«Ludzi saromielisia, što pryjechali. Jašče i kantrakt na hod padpisvaješ». Błohiery raskazali pra zakuliśsie kastynhu na praŭładnaje realici-šou

Siarod nastaŭnikaŭ-błohieraŭ prajekta zajaŭleny Uład Kabiakoŭ, Jaŭhien Aniehin i Volha Buzava.

A natchnialnik konkursu — Anatol Isačanka, staršynia Mahiloŭskaha abłvykankama.

Na vočny etap kastynhu ŭ Mahiloŭ zaprasili bolš za 100 čałaviek. Siarod ich byli jak nikomu nieviadomyja piersony z sotniaj padpisčykaŭ, tak i błohiery ź miljonnymi achopami. 

Volha Kraŭčuk, jakaja maje 45 tysiač padpisčykaŭ u instahramie i 7 tysiač u tyktoku, padzialiłasia, što jaje ździviła: na kastynhu byli ludzi, jakija saromielisia taho, što pryjšli na taki konkurs.

— Jany navat nie raspaviadali pra heta ŭ sacyjalnych sietkach. Nie skazali rodnym, kudy jeduć. Vielmi dziŭna, što jany nie mohuć pryznacca na publiku, im soramna, što jany pajechali na kastynh.

Sama jana nie prajšła na «Fabryku błohieraŭ», ale kryŭdaŭ na žury nie maje.

@baby_kravchuk #mohilev #biełaruś #kastinh #briest ♬ orihinalnyj zvuk - Kravčuk Olha

Mnohija papularnyja błohiery (a siarod ich jość i tyja, čyja aŭdytoryja ŭ instahramie i tyktoku składaje kala miljona padpisčykaŭ) sapraŭdy ci ŭvohule maŭčali pra svoj udzieł u kastynhu, ci pryśviačali hetamu niekalki storys.

Jašče adna błohierka ŭ svaim kanale raskazała pra ŭmovy ŭdziełu ŭ prajekcie, jakija šmat kaho ŭrazili.

— Vielmi žorstki kantrakt — heta mianie ździviła. Kantrakt ty padpisvaješ na hod i ceły hod ty pavinna rekłamavać sponsaraŭ (treba zrabić 24 rekłamy). Heta miasakambinat, małočnaja pradukcyja, šmat usiaho… Mahiloŭskija pradpryjemstvy. Ja takaja: ašaleć. Kožnamu ŭdzielniku hanarar 2 tysiačy rubloŭ. I za hetyja 2 tysiačy ty pavinna hod rabić rekłamu.

Dźvie tysiačy ŭdzielnikam płaciać za 10 dzion udziełu ŭ prajekcie. Rekłamu dadatkova nie apłačvajuć. Ale jość hałoŭny pryz, jakija atrymaje pieramožca — 20 tysiač rubloŭ.

Zrazumieła, što takaja prapanova niavyhadnaja dla błohieraŭ, jakija majuć dziasiatki, a to i sotni tysiač padpisčykaŭ. Niekatoryja ź ich adznačali, što źniać 24 rekłamy dla błoha — heta davoli vialiki abjom pracy. Zarabić na takoj kolkaści rekłamy jany mohuć u razy bolš. Ludzi aburalisia tym, što arhanizatary adrazu nie paviedamili pra takuju ŭmovu, bo inakš papularnyja błohiery b «1000 razoŭ padumali, ci varta iści na kastynh».

Dla paraŭnańnia: niadaŭna biełaruskaja błohierka (jana nie ŭdzielničała ŭ kastynhu), jakaja maje kala 150 tysiač padpisčykaŭ u instahramie, pradała miesiac rekłamy ŭ svaich storys za 10 tysiač rubloŭ.

Dziaŭčyna-kankursantka raspaviała, što dla ŭdziełu ŭ prajekcie adabrali 10 asnoŭnych udzielnikaŭ i 5 zapasnych na toj vypadak, kali niechta admovicca ci kahości vyhaniać (z zapasnymi kantrakty taksama padpisvajuć). Jana śćviardžaje, što adzin čałaviek užo admoviŭsia ad prapanavanaha miesca.

Cikava, što paŭdzielničać u «Fabrycy błohieraŭ» zachacieli navat nie ŭsie praŭładnyja błohiery. Naprykład, Natalla Kapuścina sa Žłobina, jakaja maje 55 tysiač padpisčykaŭ u tyktoku, raskazała, čamu navat zajaŭku padavać nie stała.

— Ja pahladzieła ludziej, jakija buduć tam: Aniehin, Buzava, Kabiakoŭ. Mianie heta adšturchnuła. Ja čakała, što ŭ składzie kamandy budzie chacia b niechta z prafiesijanałaŭ — prafiesijny žurnalist, šoŭmien… Nu niechta.

@nostalliak

♬ orihinalnyj zvuk - KapustinaNatalja

Praŭładnaja błohierka pryznałasia, što Jaŭhiena Aniehina, jaki budzie siarod nastaŭnikaŭ prajekta, jana ŭvohule zabłakavała praz toje, što jon stvaraje fejki.

— Ja zabłakavała jaho i adpisałasia paśla taho, jak pabačyła fejkavuju navinu pra toje, što ŭ Žłobinie adkryŭsia novy handlovy centr. I hetaja navina ŭzbudaražyła ludziej, bo ŭ mianie potym usie pytalisia: «Kapuścina, što ŭ vas tam novaje ŭ Žłobinie adkryłasia takoje krutoje i cikavaje?»

Zdymki realici-šou «Fabryka błohieraŭ» projduć z 22 pa 30 śniežnia.

• 1
• 0
• 9
• 7
• 1
• 0
• 0
• 0