Dobraachvotnik Hrot: Tvaja kraina ŭ akupacyi, što ty robiš, kab jaje vyzvalić?
U novym vypusku tok-šou «Žyćcio-malina» były biełaruski dobraachvotnik Arciom «Hrot» Kuźmič vykazaŭ svajo mierkavańnie adnosna taho, čamu mała biełarusaŭ vajuje va Ukrainie, i čamu jon ličyć biełarusaŭ «amal miortvaj nacyjaj».
Kuźmič adznačaje, što nielha paraŭnoŭvać represiŭnuju mašynu ŭ Biełarusi i va Ukrainie. Jon upeŭnieny, što ŭ Biełarusi jaje možna pieramahčy tolki zbrojaj.
«Tolki vajavać. Ludzi vychodzili na pratesty tamu, što Łukašenka akupavaŭ ich krainu. Kraina ŭ akupacyi. Prajšło čatyry hady z času pratestaŭ. Tvaja kraina ŭ akupacyi. Što ty robiš, kab jaje vyzvalić?
Što robiać sotni biełarusaŭ, jakija vajujuć va Ukrainie, mnie zrazumieła. Što robiać dziasiatki i sotni tysiač biełarusaŭ, jakija znachodziacca ŭ Jeŭropie, mnie niezrazumieła», — vykazvaje svaju pazicyju Kuźmič.
Mužčyna tłumačyć, što ŭ luboj nacyi kala 2% nasielnictva składajuć voiny. Ale jon zadajecca pytańniem, dzie ŭ Biełarusi hetyja ludzi.
«Nas 10-miljonnaja kraina. Dva adsotki — heta 200 tysiač ludziej. Dzie hetyja 200 tysiač štykoŭ? Čamu jany nie pryjechali siudy (va Ukrainu — NN), nie ŭziali ŭ ruki zbroju, nie zrabili biełaruskuju armiju i nie vyzvalili svaju krainu?», — zadajecca pytańniem «Hrot» i daje svoj adkaz na jaho.
«Pa-pieršaje, bolšaść bajaźliŭcaŭ. Pa-druhoje, bolšaść nie padzialaje dumku pra toje, što Rasija — naš vorah».
Kuźmič zhadvaje, što jon pryjechaŭ vajavać va Ukrainu z tym, kab potym zmahacca z akupacyjaj Biełarusi. Ale na siońniašni momant vyzvaleńnie Biełarusi «vyhladaje amal niemahčymym».
«Chutčej za ŭsio, heta tak i zastaniecca. Zastaniecca niemahčymym. Pa pryčynie taho, što biełarusy nie chočuć vajavać za svaju krainu. Maksimum jany chočuć vyjści z šarykami, ściažkami, źniaŭšy abutak, zaleźci na łavu, pakryčać «Dałoŭ». Potym jany bačać pahrozu i raźbiahajucca pa chatach».
«Hrot» adznačaje, što razumieje, čamu tak adbyvajecca, i prapanuje rašeńnie:
«Represiŭnaja mašyna Biełarusi našmat macniejšaja [za ŭkrainskuju]. Realna vielmi ciažka supraćstajać AMAPu na vulicy. Tady što treba rabić? Treba šukać šlach, jak vajavać suprać hetaha voraha. Jon tolki adzin, i [znachodzicca] va Ukrainie.
Ukraina daje placoŭku. Adna sprava, kali heta było ŭ 2014-m hodzie. Tady było ciažka zrabić niejkaje biełaruskaje farmiravańnie. Z pačatkam poŭnamaštabnaj vajny 2022-ha hoda pryjechali b 100 tysiač, im by vydali zbroju, zabieśpiačeńnie, techniku, i jany mahli b rabić što chacieli ŭ płanie svaich namieraŭ. (…) Jany mahli b z Ukrainy iści kudy zaŭhodna. Ale jany nie pajechali».
Mužčyna adznačaje, što jon z pavahaj adnosicca da tysiač ludziej, jakija znachodziacca ŭ Biełarusi ŭ źniavoleńni, ludziej, jakija zahinuli ad katavańniaŭ, tych, chto źnik bieź viestak, i tych, chto adsiedzieŭ, vyjšaŭ i zrazumieŭ, što pratestu niama i źjechaŭ va Ukrainu vajavać.
«Biełarusy — amal miortvaja nacyja»
U čas intervju Kuźmič taksama patłumačyŭ, čamu jon ličyć biełarusaŭ amal miortvaj nacyjaj.
«Tut pytańnie nie ŭ časie, a ŭ kolkaści. Biełarusaŭ, ja dumaju, kala 10 tysiač. Usie astatnija — heta nie biełarusy. (…) Heta maja dumka. Chto sa mnoj nie pahodzicca, moža pryjechać da mianie ŭ Kijeŭ, i ja ź im pahavaru. Ja jamu prosta dam u žban i na hetym usio skončycca», — kaža «Hrot» i dadaje:
«Ja nie imknusia być dypłamatam, vyhladać «dobrym chłopcam», kab mianie ŭsie lubili, na mianie padpisvalisia. Mianie heta zusim nie chvaluje. Ja jość tym, kim jość. Ja ŭpeŭnieny, što rablu pravilnyja rečy, ruchajusia pravilna i nikoli nidzie nie zvaročvaŭ.
Jak ja skazaŭ sabie 15 hadoŭ tamu, kali padarvali mietro (nasamreč 13 hadoŭ tamu, 11 krasavika 2011 hoda — NN), što ja budu ŭsio rabić suprać hetaha voraha, tak i ruchajusia dalej, źmianiajučy mietady ŭ zaležnaści ad svajho stanu zdaroŭja i hetak dalej. Ale jak ja pačaŭ, tak i ruchajusia.
Tamu, kali chto sa mnoju nie pahodzicca, ja mahu ŭ jaho ŭ adkaz spytać, a chto jon taki, što jon zrabiŭ takoha, kab ja ŭvohule jaho pavažaŭ i słuchaŭ».
Biełarus adpraviŭsia na vajnu paśla vypadkovaj sustrečy ź Niaklajevym. U 23 hady ŭ bai jon straciŭ nahu. Voś što jon robić ciapier
Ukraincaŭ skaryła VIDEA, jak vieteran na pratezie raźbiraje zavały dziciačaj kliniki ŭ Kijevie. Akazałasia, heta biełarus
«U nas tut svaja Biełaruś»: śpiecrepartaž z trenirovačnaj bazy pałka «Azoŭ» u Kijevie
Kamientary
To žie čto diełali priedyduŝije vołny emihracii pośle vsiech vosstanij -načinaja ot Kostiuško -słušajut Połoniez Ohinskoho! Po dannym raźličnych isśledovanij, čisło ludiej sostavlajuŝich biełorusskuju diasporu nachoditsia mieždu 2.5 i 3.5 millionami čiełoviek.