Inviestary śćviardžajuć, što Ranałdu, jaki rekłamavaŭ źviazanuju z Binance kalekcyju NFT-tokienaŭ, padšturchnuŭ ich da inviestycyj, jakija prynieśli im straty.
Hrupa inviestaraŭ padała pazoŭ suprać futbalista Kryšcijanu Ranałdu z patrabavańniem vypłacić bolš za 1 młrd dalaraŭ u jakaści kampiensacyi za rekłamu najbujniejšaj kryptabiržy śvietu Binance, piša Bi-bi-si.
Inviestary śćviardžajuć, što Ranałdu, jaki rekłamavaŭ źviazanuju z Binance kalekcyju NFT-tokienaŭ, padšturchnuŭ ich da inviestycyj, jakija prynieśli im straty.
U listapadzie 2022 hoda Binance pačała pradavać svaju pieršuju kalekcyju NFT-tokienaŭ (ličbavych tvoraŭ mastactva, stvoranych z dapamohaj technałohii błokčejna), jakija byli virtualnymi statuetkami Ranałdu. Futbalist kazaŭ, što takim čynam choča padziakavać svaim prychilnikam «za mnohija hady padtrymki».
Ranałdu taksama abiacaŭ pakupnikam tokienaŭ, što hety vypusk «pamianiaje śviet NFT i vyviedzie futboł na novy ŭzrovień».
Adnak u vyniku samy tanny NFT-tokien z kalekcyi Ranałdu, jaki ŭ listapadzie 2022 hoda pradavaŭsia za 77 dalaraŭ, praz hod aceńvaŭsia tolki ŭ 1 dalar.
Što takoje NFT-tokieny
NFT abo ŭnikalny tokien — heta ličbavy kryptahrafičny abjekt, stvorany z dapamohaj technałohii błokčejna, jakaja ŭžyvajecca ŭ kryptavalutach.
Mnohija kalekcyjaniery siońnia źbirajuć ličbavyja tvory ŭ vyhladzie NFT, adnak krytyki technałohii kažuć, što ich rynak vielmi vałacilny, a pytańnie ab tym, ci daje vałodańnie tokienami niejkaje prava na źviazany ź im realny abjekt, zastajecca adkrytym.
Hałoŭnaja kaštoŭnaść takoha tokiena — u jaho ŭnikalnaści, bo mienavita hetaja jakaść prymušaje znaŭcaŭ mastactva płacić vielizarnyja sumy za tyja ci inšyja tvory.
Adnak u vypadku ź ličbavymi tvorami mastactva ŭnikalnaść nievidavočnaja, bo havorka idzie pra fajły, jakija, jak praviła, možna lohka kapijavać. U vypadku NFT unikalnaść zabiaśpiečvajecca dziakujučy błokčejnu, to-bok fiksavańni koda adrazu na mnohich kampjutarach adnačasova.
Kalekcyja NFT-tokienaŭ Ranałdu nasiła nazvu CR7 (pa inicyjałach spartsmiena i numary, pad jakim jon zvyčajna vystupaje).
Hety brend taksama vykarystoŭvaŭsia dla niekalkich inšych firmovych praduktaŭ, takich jak abutak i parfuma. Kamiercyjalizacyja imia Ranałdu dapamahła jamu stać adnym z samych bahatych spartoŭcaŭ płaniety: pavodle źviestak časopisa Forbes, za hod da maja 2023 hoda jon zarabiŭ 136 młn dalaraŭ.
Pazoŭniki śćviardžajuć, što vykarystańnie imia Ranałdu dapamahło Binance pavialičyć kolkaść karystalnickich zapytaŭ u internecie ab kryptabiržy na 500%. Jany taksama kažuć, što ŭdzieł futbalista padšturchnuŭ inviestaraŭ da ŭkładańnia hrošaj va ŭłasnuju kryptavalutu Binance pad nazvaj BNB — jaje aŭtary pazovu kłasifikujuć jak «niezarehistravanyja kaštoŭnyja papiery».
Amierykanskaja Kamisija pa kaštoŭnych papierach i biržam (SEC) ličyć, što takija aktyvy, jak kryptavaluta, sapraŭdy mohuć ličycca formaj kaštoŭnych papier, tamu znakamitaści, jakija ich rekłamujuć, pavinny vykonvać źviazanyja z hetaj śfieraj zakony ZŠA.
Kiraŭnik SEC Hary Hienśler raniej kazaŭ, što zorki abaviazanyja «raskryvać pierad publikaj źviestki, ad kaho i kolki jany atrymlivajuć za rekłamu ŭkładańniaŭ u kaštoŭnyja papiery».
«Kali znakamitaści rekłamujuć tyja ci inšyja inviestycyjnyja mahčymaści, u tym liku ŭkładańni ŭ kryptavalutu, inviestary pavinny prajaŭlać aściarožnaść i ŭvažliva vyvučyć, ci padychodziać dla ich takija inviestycyi. I jany pavinny viedać, ź jakoj pryčyny znakamitaści zajmajucca hetaj rekłamaj», — skazaŭ Hienśler.
Pazoŭniki ličać, što Ranałdu byŭ abaviazany publična abviaścić, kolki jamu zapłacili za rekłamu Binance, adnak hetaha nie zrabiŭ.
Kiraŭnik kansałtynhavaj firmy DeVere Group Najdžeł Hryn ličyć, što ŭ situacyi z pazovam suprać Ranałdu nielha vinavacić adnaho tolki futbalista.
«Vielmi važna razumieć, što ŭskładać vinu tolki na Ranałdu — heta značyć vielmi spraścić składanaje pytańnie, — kaža ekśpiert. — Zamiest hetaha treba źviarnuć uvahu na mižnarodnyja rehulatyŭnyja orhany, jakija vielmi marudzili z uviadzieńniem vyraznych praviłaŭ dla hetaha finansavaj asiarodździa, jakoje znachodzicca ŭ stadyi raźvićcia».
Hrupavyja pazovy taksama byli padadzienyja ŭ suviazi z rekłamaj jakaja pravaliłasia kryptabiržy FTX — na ich pryjdziecca adkazvać Amierykanskaj hałoŭnaj lizie biejsboła, a taksama čempijanatu «Formuła-1» i kampanii Mercedes-Benz.
Miarkujučy pa paviedamleńniach Ranałdu ŭ sacsietkach, jon maje namier praciahvać supracoŭnictva z Binance u budučyni.
Hrupavy pazoŭ suprać Ranałda byŭ padadzieny nieŭzabavie paśla taho, jak kiraŭnik Binance Čanpen Čžaa padaŭ u adstaŭku, pryznaŭšy siabie vinavatym pa abvinavačvańniach u parušeńni amierykanskich zakonaŭ ab baraćbie z admyvańniem hrošaj. Pry hetym sama Binance pahadziłasia zapłacić uładam ZŠA štraf 4,3 młrd dalaraŭ.
Amierykanskija prakurory ličać, što birža naŭmysna chavała infarmacyju ad pravaachoŭnych orhanaŭ, padryvała režym kantrolu za vykanańniem sankcyj i nie dakładvała ab padazronych tranzakcyjach.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary