«Uvieś śviet dziviŭsia, u jakich umovach trymali Navalnaha»: były źniavoleny nahadaŭ pra realii palitviaźniaŭ u Biełarusi
Pračytaŭšy pra toje, u jakich umovach rasijski apazicyjanier Alaksiej Navalny bolš za 300 dzion pravioŭ u ŠYZA, Dźmitryj Barejčuk vyrašyŭ nahadać, što ŭ Biełarusi dla zatrymanych pa palityčnych matyvach usio jašče bolš žorstka. Mužčynu zatrymlivali niekalki razoŭ i jon upeŭnieny: žyćcio na Akreścina maje dačynieńnie da ankałohii, ź jakoj mužčyna zmahajecca ciapier.
Historyju Dźmitryja my ŭžo raspaviadali. U 2020 mužčyna źbiraŭ podpisy za Babaryku, potym aktyvista zatrymali naŭprost u KDB, kudy toj prynios chadajnictva ab vyzvaleńni Babaryki ź SIZA. Zhadali pra Dźmitryja znoŭ u 2022 hodzie i paśla hetaha spakojnaha žyćcia ŭžo nie było. Mužčynu prymusili abhavaryć siabie i pryznacca ŭ rehistracyi ŭ płanie «Pieramoha».
— Na Akreścina ŭ adnamiesnaj kamiery pamieram 1,7ch3 mietry (uklučajučy prybiralniu, jakaja ničym nie aharodžanaja) utrymlivajecca ad 7 da 9 aryštantaŭ.
Dźmitryj zhadvaje, što škonka, jakaja pryšpilvajecca da ściany, u Akreścina nikoli nie padnimajecca. U rasparadžeńni aryštantaŭ tolki bietonnaja padłoha i płošča kala pałovy kvadratnaha mietra na čałavieka.
— Viadoma ž, nijakich matracaŭ nie vydajuć. U aryštantaŭ zabirajuć usie asabistyja rečy, navat zubnyja pasty i ščotki, knih i časopisaŭ niama. Prahułak ludzi na Akreścina pazbaŭlenyja. Dostupu da miedycynskaha absłuhoŭvańnia niama. Redka ŭ fielčara možna vyprasić samuju prostuju tabletku padčas ranišniaha abychodu. I heta ŭsio ličycca normaj dla zatrymanych pa palityčnych matyvach.
Mocnyja boli ŭ žyvacie ŭ mužčyny pačalisia jašče na Akreścina, ale tam ihnaravali ŭsie jahonyja skarhi na drennaje samaadčuvańnie. Adrazu ž paśla vyzvaleńnia Dźmitryj źviarnuŭsia ŭ balnicu i jaho špitalizavali.
Žudasna dumać pra toje, što było b ź im, kali b nie paščaściła vyjści na volu — chacia b pad padpisku ab niavyjeździe. Ale ž dziakujučy «Bajsoł» Dźmitryj razam ź siamjoj evakuiravaŭsia ŭ Polšču, dzie prachodzić lačeńnie. Jamu praviali apieracyju i vydalili puchlinu razam z častkaj kišečnika. Vy možacie padtrymać Dźmitryja i paŭdzielničać u zbory dla jaho.
Pavodle źviestak pravaabarončaha centru «Viasna», siarod palitviaźniaŭ u Biełarusi niamała piensijanieraŭ, a taksama ludziej ź invalidnaściu i ciažkimi zachvorvańniami. Samuju starejšuju ź ich — 75-hadovuju Natallu Taran — asudzili na try z pałovaj hady kałonii za abrazy. Jana da hetaha času nie vyjšła na volu.
Možna zhadać i 63-hadovaha aktyvista i krajaznaŭcu Uładzimira Hundara — heta čałaviek ź invalidnaściu, u jaho niama nahi. Adnak u SIZA jamu nie dazvolili pakinuć pratez, nie pieradavali nieabchodnyja leki: vysoki cisk spravakavaŭ hipiertaničny kryz. Akramia taho, jon paprasiŭ pieradać u SIZA bolš mocnyja akulary i novyja tabletki ad serca. Jaho asudzili na 18 hadoŭ kałonii va ŭmovach uzmocnienaha režymu. Hundara časta kidajuć u karcar, jon nieadnarazova abjaŭlaŭ haładoŭku.
Na žal, takija vypadki nie adzinkavyja. Pravaabaroncy «Viasny» adznačajuć, što paśla 2020 hoda administracyi miescaŭ pazbaŭleńnia voli stvarali dla palitviaźniaŭ umovy, jakija nabližalisia, a časta dasiahali ŭzroŭniu katavalnych.
Pa danych na 18 lutaha 1418 čałaviek u Biełarusi pryznanyja palitviaźniami. Šmat pra kaho ź viadomych biełaruskich palitźniavolenych niama źviestak vielmi doŭha. Užo 368 dzion listy nie dachodziać da Maryi Kaleśnikavaj, 374 — da Maksima Znaka, 292 — da Viktara Babaryki, 363 — da Ihara Łosika, 346 — da Siarhieja Cichanoŭskaha.
Čytajcie taksama:
«Kali trapiŭ na Akreścina ŭ 2022 hodzie, padumaŭ: blin, jak ža dobra było ŭ 2020!»
«Sindrom raptoŭnaj śmierci». Źjaviłasia novaja viersija, ad čaho pamior Navalny
«Mnie tolki chočacca, kab jana vyžyła». Siastra Maryi Kaleśnikavaj — pra hod biez suviazi ź joj
Kamientary
PS v 2020 u vas był šahs vsio eto dieŕmo śniesti. Razrušiť svoju Bastiliju! No vy la chorovody vodili! Fotosieśsii naprotiv "kosmonavtov" ustraivali! Čajkom mla vo dvorach bałovaliś! Umirať za svoich dietiej za*scali? Nu dyk živitie, sto lat! :)