«Jon nienajedny». U čym sakret maładoha hałkipiera, dziakujučy jakomu zbornaja Hruzii ŭziała svajo pieršaje ačko na top-turniry? 

Što Hieorhij Mamardašvili taki dobry hulec, dakładna nie siurpryz dla tych, chto sočyć za jaho hulnioj jak minimum u čempijanacie Ispanii za «Valensiju». Da hetaj kamandy jon dałučyŭsia ŭ červieni 2021-ha, u 20 hadoŭ.

Ciapier ža, praz try hady paśla taho, jon samy nadziejny kipier Ła Lihi, za jakim pilna sočać «Bavaryja», «Čełsi» i «Atletyka».

Hieorhij Mamardašvili naradziŭsia ŭ vieraśni 2000 hoda ŭ Hłdani, vielizarnym spalnym rajonie na paŭnočnaj uskrainie Tbilisi. Jahony baćka, David Mamardašvili, u minułym taksama pahulaŭ u varotach i navat vystupaŭ za kłub «Hahra», ale vyšej za hety ŭzrovień nie padymaŭsia. Tym nie mienš, mienavita jon pryščapiŭ Hieorhiju luboŭ da futbolnych varot i varatarskich palčatak.

David pakazvaŭ synu videa ź Ikieram Kasiljasam i Džanłuidžy Bufonam, ale najbolš taho ŭraziŭ znakamity niamiecki varatar Manuel Nojer: Hieorhij z zachapleńniem sačyŭ za jahonaj jarkaj manieraj hulni i sejvami na čempijanacie śvietu ŭ Brazilii ŭ 2014 hodzie.

«Liču, Nojer źmianiŭ usprymańnie varataroŭ, — kaža Mamardašvili. — Heta vialiki hulec, žyvy prykład. Uzor dla pierajmańnia, na jaki varta raŭniacca».

Mamardašvili trapiŭ u akademiju tbiliskaha «Dynama» ŭ 12 hadoŭ, i nieŭzabavie jaho tam zaŭvažyli. Praz dva hady Hieorhija adpravili ŭ kłub «Mierani», dzie varataroŭ treniravaŭ jahony tata. Praca z baćkam u «Mierani» stała dla farmavańnia talenavitaha hulca klučavoj: u hetym kłubie jon upieršyniu pačaŭ asobna treniravacca brać pienalci, prakačvaŭ reakcyju.

Ciapier šmat chto nazyvaje Hieorhija «monstram pienalci»: u hetym siezonie za «Valensiju» jon uziaŭ ich try z šaści.

Pavialičyć

Praz hod zaniatkaŭ z tatam junak viarnuŭsia ŭ tbiliskaje «Dynama», ale za darosłuju kamandu tam nie pahulaŭ zusim. Uzimku 2019-ha jaho addali ŭ arendu ŭ kłub «Rustavi», praz hod byŭ užo tbiliski «Łakamatyŭ», kudy Hieorhija «spłavili» na 2 hady.

Jon ciažka pieražyvaŭ hety pieryjad i chacieŭ dakazać, što «Dynama» praličyłasia. I heta jamu ŭdałosia: užo ŭ 20 hadoŭ hulca «Łakamatyva» Hieorhija Mamardašvili pryznali najlepšym varatarom čempijanatu Hruzii. A kali jahony kłub hulaŭ u kvalifikacyi Lihi Jeŭropy suprać ispanskaj «Hranady», to na pierśpiektyŭnaha hruzinskaha hałkipiera źviarnuli ŭvahu skaŭty «Valensii». 

«Mnie skazali, što ŭ «Łakamatyvie» zajhraŭ vydatny varatar. Ja pačaŭ sačyć za im, — uspaminaŭ futbolny ahient Antonia Łopies. — Ubačyŭšy jaho suprać «Hranady», ja advažyŭsia. Ja źviazaŭsia z «Atletyka», «Barsiełonaj», «Žyronaj», «Viljareałam», «Bietysam». Usie kazali mnie: «Hruzin? Nie śmiašy mianie». Ja rvaŭ vałasy na hałavie, bačyŭ topavaha varatara. Jon dzivosny».

U vyniku na prapanovu Łopiesa adhuknulisia tolki dva kłuby: «Valensija» i «Saśjedad». Pieršyja pryjšli da «Dynama» i prapanavali arendu z pravam mahčymaha vykupu.

Hieorhij pryznajecca: «Na samaj spravie mnie pašancavała. Ja apynuŭsia ŭ patrebnym miescy ŭ pravilny čas».

Spačatku Hieorhija ŭ «Valensii» razhladali tolki jak čaćviortaha hałkipiera i płanavali zajhrać u reziervie. Ale ŭžo paśla pieršaj treniroŭki trenier «Valensii» Piepie Bardałas byŭ pryjemna ździŭleny: «Jon vyhladaje macniejšym, čym my čakali. Ciapier u nas jość varatary, ale my nazirajem za Hieorhijem».

A paśla Mamardašvili krychu pašancavała. Pierad startam siezona-2021/22 traŭmavalisia asnoŭnyja varatary «Valensii» Jaśpier Silesen i Chaŭmie Damieniek, a novaha daśviedčanaha kipiera nie znajšli.

Pryjšłosia pastavić Hieorhija: jon vyjšaŭ na matč z «Chietafie» ŭ 20 hadoŭ i 318 dzion i adyhraŭ na nul, zrabiŭšy piać sejvaŭ i staŭšy varatarom tura.

U vyniku Mamardašvili zamacavaŭsia ŭ asnovie navat paśla viartańnia paśla traŭmy Jaśpiera Silesena. U pieršym ža siezonie jon staŭ asnoŭnym varatarom «Valensii», a nieŭzabavie jaho ŭpieršyniu vyklikali ŭ zbornuju.

Užo dva hady Hieorhij — adzin z hałoŭnych kipieraŭ Ła Lihi, a fanaty jaho abažajuć. «Valensija» vykupiła jaho za 850 tysiač jeŭra, prapisanych u kantrakcie, i trenier kłuba Rubien Baracha nazyvaje heta «ździełkaj stahodździa».

U čym pieravahi Mamardašvili? Jon topavy šot-stopier, adzin z hałoŭnych u Ispanii. U jaho najlepšyja vyniki pa praduchilenych čakanych hałach: jon ratavaŭ kamandu nie prosta časta, ale i efiektyŭna. «Valensija» šmat čaho dazvalaje supiernikam rabić kala svajoj bramy, kasiačyć u abaronie, ale varatar pastajanna padčyščaje za partniorami.

Pavialičyć

Hieorhij vydaŭ siezon naroŭni z Unai Simonam z «Atletyka», jakoha ličać hałoŭnym kipieram Ła Lihi. U top-lihach ličby macniejšyja tolki ŭ italjancaŭ Džanłuidžy Danarumy z francuzskaha «Pary-sien-Žermiena» i Mikiele Dzi Hrehorya ź italjanskaj «Moncy».

Jašče plusy Mamardašvili: vydatnaja reakcyja, niadrennaja płastyka pry roście ŭ dva mietry. Jon mocny na vychadach, jaho ciažka adšturchnuć ad miača. Pa pierapynienych pieradačach Hieorhij — druhi ŭ Ła Lizie paśla Konana Ledesmy z «Kadysa».

«Kali Hieorhij bačyć miač — nichto ŭ štrafnoj jaho nie dastanie, navat nie spadziavajciesia», — taki kamplimient Mamardašvili zrabiŭ forvard Uha Dura.

Mamardašvili detalova prahladaje šmat videa, viedaje pra zvyčki napadnikaŭ pierad udarami. I nie tolki z 11 mietraŭ. Kaža, tak praściej pračytvać realny ŭdar, kali jaho sprabujuć zabłytać.

Jość u Hieorhija, praŭda, i niedachop: jon nie vielmi mocny ŭ hulni nahami. Jon varatar staroj farmacyi, nie padychodzić pad prasoŭvańnie miača. Nie toje što jon zusim drenny, ale da top-kipieraŭ u hetym aśpiekcie nie daciahvaje.

Ale ciapier u zbornaj i «Valensii» jaho nie prosiać hulać u pas, važniejšyja sejvy. A ŭ hetym płanie Hieorhij — hatovy top-bramnik, što trymaje płanku na dystancyi niekalkich siezonaŭ.

U čym jahony sakret? Sam Mamardašvili śćviardžaje — u poŭnaj samaaddačy:

«Za pieršyja paŭhoda ŭ Valensii jon vychodziŭ z domu tolki na treniroŭki, nijakich viečarynak, — raskazaŭ eks-hałkipier Chase Pierales, znajomy pa «Valensii». —

Heta zasiarodžany chłopiec, jaki viedaje, što robić. Jon choča treniravacca, dobra charčujecca. Hieorhij mocna sočyć za saboj. Heta chłopiec, jaki damahajecca svajoj mary, ale ruchajecca napierad za novaj. Jon nienajedny».

• 25
• 0
• 1
• 1
• 4
• 4
• 4
• 0