U Kirkorava byŭ anšłah na kancercie ŭ Minsku. Aburylisia navat jabaćki
Niadaŭna ŭ Filipa Kirkorava adbyŭsia kancert u Minsku. Napiaredadni šou artyst zapościŭ u storys svaju afišu z podpisam «Sold Out». Ale pryjezd śpievaka, jaki cisnuŭ ruku Łukašenku i naviedvaŭ rasijskich sałdat u špitali, raskrytykavali jabaćki.
U dzień kancerta Kirkoraŭ zapisaŭ videa na fonie aficyjnaha biełaruskaha hierba ŭ Nacyjanalnym aeraporcie «Minsk». Jon źviarnuŭsia da fanataŭ: «Narešcie majo šou ŭ Minsku, u maim lubimym Minsku, na biełaruskaj ziamli».
Ale, na dziva, źjaviłasia šmat aburanych kamientaryjaŭ ad prychilnikaŭ Łukašenki: «Baćka, jak ty moh dapuścić hety cud u piorach u Biełarusi?», «Fila, małajčyna, što pryjechaŭ u Biełaruś, ale nie ŭzdumaj napialić kałhotki i abviešać siabie piorami. A to Baćka vypra, źniasłavišsia».
Jabaćki byli niezadavoleny, bo ličać Kirkorava, jak sami pišuć, «rassadnikam homaseksualizmu». Darečy, u minułym hodzie siarod vorahaŭ artysta była Volha Bondarava — jana sprabavała skasavać jaho kancerty i navat źbirała podpisy za ich admienu. Minharvykankam tady paabiacaŭ joj u aficyjnym adkazie — Kirkoraŭ nie budzie vykonvać pieśniu «Maryja Mahdalena» ŭ Minsku, a ŭpraŭleńnie kultury Minharvykankama praviadzie manitorynh kancerta. Ale šou tady nie pabačyli ni ŭ Minsku, ni ŭ Hrodnie. Pa aficyjnaj viersii — heta adbyłosia «ŭ suviazi ź niepieraadolnymi abstavinami, jakija pieraškadžajuć dastaŭcy techničnaha abstalavańnia i artystaŭ».
Ciapier u kamientaryjach biełarusy nahadali Kirkoravu admienu kancerta ŭ 2020 hodzie z-za karanavirusa. Tady nie ŭsie fanaty viarnuli kvitki, niechta da apošniaha čakaŭ novyja daty šou i ŭ vyniku straciŭ hrošy. Dla kahości heta stała nahodaj ihnaravać novyja kancerty śpievaka.
Biełaruskija hledačy nahadali Kirkoravu i pra toje, što padčas pandemii jon namiakaŭ žurnalistam, što zaraziŭsia kavidam padčas «Słavianskaha bazaru» ŭ Viciebsku. A tady Łukašenka asabista ŭručaŭ artystu ŭznaharodu «Praz mastactva — da miru i ŭzajemarazumieńnia».
U tyktoku, dzie źjaviłasia šmat videa ź jubilejnaha šou «Gold. The Greatest Hits», biełarusy taksama abvinavačvali Kirkorava ŭ prapahandzie «nietradycyjnych kaštoŭnaściej».
Zdajecca, prablemy źjavilisia jašče na etapie rekłamy kancerta, bo servis prodažu kvitkoŭ kvitki.by byŭ vymušany adklučyć u svaim akaŭncie mahčymaść kamientavać videa, u jakim Kirkoraŭ anansuje jubilejnaje šou.
Zrešty, poŭnuju zału ŭ Pałacy Respubliki śpiavak sabraŭ. Kvitki kaštavali ad 95 da 350 rubloŭ.
Atrymałasia, što Kirkoraŭ, jaki zaŭsiody padtrymlivaŭ Łukašenku, akazaŭsia ŭ niamiłaści ŭ jabaciek. Cikava i toje, što rasijskija z-patryjoty taksama chejciać artysta, niahledziačy na toje, što jon padtrymaŭ vajnu — śpiavak navat naviedvaŭ u špitali ŭ Krymie paranienych rasijskich sałdat, nazyvaŭ ich hierojami i abiacaŭ im bilety na svajo šou.
«Mužyki vajujuć, addajuć žyćcio, a ŭ jaho prablema, što b nadzieć, pasaromieŭsia b», — napisali jamu kamientatary, kali Kirkoraŭ zapisaŭ rekłamnaje videa z Rabanne H&M.
Zdajecca, Kirkoraŭ dobry prykład taho, jak składana siadzieć na niekalkich kresłach adnačasova.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary