U Varšavie inšaziemcy stajali načami ŭ čarzie, kab zarehistravać aŭtamabil. Biełarus spaźniŭsia na adzin dzień i straciŭ hrošy
Biełarus Jaŭhien nabyŭ u Polščy matacykł i chacieŭ pastavić jaho na ŭlik. Niekalki razoŭ sprabavaŭ i zajmaŭ čarhu, ale kožny raz jamu nie ŭdavałasia atrymać zapavietny numarok. Uletku dla inšaziemcaŭ dziejničaŭ asobny miechanizm rehistracyi, i čerhi tady davodziłasia zajmać z nočy. U vyniku Jaŭhien zdoleŭ zarehistravać matacykł tolki na dzień paźniej, čym taho patrabavaŭ zakon. I atrymaŭ štraf. Pra kazus raskazała Gazeta Wyborcza, zaŭvažyŭ Most.
Da 26 žniŭnia ŭ Varšavie dla inšaziemcaŭ dziejničała admysłovaja pracedura pastanoŭki transpartnych srodkaŭ na ŭlik. U adroźnieńnie ad hramadzian krainy, emihranty pavinny byli źviartacca nie ŭ rajonnyja adździeły ŭpraŭleńnia administracyi i hramadzianskich spraŭ, a ŭ ahulnuju dla stalicy administracyju.
Ofis nie spraŭlaŭsia z płyńniu achvotnych, tamu tam uźnikali vielizarnyja čerhi — zajmać miesca davodziłasia z nočy. Jak zaŭsiody ŭ padobnych vypadkach, kala ofisa źjaviłasia hrupa pradprymalnych ludziej, jakaja zajmała čarhu, a potym pierapradavała jaje.
Biełarusy skardzilisia na prablemu — i praceduru ŭdaskanalili. Z 26 žniŭnia inšaziemcy staviać transpartnyja srodki na ŭlik pa miescy rehistracyi. Na rehistracyju transpartnaha srodku zakon advodzić tolki 30 dzion z momantu kupli. Tamu byli i tyja, chto nie paśpieŭ svoječasova. Jaŭhien — adzin ź ich.
Jon kupiŭ matacykł 1 červienia, a ŭ administracyju zdoleŭ prabicca tolki 2 lipienia. Spaźniŭsia na adzin dzień. Mužčyna sprabavaŭ vykarystać usie mahčymaści, kab vyrašyć prablemu ŭ termin. Ale i heta nie vyratavała ad štrafu ŭ pamiery 500 złotych.
«U mianie apuścilisia ruki»
Jaŭhien užo siem hadoŭ žyvie i pracuje ŭ Polščy. Jon zaniaty poŭny pracoŭny dzień, tamu doŭha čakać u čarzie i tym bolš dziažuryć u joj načami nie moh. Nie dačakaŭšysia numarka ŭ žyvoj čarzie, jon sprabavaŭ zapisacca na pryjom anłajn, ale ŭsie daty byli razabranyja.
Kali termin padychodziŭ da kanca, 27 červienia, jon napisaŭ va ŭpraŭleńnie list z prośbaj ab dapamozie. Ale tam adkazali tolki ahulnymi frazami: maŭlaŭ, płyń zvarotaŭ ad inšaziemcaŭ vyrasła, a administracyja prymaje miery, kab palehčyć rehistracyju transpartu. Biełarus padziakavaŭ za infarmacyju, ale napisaŭ, što jana nijak nie vyrašaje jaho prablemu.
Tady Jaŭhiena zaprasili na sustreču, ale pryznačyli jaje tolki na 2 lipienia, na dzień paźniej za apošni dzień, adviedzieny dla rehistracyi.
«Na nastupny dzień toj samy užand (upraŭleńnie), u jakim ja byŭ, pryniaŭ miery, kab aštrafavać mianie za zatrymku na adzin dzień. U mianie apuścilisia ruki», — raskazaŭ Jaŭhien.
«Ja dziejničaŭ z najlepšymi namierami, a sa mnoj abyšlisia jak z ašukancam»
Spačatku biełarus padumaŭ, što heta pamyłka, bo jon ceły miesiac sprabavaŭ prabicca ŭ akno dla rehistracyi. Ale akazałasia, što pamyłki tut niama: farmalna mužčyna nie paśpieŭ.
«Ja dziejničaŭ z najlepšymi namierami, a sa mnoj abyšlisia jak z ašukancam», — ździŭlajecca Jaŭhien.
Čynoŭniki kažuć, što ŭsie tałony, jakija byli ŭziatyja ŭ aŭtamacie ŭ toj dzień, byli absłužanyja. A ŭsie pracoŭnyja miescy, pryznačanyja dla rehistracyi aŭtatranspartu, byli adkrytyja. Da taho ž u liście Jaŭhien nie paviedamiŭ, što termin rehistracyi jahonaha aŭtamabila zakančvajecca 1 lipienia.
Na miažy z Polščaj kiroŭcam lehkavikoŭ moža stać značna lahčej
Jak źniać aŭtamabil z uliku ŭ Biełarusi, navat kali jaho daŭno ŭ vas niama ci mašyna ŭžo zarehistravana ŭ inšaj krainie
Zamiena paśviedčańnia kiroŭcy ŭ Biełarusi. Što treba viedać
Biełarusam davodzicca načavać na vulicy, kab padacca na mižnarodnuju abaronu — chto vinavaty?
Biełaruskija śpiecsłužby kupili na imia Ramana Pratasieviča dva aŭtamabili ŭ Polščy. Našto?
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA17
Kamientary
Taksama jak z čarhoj ŭ vizavyja centry "ŭdaskanalili" - z pašpartam fotkajsia padčas rehistracyi.
A nasamreč samaja ideja prymusovaje abaviazkovaje rehistracyi transpartu - złačynnaja. I ŭsie "ŭdaskanaleńni" złačynnaha hvałtu - bolšy źdzk z achviary