Palinie Šarendzie-Panasiuk znoŭ «prynieśli» zialonyja jabłyki zamiest praduktovaj pieradačy
Muž palitźniavolenaj Paliny Šarendy-Panasiuk, jakuju niadaŭna pieraviali ŭ homielskaje SIZA-3, dzie jana čakaje novaha suda, raskazaŭ «Radyjo Svaboda» pra novyja prablemy z praduktovymi pieradačami dla Paliny, a taksama pra toje, jak prajšła jaje apošniaja psichołaha-psichijatryčnaja ekśpiertyza.
Znoŭ prablemy z praduktovaj pieradačaj
Pavodle krynicy, jakuju Andrej Šarenda nie moža nazyvać ź intaresaŭ biaśpieki, paśla viartańnia ŭ homielskaje SIZA jahonuju žonku čakała taja ž historyja z praduktovaj pieradačaj, jak i letaś.
«Nibyta ad nieviadomaj asoby joj pastupili pakunki ź zialonymi jabłykami. U vyniku ciapier miesiačnaja norma pieradačy praduktaŭ u 30 kiłahramaŭ ličycca vybranaj, i bolš u hetym miesiacy dla jaje ničoha nie prymuć.
Hetak i raniej rabili: pieradavali Palinie to miech hniłoj morkvy, to miech bitych jabłyk, jak minułym letam. Taki ździek, psichałahičny cisk na Palinu i na nas, jaje svajakoŭ.
U SIZA dobra viedajuć pra chvarobu Paliny, što ŭ jaje prablemy sa straŭnikam i załozaj, a my sprabujem pieradać joj dobryja pradukty. Dyk kab ničoha nie atrymała», — miarkuje muž Paliny Andrej Šarenda.
Pavodle Andreja Šarendy, letaś svajakam usio ž udavałasia pieradać dla Paliny charčovyja pieradačy.
«Atrymałasia adzin raz u śniežni pierad etapam. Jany ŭ śniežni nie zakinuli joj ničoha, dyk svajaki admysłova jeździli ŭ Homiel, kab pieradać śviežuju harodninu, sadavinu, syr, kaŭbasu. Zvyčajny nabor praduktaŭ. I pasyłku z rečami ŭ SIZA pryniali. A ŭ kałoniju za 5 miesiacaŭ uvohule ničoha pieradać nie atrymałasia. I voś znoŭ ničoha», — raskazaŭ Andrej Šarenda.
Pavodle jaho słoŭ, Palinu Šarendu-Panasiuk praciahvajuć trymać u režymie inkamunikada — apošni list ad jaje siamja atrymała ŭ kancy 2023 hoda.
«Ekśpiertyzy jak takoj i nie było»
Psichołaha-psichijatryčnuju ekśpiertyzu Palina Šarenda-Panasiuk prachodziła ŭ Respublikanskim navukova-praktyčnym centry psichičnaha zdaroŭja ŭ pasiołku Navinki pad Minskam, dzie ŭ tym liku daśledujuć tych, kaho padazrajuć u złačynstvach. Pavodle krynicy, na jakuju spasyłajecca Andrej Šarenda, vynik ekśpiertyzy, jakuju prajšła Palina, ničym nie adroźnivajecca ad dźviuch inšych, jakija ŭ jaje byli ŭ raniejšyja hady źniavoleńnia.
«Pryznanaja narmalnaj, što im i treba, kab čarhovy raz kinuć jaje za kraty jak asudžanuju, — skazaŭ Andrej Šarenda. — A ekśpiertyzy jak takoj i nie było ciapier. Tolki pahutaryli ź joj, moža, z hadzinku, i ŭsio. Jana ž, jak atrymlivajecca, tolki tydzień tam była. Heta minimalny čas pamiž etapami».
«Na prahułki amal nie vyvodziać»
Pra toje, jak ciapier pačuvajecca i jak vyhladaje Palina Šarenda-Panasiuk, źviestak niašmat.
«Vielmi blednaja. Bo na prahułki miesiac nie vyvodzili i, mahčyma, ciapier amal nie vyvodziać. Jaŭna schudnieła. I psichałahična joj paśla etapaŭ vielmi ciažka», — kaža muž palitźniavolenaj Andrej.
18 lipienia stała viadoma, što Palina chvoraja na «chraničny pankreatyt siaredniaj ciažkaści» — vielmi niebiaśpiečnuju dla zdaroŭja chvarobu, lekavańnie jakoj uskładniajecca va ŭmovach źniavoleńnia. Pra dyjahnaz svajakam stała viadoma z aficyjnaha adkazu administracyi papraŭčaj kałonii № 24, dzie trymajuć palitźniavolenuju Šarendu-Panasiuk.
Palina Šarenda-Panasiuk znajšłasia ŭ homielskim SIZA
Palinu Šarendu-Panasiuk vyvieźli z Centra sudovych ekśpiertyz u Navinkach
«Taki dyjahnaz va ŭmovach Paliny — jak śmiarotny prysud». Svajaki palitźniavolenaj Šarendy-Panasiuk daviedalisia pra jaje chvarobu
«Psichałahičny stan vielmi składany». Źjavilisia naviny pra palitźniavolenuju Šarendu-Panasiuk
Na Palinu Šarendu-Panasiuk znoŭ zaviali kryminalnuju spravu za niepadparadkavańni administracyi
Palina Šarenda-Panasiuk nie vyjšła na svabodu. Jana znajšłasia ŭ Homielskim SIZA
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary