Svaju teoryju taho, jak ukrainskija VPS zdoleli źbić rasijski samalot A-50, vykazaŭ analityk Tom Kupier, aŭtar knih pra savieckija i rasijskija vajskovyja samaloty. Jon miarkuje, što heta vynik zładžanaj raboty Patriot i S-300.
Teoryju Toma Kupiera pryvodzić Forbes. Adpaviedna joj, spačatku ŭ subotu ukrainskija bambaviki Su-24 nanieśli ŭdary pa abjektach rasijskich VPS u Krymie.
U vyniku niekalki radaraŭ byli vyviedzienyja z ładu, što značna pahoršyła naziemnaje radyjołakacyjnaje pakryćcio na paŭvostravie, asabliva na poŭnačy, dzie miascovaść mahła maskiravać nabližeńnie ŭkrainskich samalotaŭ, bieśpiłotnikaŭ i rakiet.
Zatym rasijskija kamandziry zrabili vidavočnuju, ale nierazumnuju reč. Jany zahadali samalotu z radyjołakacyjnaj stancyjaj A-50U, jakija zvyčajna lotajuć daloka na poŭdzień nad Azoŭskim moram, prasunucca dalej na poŭnač, kab pašyryć radyjołakacyjnaje pakryćcio bolšaj častki Krymu. Radar A-50 moža bačyć celi pamieram z samalot na adlehłaści amal 200 mil.
Supravadžaŭ A-50 pavietrany kamandny punkt Ił-22M z ekipažam kala 10 čałaviek na borcie, jaki zabiaśpiečvaŭ suviaź i pieradaču danych, bo ŭ A-50 na heta brakuje mahutnaści.
Miarkujučy pa spadarožnikavych zdymkach i radyjołakacyjnych źviestkach, samaja paŭnočnaja trajektoryja palotu A-50 znachodzicca nad akupavanym Biardzianskam, usiaho za 75 milaŭ ad linii frontu. Heta ŭ miežach dasiažnaści adnoj z batarej zienitna-rakietnaha kompleksu Patriot z troch, jakija ŭkrainskija VPS razharnuli na Paŭdniovym froncie.
Jak zaŭvažaje Kupier, usio, što nieabchodna było zrabić ukraincam, heta tajemna razharnuć prydatnuju zienitna-rakietnuju sistemu, kab parazić dva samaloty ź vialikaj adlehłaści.
VVS pisała, što heta moh być adzin z ZRK S-300 ci RAS-2/3. Ale isnujuć niekatoryja śviedčańni taho, što była abjadnanaja praca S-300 i Patriot.
Na karyść hetaha havoryć paviedamleńnie ab tym, što źniščalnik-bambavik Su-34 rasijskich VPS vyjaviŭ raniej nieviadomuju ŭkrainskuju batareju S-300, jakaja ŭklučyła radar, za niekalki chvilin da taho, jak byli źbityja A-50 i Ił-22.
Kali batareja S-300 zrabiła pieršapačatkovaje padśviatleńnie, jana pieradała danyja ab celach na najbližejšuju schavanuju batareju Patriot.
«Apošniaja ŭklučyła svoj radar usiaho na niekalki siekundaŭ: dastatkova doŭha, kab atrymać ułasnyja danyja ab celach, ale zanadta koratka, kab ruskija mahli nadziejna vyjavić jaho i acanić jak pahrozu», — miarkuje Kupier.
A potym ukraincy pačali zapuskać svaje rakiety. Praz chvilinu rakiety ŭzarvalisia, źniščyŭšy A-50 i paškodziŭšy Ił-22.
«Paśla zakančeńnia ahniavych dziejańniaŭ, — piša Kupier, — ukrainskija ekipažy S-300 i PAC-2/3 nieadkładna spynili vypramieńvańnie i pačali źbirać svaje sistemy, kab prybrać ich i takim čynam paźbiehnuć luboj mahčymaj adpłaty z boku Rasii».
Ciapier, kali VPS Rasii nie hatovyja ryzyknuć dvuma apošnimi lotnymi A-50, im daviadziecca źmirycca sa svajoj novaj niazdolnaściu zabiaśpiečyć radyjołakacyjnaje pakryćcio ŭsiaho Krymu. Inšymi słovami, Rasija pavinna pryniać ryzyku praciahu — a dakładniej, eskałacyi — ukrainskich rakietnych nalotaŭ na svaje vojski na paŭvostravie.
Čytajcie jašče:
Hibiel A-50: jak USU mahli źniščyć rasijski latajučy radar?
Załužny paćvierdziŭ źbićcio rasijskich zvyškaštoŭnych samalotaŭ nad Azoŭskim moram
Ukraina źbiła rasijski zvyškaštoŭny samalot nad Azoŭskim moram
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8080
Kamientary