Jak prachodzili pieramovy, što pryviali da samaha bujnoha abmienu źniavolenymi z času chałodnaj vajny
Žurnalistam CNN atrymałasia pahavaryć z tuzinam aficyjnych asob ZŠA, jakija padzialilisia niekatorymi abstavinami doŭhaha šlachu da realizacyi abmienu źniavolenymi.
CNN piša, što administracyja Bajdena na praciahu mnohich hadoŭ damahałasia vyzvaleńnia byłoha marskoha piechacinca Poła Uiłana, jaki byŭ zatrymany ŭ 2018 hodzie pa abvinavačańni ŭ špijanažy i prysudžany da 16 hadoŭ źniavoleńnia.
U studzieni 2023 hoda supracoŭniki amierykanskaj raźviedki sustrelisia sa svaimi rasijskimi kalehami ŭ nienazvanaj treciaj krainie, kab prapanavać abmianiać Uiłana na dvuch rasijskich hramadzian, jakija ŭtrymlivajucca ŭ Słavienii. Rasija čarhovy raz adchiliła hetuju prapanovu. Admova była i ŭ sakaviku taho ž hoda ŭ telefonnaj razmovie z dyrektaram CRU Uiljamam Biernsam.
U tym samym miesiacy rasijskija śpiecsłužby aryštavali žurnalista The Wall Street Journal Evana Hierškoviča za špijanaž. Ciapier ruskija, jakija zvyčajna imknucca da parytetu ŭ svaich ździełkach, chacieli atrymać naŭzamien dva vysokakaštoŭnyja abjekty.
Ale prablema ŭ tym, što ŭ amierykancaŭ nie było kaho prapanavać. Administracyja Bajdena ŭžo abmianiała ŭ śniežni 2022 hoda svajho samaha kaštoŭnaha rasijskaha źniavolenaha, handlara zbrojaj Viktara Buta na baskietbalistku Brytni Hrajnier. Čynoŭniki pačali šukać pa ŭsim śviecie rasijskich źniavolenych, zajmajučysia cichaj dypłamatyjaj z sajuźnikami, kab znajści inšyja abjekty dla zaklučeńnia ździełki.
U listapadzie 2023 hoda supracoŭniki CRU ŭ Maskvie prapanavali abmianiać čatyroch rasijskich źniavolenych, jakija znachodzilisia ŭ Narviehii, Polščy i Słavienii, na Uiłana i Hierškoviča.
Ale Rasija adchiliła hetuju prapanovu. Amierykanskamu boku stała zrazumieła, što Maskvie patrebny Vadzim Krasikaŭ. Nichto inšy jaje nie zadavolić.
Pryciahnieńnie niemcaŭ na svoj bok
Takim čynam, klučom da ździełki stała zdolnaść prezidenta Bajdena pierakanać kanclera Hiermanii Ołafa Šolca vyzvalić Krasikava. Urad ZŠA, pracujučy praz raźviedku, Dziarždepartamient i Radu nacyjanalnaj biaśpieki, pavinien byŭ pierakanać urad Hiermanii abmianiać jaho.
Byli jašče tajemnyja pieramovy, jakija vialisia pa sakretnym kanale CRU. Jon užo šmat hadoŭ vykarystoŭvajecca dla viadzieńnia dalikatnaj dypłamatyi z Maskvoj. U čas niekatorych pieramovaŭ viałasia razmova ab mahčymym vyzvaleńni Alaksieja Navalnaha ŭ abmien na Krasikava.
Na sustrečy G7 u krasaviku 2023 hoda Blinkien vykazaŭ ideju ab pieradačy Krasikava ministru zamiežnych spraŭ Hiermanii Analenie Bierbok. Ale taja, pa słovach amierykanskaha čynoŭnika, padzialiłasia ź Blinkienam svaimi aściarohami, u tym liku mierkavańniem, što Navalny paśla abmienu znoŭ vierniecca ŭ Rasiju.
Na praciahu ŭsiaho 2023 hoda aficyjnyja asoby cicha pracavali nad tym, kab niamiecki ŭrad pahadziŭsia vyzvalić Krasikava. U pieramovach byli zadziejničany prezident ZŠA Džo Bajden i vice-prezident Kamała Charys.
Bajden uźniaŭ hetaje pytańnie ŭ razmovie z Šolcam u studzieni 2024 hoda, a zatym u lutym padčas sustrečy ŭ Avalnym kabiniecie. Pa słovach pradstaŭnika administracyi, na toj momant amierykanskija čynoŭniki ličyli, što ździełka maje ŭsie šancy adbycca.
Na sustrečy ŭ Avalnym kabiniecie, pa słovach vysokapastaŭlenaha pradstaŭnika administracyi, «kancler Šolc adkazaŭ prezidentu: «Dziela vas ja zrablu heta». «Zatym prezident paviarnuŭsia da Džejka (Salivan, daradca pa nacyjanalnaj biaśpiecy ZŠA — NN) i skazaŭ: «Zrabi heta», — skazaŭ čynoŭnik.
Śmierć Navalnaha
Paśla toj lutaŭskaj sustrečy Salivan rehularna pieradavaŭ u Bierlin śpisy ruskich, jakich možna było b abmianiać. Ale płany parušyła śmierć Navalnaha 16 lutaha 2024 hoda.
Navina pryjšła ŭ pieršyja hadziny Miunchienskaj kanfierencyi pa biaśpiecy, i heta pastaviła ŭsio pad pahrozu.
Kamała Charys, jakaja była na kanfierencyi, zaviaršyŭšy zapłanavanuju sustreču z Ołafam Šolcam, paprasiła ŭsich supracoŭnikaŭ pakinuć pakoj dla praviadzieńnia «abmiežavanaj dvuchbakovaj sustrečy». Padčas razmovy sam-nasam Charys zmahła nacisnuć na Šolca, padkreśliła, što vyzvaleńnie Krasikava budzie mieć vyrašalnaje značeńnie dla zaklučeńnia ździełki.
Paśla śmierci Navalnaha Džejk Salivan daručyŭ svajoj kamandzie skłaści śpisy ludziej, jakija mohuć ujaŭlać cikavaść dla Hiermanii.
Pa słovach amierykanskaha čynoŭnika, śpis byŭ składzieny ŭ kancy sakavika 2024 hoda. U krasaviku prezident Bajden nakiravaŭ list Šolcu, i ŭ pačatku červienia niemcy narešcie pahadzilisia vyzvalić Krasikava.
Klučavym momantam, pavodle słoŭ niekalkich amierykanskich čynoŭnikaŭ, było ŭklučeńnie ŭ śpis Uładzimira Kara-Murzy i jašče siami rasijskich palitviaźniaŭ.
Maskva zhodnaja
ZŠA pryjšłosia ŭhavorvać nie tolki Hiermaniju. Jašče ŭ Miunchienie Charys paprasiła ab sustrečy z premjer-ministram Słavienii Robiertam Hołabam. Pavodle słoŭ pradstaŭnika Biełaha doma, hałoŭnaj metaj hetaj sustrečy było akazańnie cisku na premjer-ministra, kab jon dabiŭsia vyzvaleńnia dvuch rasijskich hramadzian, jakija znachodziacca pad vartaj u Słavienii.
Prezident ZŠA taksama akazvaŭ cisk na słaviencaŭ. Litaralna za niekalki chvilin da abviaščeńnia ab zaviaršeńni svajoj kampanii 2024 hoda, Bajden patelefanavaŭ premjer-ministru Słavienii, kab zaklikać jaho davieści ździełku da finišnaj rysy.
U kancy červienia 2024 hoda supracoŭniki CRU praviali sakretnuju sustreču z aficerami rasijskaj raźviedki ŭ nienazvanym blizkaŭschodnim horadzie, kab pradstavić novuju prapanovu ab mahčymym abmienie źniavolenymi. Na hety raz CRU prapanavała ŭklučyć u śpis Vadzima Krasikava. Uzamien na kilera amierykancy chacieli atrymać byłoha marskoha piechacinca Poła Uiłana i žurnalista Evana Hierškoviča.
Rasijskija čynoŭniki viarnulisia z hetaj prapanovaj u Maskvu. U pačatku lipienia ŭ telefonnaj razmovie z dyrektaram CRU Uiljamam Biernsam rasijski bok paviedamiŭ amierykancam, što ŭ pryncypie zhodny na ździełku, ale kankretnyja detali jašče treba ŭdakładnić.
17 lipienia Maskva aficyjna pryniała ŭmovy, pieradaŭšy svoj adkaz CRU i pakłaŭšy pačatak najbujniejšamu z časoŭ chałodnaj vajny abmienu źniavolenymi. Heta było nadziva chutkaje zaviaršeńnie šmathadovych karpatlivych pieramovaŭ pamiž ZŠA i bolš čym paŭtuzinam krain.
Pasoł ZŠA ŭ Turcyi Džef Fłejk skazaŭ, što ŭ apošnija niekalki tydniaŭ isnavaŭ pastajanny strach, što damova moža sarvacca, asabliva z ulikam vialikaj kolkaści detalaŭ abmienu i kolkaści ŭdzielnikaŭ.
«My prosta bajalisia, što jakaja-niebudź uciečka sapsuje ŭsio», — skazaŭ Fłejk u intervju CNN z Turcyi. Pavodle słoŭ pasła, jaho pryciahnuli da pracy «ŭsiaho paru tydniaŭ tamu», kali abmien nabližaŭsia da zaviaršalnaj stadyi. «Pra heta viedali vielmi i vielmi niamnohija», — adznačyŭ pasoł.
Bajpoł nazvaŭ imiony mahčymych zabojcaŭ Andreja Zielcera. I zajaviŭ, što siłavika «Nirvanu» zastreliŭ svoj ža4
Kamientary