U Biełarusi jość limuzin Volvo z kartežu kiraŭnika HDR Chonekiera
Unikalnuju mašynu vystavili na prodaž u Biełarusi. Jaje ŭładalnik raskazaŭ vydańniu «Pieršy», što hety Volvo niekali byŭ u kartežy kiraŭnika Hiermanskaj Demakratyčnaj Respubliki Erycha Chonekiera! Uličvajučy mały tyraž, hetych mašyn zastalisia adzinki ŭ śviecie. Jak hety redki aŭtamabil trapiŭ u Biełaruś?
Limuzin Volvo 264 TE 1978 hoda vypusku. 2,7-litrovy bienzinavy ruchavik, aŭtamat, poŭny pryvad. 150 tysiač kiłamietraŭ prabiehu. Na sajcie abjaŭ jaho vystaŭlali za 8300 dalaraŭ. Stan, viadoma, patrabuje ŭkładańniaŭ. Ale ŭ vydatnym stanie takuju mašynu ŭ Hiermanii pradajuć siońnia za 30 tysiač dalaraŭ.
A znajści padobnyja ŭ prodažy možna vielmi redka. Usiaho było vypuščana 335 štuk takich limuzinaŭ. Vypuskali ich z 1977 pa 1983 hady. I bolšaść ź ich kupili dla kiraŭnictva tady kamunistyčnaj Hiermanskaj Demakratyčnaj Respubliki, a taksama dla śpiecsłužbaŭ hetaj krainy. Lidar HDR Erych Chonekier jeździŭ na padobnym limuzinie.
A hety «biełaruski» adkul?
Karespandent «Pieršaha» źviazaŭsia z uładalnikam limuzina Siarhiejem, kab vyśvietlić jaho historyju. Akazałasia, što ŭ jaho niekalki redkich aŭtamabilaŭ. Jon raskazaŭ, što kuplaŭ Volvo 264 TE ŭ Rasii ŭ byłoha hienierała KDB.
Siamimiesny limuzin ad Volvo 1978 hoda
«Jon kazaŭ, što ŭ savieckija časy słužyŭ u Hiermanii, a hety aŭtamabil byŭ kartežy supravadžeńnia Chonekiera. A paśla abjadnańnia Hiermanii (paśla 1990 hoda), byŭ vyviezieny ŭ Rasiju», — raskazaŭ Siarhiej.
Tak mašyna i była ŭ Rasii, pakul prykładna hadoŭ 7 tamu Siarhiej jaje nie vykupiŭ. Adnak da adnaŭleńnia sprava nie dajšła, kaža ŭładalnik, tamu što jon byŭ zaniaty inšymi, jašče bolš redkimi aŭtamabilami. U vyniku jon navat vystaviŭ mašynu ŭ prodaž, ale ciapier, kaža, patreba ŭ hetym adpała, znajšoŭsia čałaviek u Breście, jaki zojmiecca jaje adnaŭleńniem.
Uvojdzie nie ŭ kožny haraž
Siarhiej prajechaŭ na joj litaralna niekalki razoŭ.
«Adčuvańnie — jak karabiel. Viadoma, hetaja mašyna ŭładkavanaja dla kamfortu zadnich pasažyraŭ. Pra jaje minułaje ŭ śpiecsłužbach śviedčać niejkija mikrafony, jakija jość zzadu. Ja, kali ščyra, navat nie raźbiraŭsia, što za jany», — raskazaŭ Siarhiej.
Na fota mašyna, viadoma, vyhladaje sumna, doŭha stajała. Siarhiej kaža, što nie ŭvachodziła ŭ haraž. Ale jon zapeŭnivaje, što pierśpiektyvy na adnaŭleńnie ŭ jaje jość.
U 1970-ja hetaja mašyna vyhladała manumientalna
Što viadoma pra hetyja aŭtamabili
U tyja hady Šviecyja ličyłasia niejtralnaj krainaj. Mahčyma, tamu i źviartali ŭvahu na jaje aŭtapram roznyja kamunistyčnyja režymy. Pieršyja ekzemplary Volvo 264 TE byli vyrablenyja ŭ Šviecyi. A potym znakamitaja kampanija Bertone ŭ Italii vypuściła 335 takich limuzinaŭ. Bolšaść byli čornymi abo ciomna-sinimi.
Dva dadatkovyja kresły raskładajucca pierad zadnim siadzieńniem
Viadoma, što padobny limuzin byŭ u karala Šviecyi Karła XVI Hustava. Ale bolšaść usio ž pajechała dla partyjnaj i dziaržaŭnaj elity Uschodniaj Hiermanii.
264TE (rasšyfroŭvajecca Top Executive) byŭ stvorany na bazie Volvo 264. Mašynu padoŭžyli da 5,6 mietraŭ. Sałon staŭ siamimiesnym. U standartnaj kamplektacyi stajaŭ bienzinavy ruchavik 2,7 V6. Dla ŭradavych madelaŭ było śpiecabstalavańnie — racyja, sini majak, chaładzilnik, pryłady dla prasłuchoŭvańnia.
Abiŭku sałona zrabili ź niazvykłaha plušu. Uschodniehiermanskija kiraŭniki nie chacieli skuru, tamu što jana była padobnaja da «plebiejskaha» skurzamu, raspaŭsiudžanaha tady ŭ aŭto hetaj krainy.
Vidać, jakija miakkija kresły
Na zadnich siadzieńniach byli rehulavanyja śviacilniki dla čytańnia, a taksama rehulatar hučnaści huku kasietnaj mahnitoły. Dadatkova možna było zakazać firanki i telefon.
A jašče byŭ Volvo 264 TE landaulet — heta viersija takoha limuzina z adkidnym viercham. Dla paradaŭ.
Volvo 264 TE landaulet
Darečy
U kalekcyi Siarhieja jość jašče adzin aŭtamabil Volvo. Taksama davoli redki, tamu što jaho nazyvajuć adnym z samych niaŭdałych aŭto hetaj marki. Heta madel 66 GL. Takich małalitražak było vypuščana bolš za 100 tysiač štuk u 1975—1980 hadach. Ale zastałosia ich vielmi mała.
Mały Volvo 66 GL. Hetaja mašynka była dla prostych ludziej. Jaje stvaryli na bazie DAF, kali Volvo vykupiła bolšuju častku akcyj lehkavoha adździaleńnia hetaj kampanii
Rarytetny aŭtamabil koštam 610 tysiač rubloŭ sprabavali vyvieźci ź Biełarusi
«Žonka, viadoma, nie ŭ zachapleńni». Bieraściejec kupiŭ saviecki ŁAZ-699R za tysiaču dalaraŭ, a ŭkłaŭ užo 10 tysiač
«Ja bolš lublu vazić raśliny, čym ludziej». «Kvietkamabil» bresckaha sadoŭnika ludzi ŭžo paznajuć na vulicach
«Inšy b źlapiŭ, kab aŭtamabil chutčej pajechaŭ. A ja rablu, kab było mocna i pryhoža». Jak paleski majstar reanimuje staruju techniku
Cichanoŭskaja zaklikała biełarusaŭ paźbiahać vybaraŭ i nie pratestavać24
Kamientary