Bondarava niepierakanaŭča apraŭdvajecca za toje, čamu 17 hadoŭ nie pracavała
Danosčycy Volzie Bondaravaj, jakaja sabrałasia na vybary, daviałosia tłumačyć, čamu za svajo žyćcio jana aficyjna pracavała tolki dva hady.
Jana piša ŭ svaim kanale, što pabačyła heta pytańnie ad kamientatara ŭ adnym z čataŭ.
«Mianie spytali, čym ja zajmałasia z 2000 pa 2017 hady, to-bok z momantu zakančeńnia siaredniaj škoły da pastupleńnia ŭ industryjalna-piedahahičny kaledž pry RIPA.
Adkaz: zajmałasia dziciem i siamjoj.
Tamu što ja ŭ pieršuju čarhu žančyna, žonka i maci, zachavalnica chatniaha ačaha. Liču, što heta pieršačarhovaja zadača luboj žančyny — i chaj mianie praklanuć za hetyja słovy fieministki i inšyja kałupałki».
Bondarava piša, što zaŭsiody była pobač z dačkoj.
«I, dziakuj Bohu, vyhadavała jaje razumnicaj, dobraj, spahadlivaj dziaŭčynkaj, jakaja ciapier užo pieratvaryłasia ŭ dziaŭčynu, sapraŭdnuju pamočnicu i siabroŭku».
Raskazała i pra muža.
«Što tyčycca šlubu, to tut usio hetak ža adnaznačna, jak z maciarynstvam: muž — heta los. Ja paznajomiłasia sa svaim budučym mužam zusim junaj i ščaśliva pražyła ŭ šlubie voś užo 20 hadoŭ».
Danosčyca dadaje, što jana za viaršenstva mužčyny ŭ siamji.
Nahadajem, Volha Bondarava zarehistravałasia kandydatkaj u deputaty Minskaha haradskoha savieta. Heta vymusiła jaje apublikavać svaju bijahrafiju. Miarkujučy pa joj, u druhoj pałovie 2010-ch kamunistka ŭpieršyniu znajšła lehalnuju pracu. U 2017-2018 jana pracavała ŭ Hrodnie ŭ śfiery handlu. U 2023-m danosčyca ŭładkavałasia adkaznaj sakratarkaj u hazietu Kamunistyčnaj partyi Biełarusi. Pry hetym u aficyjnych dakumientach vybarčaj kamisii Bondarava paznačanaja tolki jak studentka pieduniviersiteta.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary