«Vaj, ty mianie skaryła!» Žurnalistka «Našaj Nivy» prateściravała rasijski anałah Tinder
Paśla sychodu Tinder z Rasii i Biełarusi, rasijskija raspracoŭščyki vykacili svoj dadatak dla anłajn-znajomstvaŭ. Žurnalistka «Našaj Nivy» prateściravała Twinby — servis, jaki pracuje z dapamohaj štučnaha intelektu.
Hałoŭnaj fiškaj raspracoŭščyki Twinby nazyvali psichałahičnyja testy, jakija dadatak adrazu prapanoŭvaje prajści. Śćviardžajecca, što heta dapamoža karystalnikam aryjentavacca nie tolki na źniešni vyhlad nieznajomcaŭ, ale i na pracent sumiaščalnaści, jaki vyličvajecca aŭtamatyčna. «U vyniku ty atrymaješ bazavaje apisańnie rys charaktaru i daviedaješsia, z kim z partnioraŭ tabie budzie cikava, viesieła i kamfortna!»
Bolš za toje, dadatak abiacaje padkazvać «čyrvonyja» i «zialonyja» ściahi pry kamunikacyi z kankretnym čałaviekam. Ale, paviercie, hučyć heta cikaviej, čym jość nasamreč.
U biaspłatnuju viersiju ŭvachodziać try testy: styl prychilnaści, typ asoby i «vialikaja piaciorka». Apošni vyznačaje, nakolki ty kansiervatyŭny, adkazny, dobrazyčlivy, emacyjanalny i dapamahaje vyznačyć, ty ekstraviert ci intraviert.
U kožnym z testaŭ vydajuć pa čarzie 10 śćviardžeńniaŭ (naprykład: «Zvyčajna ja krytyčna staŭlusia da inšych, adčuvaju žadańnie paspračacca»), a ty pavinien vyznačyć, nakolki jany tabie padychodziać.
Składana skazać, ci sapraŭdy heta pracuje, bo amal z usimi prapanavanymi mnie mužčynami pracent sumiaščalnaści zaškalvaŭ, a dadatak abiacaŭ, što my budziem cudoŭnaj paraj.
Krychu dziŭna, kaniečnie, bačyć, što ŭ ciabie idealnaja sumiaščalnaść z čałaviekam, jaki hałoŭnym fota zrabiŭ zdymak, na jakim horača całujecca ź niejkaj dziaŭčynaj. Chaciełasia b u hetym vypadku, kab jak minimum udakładnili jahonuju sumiaščalnaść z panienkaj na fota.
Nieabchodna adznačyć, što ŭmieńnie biełaruskich mužčyn vybirać fota dla znajomstva — heta asobny vid mastactva. Možna biaskonca doŭha hadać, što ž chacieŭ skazać aŭtar, vystaŭlajučy zdymak, dzie na zadnim płanie jahony siabar demanstruje svaju nižniuju častku śpiny, staranna rasstaŭlajučy na travie piŭnyja butelki.
Chacia fota 32-hadovaha chłapčuka ŭ kampanii Dzieda Maroza i Śniahurki taksama vyklikaje pytańni.
A što vy skažacie pra chłopcaŭ, jakija sprabujuć razam ź siabrami na fota vykłaści słova «Po*j» svaimi ciełami? Paśla takoha abmiarkoŭvać razmytyja sełfi pobač z unitazam abo na fonie babulinaha dyvana niama nijakaha žadańnia — banalščyna.
Zdajecca, Twinby za mianie chvalavaŭsia, tamu napisaŭ: «Tvaja hatoŭnaść dapamahčy moža stać abjektam dla manipulacyj i suzaležnych adnosin». I kłapatliva papiaredziŭ, što ja mahu sutyknucca ź nieabhruntavanaj reŭnaściu i zališniaj pryviazanaściu partniora. Navat paradu daŭ: «U pačatku adnosin abaviazkova pahavarycie z partnioram i rasstaŭcie svaje miežy. Pamiataj, što ŭnutrany resurs nie biaźmiežny, i ŭ ciabie abaviazkova pavinien być čas dla siabie».
Kali nie prajści vieryfikacyju (dla hetaha treba zrabić sełfi i słužba techpadtrymki paraŭnaje jaho s tvajoj avatarkaj), kolkaść ludziej, jakich ty možaš łajknuć, abmiežavanaja. Limit — 10 łajkaŭ na sutki.
Nie chočaš vieryfikavacca — čakaj 24 hadziny dla taho, kab znoŭ pačać šukać kachańnie. U jakaści bonusu raspracoŭščyki abiacajuć stavić ptušački na profilach vieryfikavanych karystalnikaŭ. Za toje, kab pahladzieć, chto pastaviŭ tabie łajk, dadatak taksama prosić zapłacić.
Jašče adzin cikavy momant: ty možaš pahladzieć stolki foty ŭ čužym profili, kolki zahruziŭ u svoj. Kali ŭ ciabie mienš zdymkaŭ, dadatak bluryć čužyja fota i prapanuje tabie dadać bolš svaich.
Maŭčańnie paśla taho, jak skłałasia virtualnaja para, — źjava davoli častaja. Mabyć tamu stvaralniki Twinby praduhledzieli nabory kartak z roznymi pytańniami dla taho, kab praściej było padtrymlivać razmovu. U biaspłatnuju viersiju ŭvachodziać tolki dźvie — kartki z pytańniami dla znajomstva i miks pytańniaŭ na samyja roznyja temy. A voś za hrošy dla abmierkavańnia prapanujucca samyja roznyja temy — ad bytavuchi i padarožžaŭ da hiendaraŭ i fietyšaŭ.
Atrymaŭšy ŭ čarhovy raz paviedamleńnie kštałtu «Vaj, ty mianie skaryła!», ja vyrašyła brać spravu ŭ svaje ruki i pačała zakidvać mužčyn prapanovaj paadkazvać na pytańni.
Prykładna pałova pahadziłasia. Zdajecca, heta sapraŭdy niebłahaja ideja, bo dapamahaje laniva padtrymlivać dyjałoh na praciahu niekalkich dzion.
Cikava, kaniečnie, jak pracuje ałharytm, jaki padbiraje pytańnie dla pary. Bo z adnym surazmoŭcam tabie adrazu prapanoŭvajuć pačać razvažać pra rolu seksu ŭ adnosinach, a ź inšym syplucca panyłyja kartki kštałtu «Ci šmat kvietak u ciabie doma?» abo navat «Jaki vierš ty viedaješ na pamiać?».
Pakul ty nie adkažaš na pytańnie, ty nie možaš ubačyć, jak na jaho adkazaŭ partnior. Kali nie chočaš adkazvać — prapanoŭvaješ pierajści da nastupnaha pytańnie. Ale ž u hetym vypadku ty nie daviedaješsia, što ž jon tam raspavioŭ.
Hladzieć na «čyrvonyja» dy «zialonyja» ściahi kankretnaha čałavieka pa mierkavańni dadatku asabliva niama sensu. Bo ŭ pieršym vypadku zvyčajna tabie Twinby piša: «Vam dobra razam, ale časam vy nie čujecie partniora i da apošniaha nastojvajecie na svaim punkcie hledžańnia», a ŭ druhim śćviardžaje, što vaša para budzie harmaničnaj i kanfliktaŭ nie pradbačycca.
Zdajecca, jašče nie vielmi šmat ludziej ustalavali siabie Twinby, bo ŭ niejki momant dejtynh-siervis pačaŭ prapanoŭvać mnie mužčyn z Krasnadara i Maskvy.
Rasijski student z dapamohaj štučnaha intelektu znajšoŭ sabie dziaŭčynu. Historyja dajšła da prapanovy šlubu
«Nazyvaŭ chalaŭščycaj i raiŭ kantralavać libida». Dziaŭčaty padzialilisia historyjami svaich najhoršych Tinder-spatkańniaŭ
Nie tolki Tinder. Dzie ciapier šukać paru — na ŭsio žyćcio i na adnu noč
U Minsku zatrymali juryskonsulta. Jaho mahli adšukać praz Tinder — raskazvajem pra jašče adnu niebiaśpieku servisu
Kamientary