Kitaj paprasiŭ Biełaruś narmalizavać adnosiny z Polščaj — krynica
Takaja prośba ad Kitaja sapraŭdy prahučała, paćvierdziła «Našaj Nivie» krynica ŭ dypłamatyčnych kołach.
Ci aznačaje najaŭnaść prośby ad Kitaja pra narmalizacyju polska-biełaruskich adnosin, što adzin z samych viadomych biełaruskich palitviaźniaŭ Andrej Pačobut usio ž vyjdzie na svabodu? Što ciapierašnija chvali vyzvaleńnia robiacca dla taho, kab zasunuć jaho ŭ adnu z porcyj?
16 vieraśnia stała viadoma pra vyzvaleńnie čarhovaj hrupy palitźniavolenych — hetym razam 37 čałaviek. Atrymlivajecca, ahułam za apošnija try miesiacy daterminova vyjšli 120 palitźniavolenych. Apošni miesiac vyzvaleńni iduć partyjami štodvatydni.
Ładnuju čaścinu staranna zrežysiravanaj sustrečy ź nibyta pradstaŭnikami nacyjanalnych mienšaściej 12 vieraśnia Alaksandr Łukašenka pryśviaciŭ dakazvańniu, što Kitaj nie rekamiendavaŭ Minsku ničoha.
«Navošta amierykancam vajna? Pry čym tut adnosiny Biełarusi i Polščy? I pra što pieršy nikoli NIE havaryŭ sa Staršynioj KNR?» — havorycca ŭ padvodcy Natalli Ejsmant da videafrahmienta ŭ TH-kanale Puł piervoho, mienavita z takim padkreślivańniem vialikimi litarami i šryftam.
«U nas narmalnaje staŭleńnie da ich, narmalnaja palityka, davajcie supracoŭničać. Tam užo ŭ šalenstva pryjšli biznesoŭcy polskija … jany pytajucca ŭ kiraŭnictva Polščy, našto vy heta robicie, my ž tam hrošy zarablajem. … Jany sabie ŭžo nie tolki ŭ nahu vystralili, navat u hałavu. Ja razumieju, što nie moža być adna kraina tolki vinavataja, a druhaja nie, tamu ja i svajmu ŭradu kažu: nie treba svarycca z palakami, moža dzieści štości niedapracavali.
Davajcie budziem ź imi pa-dobramu, davajcie budziem rabić kroki nasustrač. Nie, jany tam kruciać-vierciać. Voś kitajcy Łukašenku prymusili, kab jon źmiakčyŭ palityku ŭ dačynieńni da Polščy. Z Kitajem my nie abmiarkoŭvali navat hetyja temy. Nikoli Si Czińpin, viedajučy mianie, nikoli nie skaža, što ty tam u Polščy štości zrabi. I kitajcy razumnyja i kiraŭniki, i śpiecsłužby, jany viedajuć, u čym pryčyna. Ale hałoŭnaje, voś ja vam klanusia, my nikoli hetaj temy z Kitajem nie abmiarkoŭvali, — dakazvaŭ Łukašenka. — I toje, što tudy mienš iduć siońnia ŭciekačoŭ, jak jany zajavili, u dva razy, nu čaho sabačycca ŭvieś čas ź imi, ja kažu, davajcie papiaredžvać afhancaŭ, heta ž afhancy, irakcy i siryjcy biahuć».
Alaksandr Łukašenka časta «klaniecca» ŭ roznych temach, naprykład, pra toje, što nichto nie falšavaŭ vynikaŭ vybaraŭ, heta zvyčajny dla jaho rytaryčny pryjom.
«Druhaja prablemy — nie ich kłopat, jak minimum — vyzvaleńnie palitźniavolenych. Jakich palitźniavolenych? Nu vy ž bačyli, što tvaryłasia ŭ spakojnaj, cichaj Biełarusi ŭ 20-m hodzie, — zahladajučy ŭ vočy deputatu, jakoha sam pryznačyŭ, Łukašenka ź nianaviściu ŭspaminaŭ mirnyja demanstracyi za sumlenny padlik hałasoŭ.
«Pravy čałavieka. Jakija pravy čałavieka?» — pytaŭsia Łukašenka.
«Pačobut, Pačobut, Pačobut! — praciahvaŭ Alaksandr Łukašenka. — Słuchajcie, dobra, zabirajcie. A jon: a ja tudy nie paje-je-jedu».
Mahčyma, heta vodhulle taho, što Andrej Pačobut — vydatny intelektuał, žurnalist i maralny lidar biełaruskich palakaŭ — kateharyčna admaŭlaŭsia pryznać svaju vinu i pahadzicca na departacyju ŭ Polšču ŭzamien za vyzvaleńnie. Miarkujučy pa ŭskosnaj infarmacyi, mienavita takimi byli pieršasnyja ŭmovy, jakija vystaŭlali jamu łukašysty.
«U čym ja nie maju racyju?» — rytaryčna zapytaŭ Alaksandr Łukašenka.
«Vy majecie racyju», — z saładžavaj uśmieškaj zakivaŭ deputat Pałaty pradstaŭnikoŭ Alaksandr Sonhin, jaki na hetaj sustrečy hraŭ rolu palaka.
Paviedamlałasia, što prezident Polščy Andžej Duda padčas vizitu ŭ Kitaj z 22 pa 26 červienia abmierkavaŭ sa staršyniom KNR Si Czińpiniem mihracyjny kryzis na miažy ź Biełaruśsiu i raskazaŭ pra hibiel polskaha žaŭniera paśla ataki mihranta. Andžej Duda papiaredziŭ kiraŭnika KNR Si Czińpina pra abvastreńnie situacyi na biełaruskaj miažy, mahčymym pierakryćci jaje i mahčymych nastupstvach hetaha dla kitajskaj łahistyki tavaraŭ.
U adkaz upieršyniu z momantu kryzisu na miažy Biełarusi z susiedziami MZS Kitaja aficyjna prakamientavała situacyju.
«Kitaj spadziajecca, što abodva baki buduć stavicca adzin da adnaho z pavahaj i buduć vyrašać prablemu šlacham kansultacyj, kab paźbiehnuć eskałacyi napružanaści», — adznačyli ŭ kitajskim MZS.
Praź miažu Biełarusi i Polščy prachodzić važny dla handlu Kitaja ź Jeŭrasajuzam čyhunačny maršrut. Kiraŭnik MZS Polščy Radasłaŭ Sikorski zajaŭlaŭ, što ŭrad moža razhledzieć mahčymaść poŭnaha zakryćcia miažy ź Biełaruśsiu praz kryzis ź mihrantami. Adnak takoha raniej nie adbyvałasia navat u momant vostraha mihranckaha kryzisu vosieńniu 2021 hoda, jaki papiaredničaŭ napadu Rasii na Ukrainu.
U paniaćcie narmalizacyi adnosinaŭ z Polščaj moža ŭvachodzić narmalizacyja situacyi na miažy i vyzvaleńnie aktyvista polskaj nacyjanalnaj mienšaści Andreja Pačobuta. Kitaj naŭrad ci moh stavić pytańnie pra vyzvaleńnie inšych palitźniavolenych ci palityčnyja reformy — jon i sam tatalitarnaja dziaržava, na heta niamožna raźličvać.
Što da Polščy, to jana davała sihnały pra hatoŭnaść adkryć niekatoryja pamiežnyja pierachody i aktyvizavać dvuchbakovyja kantakty. Mahčyma, Minsk nie nastolki zacikaŭleny ŭ hetym, kab śpiašacca z narmalizacyjaj.
Tym bolš što ź dziejańniaŭ Varšavy rabiłasia jasna, što zakryćcio tavarnaha ruchu praz Brest moža adbycca ŭ vypadku rezkaha paharšeńnia situacyi na miažy — a jaho nie adbyvajecca.
Što robicca ŭ hety momant z Andrejem Pačobuta — nieviadoma. Infarmacyi ad jaho za apošni čas nie dachodziła.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary11
Kamientary
Ale vy siabie čujecie?! Spadar Tvorca Sarokin nie nadzialaŭ kitajcaŭ ŭ svaich antyŭtopijaŭ hetkaj mocnaj i dalokasiažnaj ŭładaj. Vy ŭ svaim myśleńni pažadanym vystaŭlajecie dziadoŭ z CK KPK Ŭładarami polska-biełaruskaje miažy i dyktatarami miascovym pravadyrčykam (ja navat nie aceńvaćmaćmu jakaść "blizkaj ŭ kołach" pahudki).
Prydzicie vy ŭžo da ciamy
a jana z nami - nie ?