Cichanoŭskaja: Nijakija zachopnickija pamknieńni Rasii nie zmohuć pieramahčy ŭkrainski narod

«Kožny dzień, užo bolš za dva z pałovaj hady, śviet stanovicca śviedkam vašaj niepachisnaści, siły duchu i addanaści baraćbie za svabodu i niezaležnaść. Biasstrašna baroniačy svaju krainu ad ahresara, vy natchniajecie na baraćbu mnohija narody, u tym liku i biełarusaŭ. A vašyja pośpiechi na poli boju i ŭ dypłamatyi, vašaje adzinstva, samaarhanizacyja — užo ŭvajšli ŭ padručniki historyi», — adznačyła Śviatłana Cichanoŭskaja.

Jana źviartaje ŭvahu na toje, što ciaham apošnich tydniaŭ ukraincam udałosia vycisnuć akupanta na jaho terytoryju, a padziei ŭ Kurskaj vobłaści ŭrazili navat samych vialikich skieptykaŭ.

«Taksama vam udałosia ratyfikavać Rymski statut — vialiki krok da adnaŭleńnia spraviadlivaści, jaki dazvolić pryciahnuć da adkaznaści vinavatych u złačynstvach. Navat u samych ciažkich umovach vajny, vy dziejničajecie zhodna z pravam i mižnarodnymi abaviazacielstvami. I samaje važnaje — vy nie hublajecie čałaviečnaści. Navat kali Rasija skidvaje bomby na dziciačyja špitali. Navat kali namahajecca pakinuć ukrainskija harady bieź śviatła i ciapła, a praz prapahandu — pazbavić viery i nadziei», — kaža Śviatłana Cichanoŭskaja.

«Nijakija zachopnickija pamknieńni Rasii nie zmohuć pieramahčy ŭkrainski narod. Vašaja advaha natchniaje ŭsich nas. I ja hanarusia tym, što biełaruskija dobraachvotniki zmahajucca popleč z ukraincami, za našu i vašu svabodu. Bo losy našych krain uzajemaźviazanyja. Nie budzie svabodnaj Biełarusi biez svabodnaj Ukrainy, a biez svabodnaj Biełarusi nie budzie biaśpiečnaj Jeŭropy», — zaznačyła nacyjanalnaja lidarka. 

«My majem nie tolki ahulnyja staronki ŭ historyi, ale i ahulnyja kaštoŭnaści. Navat takija važnyja słovy ŭ našych rodnych movach — kachańnie, baćkaŭščyna, zmahańnie, hodnaść, niezaležnaść — hučać padobna.

Jak pakazvaje historyja, niezaležnaść nikoli nie dajecca lohka. Jaje treba adstojvać, i vy robicie heta ź vialikaj hodnaściu. Vašaja pieramoha stanie pieramohaj nad ciemraj i stracham. I hałoŭnaje — nad tymi, chto sprabuje skraści vašuju niezaležnaść. Z Dniom Niezaležnaści i Słava Ukrainie!» — padkreśliła Śviatłana Cichanoŭskaja.

• 3
• 1
• 0
• 0
• 0
• 0
• 0
• 0