ZŠA pryznali apanienta Madury pieramožcam prezidenckich vybaraŭ u Vieniesuele, ale z udakładnieńniem

ZŠA ŭ čaćvier pryznali kandydata ad apazicyi Edmunda Hansalesa pieramožcam sprečnych prezidenckich vybaraŭ u Vieniesuele, adkinuŭšy zajavy dziejnaha prezidenta Nikałasa Madury ab jahonaj pieramozie, piša «Hołas Amieryki» sa spasyłkaj na Reuters.

«Uličvajučy šmatlikija śviedčańni, Złučanym Štatam i, što samaje važnaje, vieniesuelskamu narodu vidavočna, što Edmunda Hansales Urucija atrymaŭ bolšaść hałasoŭ na prezidenckich vybarach u Vieniesuele 28 lipienia», — zajaviŭ dziaržsakratar ZŠA Entani Blinkien u čaćvier.

Adnak Vašynhton abmiežavaŭsia vinšavańniem Hansalesa z paśpiachovaj kampanijaj, ustrymaŭšysia ad jaho pryznańnia novym lidaram Vieniesueły.

Sprečki ab vynikach prezidenckich vybaraŭ vyklikali pratesty ŭ Vieniesuele. Vybarčaja rada Vieniesueły abvieściła Maduru, jaki kiruje krainaj z 2013 hoda, pieramožcam vybaraŭ 28 lipienia, jaki atrymaŭ 51 adsotak hałasoŭ.

Adnak apazicyja krainy zajaviła, što, pavodle jaje źviestak, paśla apracoŭki prykładna 90% hałasoŭ Hansales atrymaŭ u dva razy bolš padtrymki, čym dziejny prezident. Heta adpaviadaje danym niezaležnych apytańniaŭ, praviedzienych pierad vybarami.

Apazicyja apublikavała padrabiaznyja vyniki na publičnym sajcie, a ŭrad pakul nie pradastaviŭ nijakaj infarmacyi akramia ahulnaj kolkaści hałasoŭ, padadzienych za kožnaha kandydata.

U svajoj zajavie Blinkien ustrymaŭsia ad pahroz novych sankcyj suprać Vieniesueły, ale namiaknuŭ na mahčymyja «pakarańni». Ahienctva Reuters paviedamiła ŭ aŭtorak, što Vašynhton razhladaje mahčymaść uviadzieńnia novych sankcyj paśla sprečnych vybaraŭ.

«My całkam padtrymlivajem praces adnaŭleńnia demakratyčnych normaŭ u Vieniesuele i hatovyja razhledzieć mahčymaści jaho padtrymki razam z našymi mižnarodnymi partniorami», — adznačyŭ Blinkien.

Dziaržsakratar ZŠA taksama zaklikaŭ zabiaśpiečyć abaronu lidaraŭ apazicyi.

«Pravaachoŭnyja orhany i siły biaśpieki nie pavinny stać instrumientam palityčnaha hvałtu, jaki vykarystoŭvajecca suprać hramadzian, jakija ažyćciaŭlajuć svaje demakratyčnyja pravy», — skazaŭ jon.

Prezidenty Brazilii, Mieksiki i Kałumbii zaklikali Vieniesuełu apublikavać padrabiaznyja vyniki hałasavańnia.

• 3
• 0
• 2
• 0
• 0
• 0
• 0
• 0