nastolki dziŭnymi składnikami. Nie kažučy pra toje, što vykarystańnie talku źviazvajuć z ryzykaj raźvićcia raku jaječnikaŭ.
Vahinalnyja bliskaŭki
Heta žełacinavaja kapsuła ź bliskaŭkami, jakuju ŭstaŭlajuć u vahinu pierad pałavym kantaktam. Pad upłyvam kisłaha asiarodku kapsuła rastvarajecca, bliskaŭki — ci, inakš kažučy, hlitar — traplajuć u vahinu i paźniej adpaviedna ŭpryhožvajuć pałavyja orhany partniora. U sacsietkach jość śviedčańnie, što takaja kaśmietyka vydaje zdradnikaŭ:
«U znajomaj mužyk pryjšoŭ dachaty sa źziajučymi majtkami i čelesam, pryjšłosia sabrać rečy i iści źziać tudy, adkul pryjšoŭ».
Na pradstaŭlenych u Biełarusi markietpłejsach my nie znajšli taki tavar, a voś na zachodnich placoŭkach vahinalny hlitar možna zamović — naprykład, tut (ale heta aŭstralijski mahazin, tamu dastaŭka moža ŭlacieć u kapieječku).
Jašče ŭ 2017 hodzie, adnak, daktary skieptyčna vykazvalisia pra vahinalny hlitar. Naprykład, aŭtarytetnaje brytanskaje vydańnie Independent spasyłałasia na hiniekołahaŭ, jakija śćviardžali, što takija bliskaŭki mohuć parušyć bakteryjalny bałans u vahinie i takim čynam spryjać bakteryjalnamu vahinozu, małočnicy abo zapaleńniu. Bolš za toje, bliskaŭki mohuć vyklikać malusieńkija drapiny na ścienkach vahiny, što jašče bolš budzie spryjać zapaleńniu.
Farba dla vałos
Havorka, viadoma, idzie pra łabkovyja vałasy. Lepš nie vykarystoŭvać na ich zvyčajnuju farbu dla vałos na hałavie — jana časta źmiaščaje składniki nakštałt pierakisu vadarodu ci amijaku, i dalikatnaja skura na hienitalijach moža adkazać na takuju chimiju paškodžańniami ci razdražnieńniem.
U Biełarusi znajści farbu dla łabkovych vałos niaprosta, ale vy možacie jaje zamović na zamiežnych markietpłejsach. Naprykład, voś varyjant takoj farby z Amazon. Srodak kaštuje 16 dalaraŭ, adcieńni na vybar — błandynka, brunetka ci šatenka. U apisańni pradukta kažuć, što ŭ hetaj farbie šmat naturalnych kampanientaŭ i joj z zadavalnieńniem karystajucca i šmat mužčyn. Akramia łabka, jany nanosiać farbu na baradu i vałasy na hrudziach. Jak mužčyny, tak i žančyny vykarystoŭvajuć farbu dla łabkovych vałos, kab pazbavicca sivizny ŭ hetaj vobłaści.
Dadamo, što najbolš biaśpiečna było b zapisacca ŭ sałon, jaki robić takoje farbavańnie, a nie spraŭlacca ź im doma.
Chajłajtar
Hety pradukt, hledziačy pa abiacańniach markietołahaŭ, nadaje źziańnia skury ŭ intymnych zonach, vyraŭnoŭvaje jaje koler i dapamahaje praduchilać uźniknieńnie ciomnych kropak i inšych defiektaŭ skury.
Nabyć chajłajtar ci luminajzier dla vahiny (roźnica pamiž dvuma typami srodkaŭ nievialikaja) možna, naprykład, voś tut. U składzie — ekstrakty čarnicaŭ, buziny, ablapichi i inšych raślin.
Paryk dla łabka
Kali jość vałasy, to čamu b nie vykarystoŭvać paryk? Takija paryki, inakš ich nazyvajuć «mierkiny», źjavilisia jašče ŭ XV stahodździ. U čas, kali z hihijenaj usio było drenna, mierkinami karystalisia prastytutki: kab nie pieranosić łabkovyja vošy i chavać prykmiety vienieryčnych chvarobaŭ, jany halili łabok i źviartalisia pa dapamohu da mierkinaŭ.
Ciapier mierkiny vykarystoŭvajuć u tym liku i aktrysy, kali zdymajucca ŭ paścielnych scenach. A na Tydni mody-2018 u Ńju-Jorku mierkiny ŭvohule byli pradstaŭlenyja na podyumie.
Nabyć mierkin možna na ŭsio tym ža Amazon. Ceny, praŭda, kusajucca: naprykład, za voś hety paryk vam daviadziecca addać amal 64 jeŭra.
Što skaža hiniekołah?
Heta nie poŭny śpis bjuci-srodkaŭ dla vahiny, jakija jość u prodažy: pry žadańni možna znajści i masku dla skury, i balzam, jaki ŭvilhatniaje, i alej dla łabkovych vałos. Ale što pra cuda-srodki dumaje miedyk?
My źviarnulisia pa kamientar da Stanisłava Sałaŭja, akušera-hiniekołaha. Jon adznačaje, što tema vahinalnaj kaśmietyki mała daśledavanaja. Kali kazać pra dostup lekaŭ na rynak, jany prachodziać duža surjoznuju pravierku, kab było dakazana, što preparat sapraŭdy pracuje i nie niasie pahrozy. Što da kaśmietyki, u bolšaści krain jana nie tak mocna rehulujecca.
Stanisłaŭ pryvodzić u prykład pracu kanadskich navukoŭcaŭ, jakuju jon nazyvaje adnoj z najpieršych sprobaŭ acanić upłyŭ na vahinalnaje zdaroŭje roznych kaśmietałahičnych i hihijeničnych padychodaŭ da dohladu intymnych zon. Praca pakazała cikavuju tendencyju — vykarystańnie takoj kaśmietyki časta asacyjujecca z pavieličeńniem kolkaści skarhaŭ.
«Heta nie značyć, što kali vy budziecie hetym karystacca, u vas buduć prablemy sa zdaroŭjem, ale heta zvanočak, na jaki varta źviarnuć uvahu. To-bok bieskantrolnaje ŭžyvańnie takich srodkaŭ — drennaja ideja.
Kali kazać pra farbu dla vałasoŭ, to ŭ hetym vypadku ryzyka minimalnaja i, kali niešta zdarycca, situacyju čysta tearetyčna možna budzie adnosna lohka vypravić. Ale ŭsio, što ŭvodzicca ŭsiaredzinu pochvy, jak minimum moža parušać pracu mikrafłory, a heta pavialičvaje ryzyku infiekcyjnych uskładnieńniaŭ. Katastrofy nie budzie, ale možna atrymać peŭnyja prablemy — chacia jany i lohka vypraŭlajucca, ale heta treba ŭličvać», — tłumačyć miedyk.
Tearetyčna možna razumieć miechanizm, jak heta pracuje i moža paŭpłyvać na zdaroŭje, ale pakul heta nie pravierana, my nie možam być u hetym upeŭnienyja. Kanadcy pakazali, što heta nie tak biaśpiečna. Bralisia ahulnyja danyja, a nie pa kankretnych vytvorcach i tavarach, ale daśledavańnie pakazvaje, što takija tavary patencyjna mohuć być škodnyja, i treba vielmi dobra padumać, ci možam my niešta vykarystoŭvać.
Datyčna pałački dla zvužeńnia pochvy — jaje adnaznačna nie varta vykarystoŭvać, kaža doktar: «Abo jana nie budzie mieć zajaŭleny efiekt, abo moža nanieści paškodžańni. Miedycyna ŭ hetym płanie zrabiła vialiki krok napierad, i jość mietodyki, jakija dajuć taki ž efiekt, ale kantralavany i biaśpiečny. Isnujuć tyja ž łaziernyja technałohii, jakija dazvalajuć zvuzić vahinu, ale pracu vykonvaje doktar, jaki razumieje, što jon robić. Hetaja mietodyka vyprabavanaja, a nie prosta niejki šamanizm.
U hetym płanie da ŭsiaho novaha ja staŭlusia duža naściarožana, heta chutčej patencyjna niebiaśpiečna. Ale pakul nie buduć praviedzienyja daśledavańni, my nie možam rabić pra heta dakładnyja vysnovy».
Varta ŭsio praviarać, bo ŭ hiniekałohii isnuje šmat mifaŭ, jakija ŭźnikli na biazdokaznaj bazie. Sałaviej pryvodzić prykład — staŭleńnie da strynhaŭ. Bolšaść hiniekołahaŭ postsavieckaj škoły skažuć, što strynhi spryjajuć infiekcyjam, prosta tamu što hetaja madel bializny byccam maje takuju kanstrukcyju. Adnak daśledavańni pakazvajuć, što reč uvohule nie ŭ madeli bializny, a ŭ materyjale, i ryzyku zapaleńnia ŭ pochvie pavialičvaje sintetyčnaja bializna.
«Naša Niva» — bastyjon biełaruščyny
PADTRYMAĆKarotkačasovaje i doŭhačasovaje adnaŭleńnie cnatlivaści. Ceny ŭ Minsku i mierkavańnie psichołaha
Kamientary