Ci mohuć demakratyčnyja siły vyzvalić palitviaźniaŭ praz svaju dyskredytacyju? Heta iluzija

Krainy, pa jakich viadomyja paśpiachovyja kiejsy — heta ZŠA, Ukraina, Izrail.

ZŠA ŭ poŭnaj miery vykarystoŭvajuć dypłamatyčny cisk. Uvodziać sankcyi i prymianiajuć adkaznaść za ich parušeńnie.

Dla taho, kab mieć mahčymaść prymianiać padobny instrumient, ZŠA vałodaje adnym z najbujniejšych u śviecie rynkaŭ. Adzinaje, što źjaŭlajecca tym ryčahom, jaki robić sankcyi dziejsnymi — heta kałasalnyja straty ad niemahčymaści dostupu na hety rynak.

Supastaŭnaj značnaściu vałodaje rynak ES. I tolki tamu sankcyi ZŠA i ES dziejsnyja, u adroźnieńnie ad sankcyj RF i administracyi Łukašenki. Sankcyi krain ź niepryvabnymi rynkami mohuć upłyvać tolki na hramadzian hetych krain, i tak uraźlivych ekanamična.

Jašče ZŠA lidzirujuć u najmahutniejšym na siońnia vajskovym sajuzie. I vałodajuć mižnarodnym upłyvam, dastatkovym dla taho, kab nie tolki jany, ale i ich sajuźniki ŭnosili svoj układ u abmien hramadzian ZŠA.

Izrail nie vałodaje ekanomikaj i dypłamatyjaj, supastaŭnaj z ZŠA, vidavočna z pryčyny maštabu. Jany ŭžyvajuć mienš vytančanyja sankcyi — u vyhladzie rakietnych udaraŭ pa lidarach CHAMAS i «Chiezbały», jakija arhanizavali masavyja zabojstvy izrailcian.

Izrail eskaluje vajennyja dziejańni. Izrail vałodaje abmiennym fondam u vyhladzie vajennapałonnych z varožaha boku i nie baicca atakavać, kali praciŭnik zaciahvaje z vyzvaleńniem zakładnikaŭ. Izrail vałodaje mižnarodnaj padtrymkaj, dastatkovaj dla ažyćciaŭleńnia padobnych rašučych dziejańniaŭ.

Ukraina nie vałodaje mahčymaściu nanosić rakietnyja ŭdary ŭzroŭniu Izraila, jakija źniščajuć lidaraŭ terarystyčnych hrupovak.

Adnak Ukraina nie baicca nanosić udary pa vajskovych abjektach i NPZ na terytoryi praciŭnika, za kožny ź jakich joj pahražali jadziernaj zbrojaj. Na siońnia pahrozy hetyja vyjavilisia blefam. A škoda dla aeradromaŭ i NPZ praciŭnika — realnaja. Da taho ž Ukraina vałodaje abmiennym fondam vajennapałonnych i vykarystoŭvaje jaho.

Jak bačym, isnuje raznastajny arsienał zachadaŭ, jakija histaryčna nahladna prajavili siabie dziejsnymi dla vyzvaleńnia zakładnikaŭ i vajennapałonnych.

Ale nie mienš važna razumieć pieralik zachadaŭ, jakija nikoli nie pryvodzili da vyzvaleńnia zakładnikaŭ.

My nie bačym histaryčnych prykładaŭ, kali admova ad sankcyj pryvodziła da vyzvaleńnia zakładnikaŭ i vajennapałonnych. Dziarždep ZŠA čamuści nie vieryć u hetuju stratehiju. My nie bačym histaryčnych paśpiachovych kiejsaŭ, kali dypłamatyčnaje pryznańnie vyzvalała zakładnikaŭ. Izrail hetaha punktu hledžańnia nie prytrymlivajecca. Nie śpiašajecca pryznavać CHAMAS i «Chiezbału» i ŭstaloŭvać ź imi adnosiny. USU nie spyniajuć vajennyja ŭdary pa terytoryi praciŭnika, niahledziačy na kolkaść vajennapałonnych.

Važnaje pytańnie: dziela čaho Łukašenku naohuł treba vypuskać palitviaźniaŭ? Jakija ŭ nas jość padstavy mierkavać što jon zachoča ich vypuścić, kali atrymaje žadanaje?

Naadvarot, isnuje našmat bolš padstaŭ vykazać zdahadku, što atrymaŭšy ŭsio žadanaje, svaju častku jon nie vykanaje.

Jakaja pryčyna ŭ jaho pavinna być dla vykanańnia abiacańnia? Etyka? Jaje tam niama. Kali vyhada, to jakaja? Pucinu heta było treba dla viartańnia svaich špijonaŭ i najomnych zabojcaŭ. Rasija vydavała vajskoŭcaŭ USU ŭ abmien na rasijskich žaŭnieraŭ. CHAMAS vydavaŭ zakładnikaŭ dziela niekalkich dzion pieradyški ad izrailskich napadaŭ.

U Łukašenki dla vydačy zakładnikaŭ niama realnych pryčyn. Niama ni žyćciova važnych patrebaŭ, ni pahroz, ad jakich vydača zakładnikaŭ moža vyratavać.

Napadaŭ na jaho vajskovyja bazy i rezidencyi nie idzie. Z važnych dla jaho ludziej nichto nie aryštavany (pakul). Na siońnia ŭ vyšuku kala 10 słužbovych asob (4 z boku ZŠA pa spravie «Rajanejr» i 6 z boku Polščy za katavańni ŭ biełaruskich turmach).

Kali pahladzieć na bałans ryzyki i vyhody dla Łukašenki: chiba vyhoda ad pryznańnia jaho ŭłady niekalkimi palitykami ŭ vyhnańni pieravažvaje ryzyku ad vyzvaleńnia tysiač zakładnikaŭ, mnohija ź jakich vałodajuć palityčnym upłyvam?

Masavaje vyzvaleńnie biełaruskich palitykaŭ i aktyvistaŭ — heta ŭžo ekzistencyjnaja pahroza dla ŭstojlivaści ŭłady Łukašenki. U paraŭnańni z takoj pahrozaj adsutnaść pryznańnia z boku demakratyčnych sił naŭrad ci moža stvarać ciažkaści taho ž uzroŭniu.

Pry hetym u administracyi Łukašenki biezumoŭna razumiejuć, što najaŭnaść u ich zakładnikaŭ — adzin z hałoŭnych ryčahoŭ ich upłyvu. Hetak ža sama ŭ administracyi Łukašenki razumiejuć, što dla palityčnaha źniščeńnia ich praciŭnikaŭ patrebnaja ich maksimalnaja dyskredytacyja.

Dyskredytavać tych, chto siadzić u turmie, jak bačym, navat dla Łukašenki vielmi składana — ź niekalkich tysiač palitviaźniaŭ tolki adzinki pajšli na supracoŭnictva ź im. Ale jak moža administracyja Łukašenki dyskredytavać palityčnych apanientaŭ na voli?

Dla hetaha jana praz zručnyja kanały prasoŭvaje kanśpirałahičny naratyŭ. Jak byccam adzinaje, što pieraškadžaje vychadu na volu zakładnikaŭ — heta nie žorstkaje asabistaje rašeńnie Łukašenki, a ŭsiaho tolki «niazhodlivaść demakratyčnych palitykaŭ».

U jakaści padobnych kanałaŭ mohuć vystupać svajaki palitviaźniaŭ, jakija buduć vykarystanyja bieź viedańnia pra realnyja matyvy «znajomych libieralnych dobrazyčliŭcaŭ sa śpiecsłužbaŭ», i tamu maksimalna ščyryja ŭ imknieńni paŭpłyvać na situacyju. Akramia taho, heta mohuć być ludzi, jakija dobrasumlenna pamylajucca adnosna matyvaŭ i nastupstvaŭ prasoŭvańnia takoj kanśpirałohii. Siarod kanałaŭ, zrazumieła, taksama buduć ahienty ŭpłyvu, papulisty, situacyjnyja sajuźniki.

Praz hetyja kanały ŭ publičnuju prastoru i pa asabistych kantaktach ukidvajecca ideja, što dla vyzvaleńnia palitviaźniaŭ nieabchodna ŭsiaho tolki pryznać uładu Łukašenki i paprasić ab pamiłavańni.

Dalejšyja dziejańni mohuć iści pa dvuch trekach. Kali demakratyčnyja palityki pahodziacca publična pryznavać uładu Łukašenki i prasić ab pamiłavańni źniavolenych — heta adrazu daje mahčymaści:

• vystaŭlać dadatkovyja nievykanalnyja patrabavańni. Naprykład — viarnucca ŭ Biełaruś i sieści ŭ turmu zamiest palitviaźniaŭ (jak užo prapanoŭvali Polščy vydać Łatušku ŭ abmien na Pačobuta);
  
  
• vykarystoŭvać hetyja zajavy ŭ pieramovach ź ES i ZŠA, apielujučy da taho, što «pakolki palityki, jakich vy padtrymlivali 4 hady, užo pryznali našu ŭładu — niama nijakich pieraškod dla adnaŭleńnia dypłamatyčnych adnosin»;
  
  
• nie vypuskać palitviaźniaŭ (pakolki navošta ryzykavać aktyvam dla handlu) abo, vypuskajučy 20 čałaviek, aryštoŭvać 80, jak adbyvałasia niadaŭna, kab, z adnaho boku, prademanstravać bačnaść dobraj voli, ale z druhoha — adnačasova ŭzmacniać svaje pieramoŭnyja pazicyi praz pavieličeńnie kolkaści zakładnikaŭ.

Kali palityki admoviacca publična dyskredytavać siabie, pryznajučy ŭładu i prosiačy ab pamiłavańni — prasoŭvać praz ahientaŭ upłyvu abo hramadzian, jakija dobrasumlenna pamylajucca, kanśpirałahičny naratyŭ. Jak byccam vina za toje, što Łukašenka trymaje tysiačy nievinavatych ludziej u turmach, lažyć na demakratyčnych palitykach.

Režym tut pakazvajecca hatovym da vyzvaleńnia palitviaźniaŭ i adkrytym dla pieramoŭ, jakija zryvajucca nibyta tolki praz upartaść demakratyčnych sił. I takim čynam demakratyčnyja palityki buduć dyskredytavanyja jak amaralnyja ludzi, dla jakich asabistyja ambicyi važniejšyja, čym žyćci palitviaźniaŭ.

Najbolš vierahodnym vynikam luboha ŭciahvańnia ŭ teoryju zmovy, jakaja naviazvajecca administracyjaj Łukašenki, budzie nie vychad palitviaźniaŭ — a naadvarot, panižeńnie šancaŭ na ich vychad, až da poŭnaj straty. Pakolki paśla paśpiachovaj dyskredytacyi palitykaŭ, jakija dziejničajuć suprać Łukašenki, u jaho nie zastaniecca nijakich pryčyn dla taho, kab vypuskać palitviaźniaŭ.

Vypuskać dla čaho? Sankcyi i tak nie zdymuć z pryčyny padtrymki vajennaj ahresii Rasii. Adsutnaść dypłamatyčnaha pryznańnia režym, miarkujučy pa jaho dziejańniach, nie ličyć nastolki dla siabie niebiaśpiečnym, jak vychad tysiač zakładnikaŭ na volu. Biez dypłamatyčnaha pryznańnia režym 4 hady praciahnuŭ, a biez zakładnikaŭ paśla 2020 hoda Łukašenka navat dzień pražyć aścierahajecca.

Ci treba pry hetym rabić namahańni dla arhanizacyi vydačy adzinkavych palitviaźniaŭ u ramkach nie publičnaha i nie palityčnaha humanitarnaha treku? Kali ŭ niejkich subjektaŭ jość takija mahčymaści i ŭpłyŭ, to vykarystoŭvać ich, zrazumieła, treba.

Pry hetym treba ŭśviedamlać, što režym budzie vykarystoŭvać hety trek dla apraŭdańnia ŭtrymańnia astatnich tysiač palitviaźniaŭ, i nie dapamahać jamu ŭ raspaŭsiudzie hetaha falšyvaha naratyvu.

Śćviardžeńnie, što dla vydačy bolšaj kolkaści palitviaźniaŭ nie chapaje jakich-niebudź pryznańniaŭ abo zajaŭ — nie treba padtrymlivać. Nie treba padtrymlivać nie tamu, što jano karysnaje abo škodnaje, a tamu, što pa ŭsich prykmietach hetaje śćviardžeńnie chłuślivaje. Falsifikacyi ž nie treba ni apraŭdvać, ni raspaŭsiudžvać, biez zaležnaści ad taho, kali navat pryčyna ich raspaŭsiudžvańnia zdajecca ŭ momancie vysakarodnaj.

Dyk što ž usio ž taki možna zrabić dla vychadu palitviaźniaŭ? Nieabchodna praciahvać stvarać realnyja pryčyny dla ich vydačy. Dla padobnaha režymu heta moža być tolki naroščvańnie niehatyŭnych nastupstvaŭ ad dalejšaha ŭtrymańnia zakładnikaŭ.

• 36
• 3
• 1
• 0
• 0
• 1
• 1
• 3