Ekadašy i askieza. Dyjetołah tłumačyć, jaki z modnych trendaŭ u charčavańni nasamreč dapamoža skinuć lišniuju vahu
Modnyja dyjety źjaŭlajucca ledź nie kožny siezon — ciapier na piku papularnaści ekadašy i askieza. Daviedalisia ŭ dyjetołaha, jakuju niebiaśpieku chavajuć hetyja praktyki i jak ich pravilna vykonvać, kab nie naškodzić zdaroŭju.
«Treba razumieć, što lubaja dyjeta — stres dla arhanizma, tamu pierad tym, jak na jaje vyrašycca, nieabchodna prakansultavacca z doktaram. Jon raspracuje płan charčavańnia, uličvajučy asablivaści vašaha arhanizma, i nie dapuścić deficytu karysnych mikraelemientaŭ i vitaminaŭ», — pieraścierahaje ad samalačeńnia i žorstkich dyjet doktar-hastraenterołah i dyjetołah Iryna (poŭnaje imia nie pryvodzicca ŭ metach biaśpieki).
Da taho ž, bolšaść modnych pachudalnych praktyk, kali vykarystoŭvać ich niapravilna, mohuć prosta nie spracavać. A efiekt, kali jaho nie zamacoŭvać, nieŭzabavie sydzie na ništo. Tamu varta padychodzić da skidvańnia vahi surjozna.
Ekadašy
«U pierakładzie z sanskrytu «ekadašy» aznačaje «adzinaccać» — ci adzinaccaty dzień paśla maładzika i poŭni. U ajurviedyčnaj litaratury napisana, što hety čas jak maha lepš padychodzić dla raznastajnych duchoŭnych praktyk. Tamu mienavita ŭ ekadašy pryniata asensavana abmiažoŭvać siabie ŭ ježy», — raskazvaje Iryna.
Ludzi, jakija prytrymlivajucca hetaj tradycyi, na dzień admaŭlajucca ad tłustaj, ciažkazasvajalnaj ježy ci naohuł abychodziacca bieź jaje. Ličycca, što ŭ ekadašy nielha ŭžyvać miasa, jajki, rybu i morapradukty, babovyja, zbožžavyja, złakavyja pradukty, usie vidy krup i asabliva rys. Ałkahol, kava i inšyja napoi, jakija ŭpłyvajuć na śviadomaść, taksama vyklučajucca. Dazvolenymi zastajucca vada i śviežavycisnutyja soki, śviežaja sadavina i harodnina, dehidryravanaja harodnina biez cukru i chimii, małočnyja pradukty.
«Ekadašy — dobry varyjant razhruzačnaha dnia, praŭda, treba z rozumam rychtavacca da pačatku takoj dyjety i płaŭna ź jaje vychodzić. Jak praviła, minimum za try dni treba pastupova admaŭlacca ad ciažkaj ježy, ałkaholu i kavy. Paśla kanca «razhruzki» — taksama płaŭna ŭvachodzić u zvyčajny režym charčavańnia. Asobna treba adznačyć, što fruktovyja dyjety mohuć nie padyści ludziam, jakija pakutujuć na hastryt i padvyšanuju kisłotnaść. U ich vypadkach pierad tym, jak sprabavać ekadašy, treba prakansultavacca sa śpiecyjalistam» — adznačaje lekar.
Askieza
Askieza — vydatny sposab, kab prapracavać siłu voli, i drenny, kab schudnieć. Sens hetaj praktyki zvodzicca da ŭśviadomlenaha vychadu sa svajoj zony kamfortu: u jakaści askiezy čałaviek moža admovicca ad miasa, cukru, mučnoha, kavy i inšaha abo ŭziać na siabie abaviazacielstva rehularna vykonvać niejkaje dziejańnie: čytać pa sto staronak na dzień, rabić zaradku ci pić dastatkovuju kolkaść vady.
«Admovicca ad ałkaholu ci cukru na 30 dzion, a mienavita stolki doŭžycca minimalnaja askieza, zaŭsiody karysna. Tym bolš, kali čałaviek dadaść zaradku ci inšyja rehularnyja fizičnyja nahruzki. Plus askiezy ŭ tym, što za miesiac, jak praviła, arhanizm pryvykaje da adsutnaści jakoha-niebudź inhredyjenta ŭ racyjonie i pierabudoŭvajecca na novyja smakavyja paterny. Ź minusaŭ možna adznačyć časty chutki adkat: ja viedaju klijentaŭ, jakija miesiac abmiažoŭvali siabie ŭ tłustaj ježy, ale potym išli adznačać kaniec ustrymańnia ŭ «Makdonalds». Kaniešnie, dla arhanizma heta byŭ stres», — tłumačyć Iryna.
Pa słovach lekara, choć admova ad kankretnaha škodnaha pradukta budzie sapraŭdy karysnaja dla arhanizma, na źnižeńnie vahi jana moža nie paŭpłyvać: «Časta, admaŭlajučysia ad sałodkaha ci mučnoha, žančyny čakajuć nievierahodnych vynikaŭ, ale za ŭvieś čas hublajuć tolki kiłahram-paŭtara. Viadoma, takija pakazčyki mocna dematyvujuć. Tamu treba razumieć, što askieza — heta bolš treniroŭka voli i pieršaja cahlinka ŭ dalejšaje budaŭnictva zdarovaha racyjonu, a nie kłasičnaja dyjeta».
Dyjeta
Kaniešnie, my nie mahli abyści bokam kłasičnyja dyjety. «Čaho tolki nie robiać žančyny, kab schudnieć — i vocat pjuć, i ličynki hlistoŭ hłytajuć, ale ŭsie hetyja nialudskija sposaby tolki kalečać arhanizm», — narakaje lekar.
Za čas pracy ŭ prafiesii Iryna vypracavała praviła:
«Ja pierakananaja, što čym macniej pakutavaŭ čałaviek padčas dyjety, tym bolš vierahodny zryŭ i nastupny adkat. U dyjetu treba ŭvachodzić płaŭna i biez nadryvu — časam pierabudova charčovych zvyčak zajmaje niekalki miesiacaŭ. Zatoje, pravilna padyšoŭšy da racyjonu i viedajučy, jakija pradukty mienavita vam treba vyklučyć, vynik choć i pryjdzie paźniej, ale zatrymajecca z vami nadoŭha».
Tym, chto płanuje pazbavicca zališniaj vahi da viasny, Iryna rekamienduje ŭspomnić «praviła talerki».
«Zvyčajnuju talerku dyjamietram 20-24 sm treba vizualna padzialić na dźvie roŭnyja častki. Adnu ź ich — jašče raz napałovu. Tak, pałovu porcyi pavinna zajmać harodnina, adnu čverć — składanyja vuhlavody, astatniuju častku — białki. Hetaje praviła dapamahaje raznastaić racyjon i prytrymlivacca zdarovaha charčavańnia» — kaža jana.
Kamientary