Darahija žančyny! Što nosiać niaviestki Łukašenki i kolki kaštuje ich harderob
Hadzińniki pa canie mašyny i sukienki koštam ź siaredni zarobak biełarusa. Jakim brendam addajuć pieravahu žonki Viktara i Dźmitryja Łukašenkaŭ?
Alaksandr Łukašenka — patryjarch vialikaj siamji. U palityka troje synoŭ, dvoje ź jakich daŭno ŭ šlubie i majuć svaich dziaciej. Siamiejniki, jak i sam Łukašenka, staranna vybirajuć adzieńnie, u jakim źjaŭlajucca na publicy — čaściej za ŭsio na fatahrafijach ŚMI jany vyhladajuć padkreślena prosta.
Adnak nam udałosia razhledzieć niekalki pradmietaŭ, košt jakich ździŭlaje — usie hetyja rečy my sustreli ŭ harderobach niaviestak Łukašenki.
Lilija vałodaje art-halerejaj, Hanna piša pieśni, jakija ŭschvalajuć śviokra. Niaredka žančyny pieściać siabie darahimi brendami.
Lilija Łukašenka i darahija hadzińniki
Lilija Łukašenka (u dziavoctvie — Somava) naradziłasia ŭ vioscy Ryžkavičy Škłoŭskaha rajona Mahiloŭskaj vobłaści, dzie prajšło dziacinstva i Viktara Łukašenki. Tam jany i paznajomilisia.
Ažanilisia maładyja ludzi, kali Lilii było 19, a Viktaru — 23. U 1998 hodzie ŭ pary źjaviŭsia pieršyniec — dačka Viktoryja. Z časam u siamji naradziłasia jašče troje dziaciej: Alaksandr, Valeryja i Jarasłaŭ.
Lilija skončyła Minski piedahahičny ŭniviersitet i pačała budavać karjeru. U 2000-m, paśla pieršaha dekretu, jana stała pracavać śpiecyjalistam u «Biełaruskich mastackich promysłach». Adnak nieŭzabavie ŭ jaje znajšłasia bolš prestyžnaja «padpracoŭka». U 2012 hodzie žurnalist Pavieł Šaramiet apublikavaŭ rasśledavańnie, u jakim havaryłasia, što niaviestka Łukašenki ŭznačalvała minskaje pradstaŭnictva kiprskaj kampanii Eastleigh Trading, jakaja naležyć biznesmienu Uładzimiru Piefcijevu. U 2017 hodzie źjaviłasia infarmacyja, što Lilija Łukašenka zajmaje vysokuju pasadu ŭ sierbskaj kampanii-zabudoŭščyku Dana Holdings.
Ciapier Lilija kiruje mastackim sałonam «ArtChaos», raźmieščanym u handlovym centry «Dana Moł».
Žonka Viktara Łukašenki addaje pieravahu rečam, pašytym na zakaz, abo tym, brend jakich składana vyznačyć. Na mierapryjemstvach, jakija pravodziacca ŭ sałonie «ArtChaos», žančyna źjaŭlajecca ŭ kłasičnym adzieńni: błuzkach, kaściumach sa štanami.
U masie bieznazoŭnaj adziežy my zaŭvažyli sukienku italjanskaha modnaha doma Max Mara. Reč vyrablena z šoŭku i ŭpryhožana dekaratyŭnymi huzikami. Aktualny košt takoj — kala 570 dalaraŭ ZŠA.
A jakija aksesuary vybiraje Lilija? U 2016 hodzie, na vypusknuju liniejku svajoj dački, žančyna zachapiła sumku Classic Monogram Shopping Bag ad paryžskaha doma vysokaj mody Saint Laurent.
Košt madeli zaležyć ad hoda vypusku i varjirujecca ad $2650 da $2950.
Na hetaj ža liniejcy aŭtfit Lilii, mierkavana, dapaŭniaŭ hadzińnik toj ža marki, jakuju nosić jaje śviokar.
Lilii dastaŭsia załaty Patek Philippe 425J «Tegolino» koštam 14 500 dalaraŭ. Trochi dakłaŭšy, na hetyja hrošy možna nabyć novieńki aŭtamabil.
Darečy, hadzińnik samoha Łukašenki kaštuje nie našmat daražej — jaho Patek Philippe Calatrava 5120j siońnia možna nabyć za 17 tysiač dalaraŭ.
Značna tańniej abyšoŭsia žančynie aksiesuar, jaki ŭpryhožvaŭ jaje ruku na adkryćci vystavy ŭ halerei «ArtChaos».
Čorny hadzińnik padobny da chranohrafa ad šviejcarskaha brenda TechnoMarine. Košt takich, biez uliku źnižki, składaje ad 3300 da 3900 dalaraŭ.
U kalekcyi Lilii jość i kłasičnaja madel, jakaja nahadvaje hadzińnik Cartier Tank Solo.
Aksesuar ad francuzskaha doma kaliści nasili žonka prezidenta ZŠA Džona Kienedzi Žaklin i ŭlubionka miljonaŭ brytancaŭ pryncesa Dyjana.
Achvotnym nablizicca da asob najvyšejšaha śvietu daviadziecca vykłaści za takuju niestarejučuju kłasiku 7975 dalaraŭ.
Jak i muž, Lilija zachaplajecca motasportam. Dla zručnaści i biaśpieki bajkierka nadziavaje skurany kaścium.
Hanna Łukašenka i akulary Prada
Hanna Łukašenka (Haravikova ŭ dziavoctvie) — žonka siaredniaha syna Łukašenki Dźmitryja. Jany ažanilisia ŭ 2002 hodzie i vychoŭvajuć u šlubie traich dačok: Nastaśsiu, Darju i Alaksandru. Žančyna naradziłasia ŭ Škłovie.
U Hanny zabłytanyja siamiejnyja karani. Im pryśviačali cełyja rasśledavanńni. Na biełaruskaj estradzie jana vystupaje pad imiem Hanna Siałuk (SIArhiejeŭna ŁUKašenka).
Pra adnosiny Hanny sa śviokram viadoma niašmat, ale, miarkujučy pa kolkaści piesień, jakija žančyna jamu pryśviaciła, jany bolš čym ciopłyja. Siałuk uschvalała Łukašenku ŭ pieśniach «Šanujcie sapraŭdnaha mužčynu», «Ach, Alaksandr» i inšych. Asablivuju tvorčuju aktyŭnaść žančyna pačała prajaŭlać paśla 2020 hoda. Z hetaha času paetka paśpieła napisać 106 piesień (takuju infarmacyju davaŭ partał KYKY sa spasyłkaj na rejestr intelektualnaj ułasnaści).
Hanna ŭ blizkich adnosinach sa svajoj siastroj Taćcianaj Kułakovaj, jany razam byvajuć u zamiežnych pajezdkach. U 2017-m jany latali ŭ aŭstryjski Insbruk, paźniej amal miesiac praviali ŭ Italii, taksama adpačyvali ŭ Katary. Jak śćviardžaje Biełaruski rasśledavalnicki centr, tolki hetyja try padarožžy abyšlisia kampanii minimum u 350 tysiač dalaraŭ.
Da taho, jak aktyŭna zaniacca tvorčaściu, Hanna paśpieła papracavać u kampanii «Juniviest-M» i handlovym domie BiełAZa. Viadoma, što za svaju pracu tolki ŭ 2018 i 2020 hadach žančyna sumarna atrymała kala 100 tysiač dalaraŭ.
Aŭtfity Hanny možna acanić pa zdymkach, zroblenym na pratakolnych ci dabračynnych mierapryjemstvach. Tak, u kancy śniežnia 2022 hoda, padčas naviedvańnia dziciačaha sacyjalnaha prytułka ŭ Barysavie, Siałuk upryhožyła svoj łuk hadzińnikam, padobnym da limitavanaj madeli Defy Midnight šviejcarskaha brenda Zenith.
Aksiesuar upryhožany kamianiami pa korpusie i cyfierbłacie. Kaštuje takaja madel 11 800 jeŭra.
Jašče adzin cikavy hadzińnik my zaŭvažyli na siamiejnaj fatahrafii. Možna mierkavać, što na ruce Hanny krasujecca elitny brend, jaki, jakramia jaje, nosić i Lilija, i Alaksandr Łukašenka — Patek Philippe.
Madel Twenty~4 u šerym kolery na skuranym ramiani kaštuje 11753 jeŭra.
Lubić Siałuk i darahija akulary. Na fatahrafii, jakuju vykłała ŭ svaim instahram siastra Hanny, bačnaja madel ad Prada.
Na stokach takija akulary možna nabyć za 480 jeŭra.
Razhladajučy harderoby žančyn, adznačaješ, što, u adroźnieńnie ad mnohaha inšaha, darahija rečy ŭ Biełarusi ŭsio jašče nie zabaronienyja.
Stała viadoma pra aryšt minskaha chirurha z 17-hadovym stažam. Joj pahražaje ahromnisty termin za palityku5
Kamientary