Andrej Dźmitryjeŭ u kałonii vučycca pisać levaj rukoj i vučyć ispanskuju movu
Eks-kandydat u prezidenty Andrej Dźmitryjeŭ piša z kałonii: «Murakami, Frejd i Pjuza z «Chrosnym baćkam» stali tut majoj kampanijaj».
Andrej Dźmitryjeŭ — adziny ź piaci kandydataŭ u prezidenty na vybarach 2020 hoda, jaki ciapier znachodzicca za kratami.
Termin u paŭtara hoda źniavoleńnia były kiraŭnik hramadkaj kampanii «Havary praŭdu» adbyvaje ŭ navapołackaj kałonii, viadomaj tym, što tam trymajuć byłoha staršyniu «Biełhazprambanka», taksama ŭdzielnika vybaraŭ 2020 hodu Viktara Babaryku, i aktyvistaŭ apazicyi. Pra Andreja Dźmitryjeva raskazaŭ były kaleha palityka, jaki ličyć siabie «dastatkova abaznanym» u jahonych spravach.
«Ahulnaja situacyja ŭ jaho takaja: prajšoŭ praz roznaje, ale ciapier spravy naładžvajucca. Jon pryzvyčaiŭsia, da jaho pryzvyčailisia. Pracuje na vytvorčaści pa zdabyčy kalarovych mietałaŭ z kabielaŭ — ačyščajuć staryja pravady ad izalacyi.
Nakolki viedaju, hetym šmat u jakich kałonijach zajmajucca, voś i jamu takaja praca dastałasia. Praca nialohkaja, ale jon čałaviek pracavity, karpatlivy, zasvoiŭ i hetuju. Płan vykonvaje», — raskazała Radyjo Svaboda krynica.
Pavodle byłoha kalehi Andreja Dźmitryjeva, toj pry dapamozie rehularnych fizičnych praktykavańniaŭ padtrymlivaje dobruju fizičnuju formu, u volny čas šmat čytaje i zajmajecca samaŭdaskanaleńniem.
«Schudnieŭ, ale adčuvaje siabie narmalna, na zdaroŭje nie skardzicca. Padciahvajecca na turniku, adciskajecca, zajmajecca himnastykaj. U volny čas šmat čytaje, vučycca. Tam dobraja biblijateka, dyk jon heta vykarystoŭvaje jak maha lepiej. Ź biełaruskich knih pračytaŭ «Movu» Marcinoviča i knihi Horvata, šmat čytaje zamiežnaj litaratury, pryčym nia tolki mastackaj. Paviedamiŭ paŭžartam, što ciapier «Murakami, Frejd i Pjuza z «Chrosnym baćkam» stali tam jahonaj kampanij.
Jašče viedajem, što Andrej zajmajecca samaŭdaskanaleńniem: vučycca pisać levaj rukoj. Navošta jamu heta, nieviadoma, ale voś jon taki. Taksama pa samavučycielach vučycca šachmatam i vyvučaje ispanskuju movu.
Karaciej, maksimalna karysna vykarystoŭvaje čas, jaki davodzicca pražyvać za kratami. Jamu vychodzić na volu ŭ kastryčniku naleta. Jahonaja kamanda miarkuje, što ź im usio budzie dobra», — padzialiŭsia źviestkami pra Andreja Dźmitryjeva jahony siabra.
Andreja Dźmitryjeva zatrymali ŭ studzieni 2023 hodu. Palityka abvinavacili va ŭdziele ŭ masavych pratestach, a taksama ŭ suviaziach z Zachadam.
U krasaviku jaho asudzili na paŭtara hoda kałonii pavodle 1 častki 342 artykułu Kryminalnaha kodeksa («Aktyŭny ŭdzieł u dziejańniach, jakija hruba parušajuć hramadzki paradak») i paśla marnaj sproby abskardzić prysud adpravili ŭ kałoniju № 3.
U traŭni pamierła maci Andreja Dźmitryjeva, ale na pachavańnie palityka nie adpuścili.
Brat udavy Zielcara: Kadebisty išli ŭ kvateru pa mianie1
Kamientary
Ale ci dadaść źniavoleńnie papularnaści Dźmitryjevu? Nie ŭpeŭnieny. Bo jahonaja prahrama vyhladała jak "Za ŭsio dobraje i suprać ŭsiaho drennaha", što va ŭmovach 2020 ŭžo było nia vielmi akutalna, a zaraz tym bolš.
Biełaruś čakaje prynamsi druhaja stadyja revalucyi. Ale vierahodna i hramadzianskaja vajna, bo za 3 hady žorstkich represij režym stvaryŭ sacyjalnuju bazu dla jaje abodźvuch bakoŭ. I asoby kšatłtu Dźmitryjeva ŭ hety čas nia vielmi zapatrabavnyja. Ale ŭ vypadku pieramohi i nadta ciažkich nastupnych reform ŭ Dźmitryjeva zastajecca šans stać druhim Kvaśnieŭskim.