Nadzieja znajšła hrošy ŭ bankamacie, kali źbirałasia papoŭnić bałans karty. Onliner.by raspaviadaje, što było dalej.
— Ja była ŭ «Minsk-Arenie», i mnie treba było pakłaści hrošy na kartu. Ja viedała, što ŭnizie jość pryłada «MTBanka», padyšła da jaje i ŭbačyła, što tam, dzie treba pakłaści kupiury, užo lažać 10 rubloŭ, — raskazvaje Nadzieja. — Viadoma, navat nie było dumki skarystacca hetymi hrašyma, heta ž 10 rubloŭ! A kali surjozna, to z ulikam usich hetych historyj, jak ludzi mahli ŭziać hrošy i atrymać kryminał, zrazumieła, što treba było źviazacca z bankam.
Dziaŭčyna patelefanavała pa numary, jaki byŭ ukazany na pryładzie, i rastłumačyła situacyju.
— Ja spytała, ci možna mnie ich pakłaści na niejki rachunak, ci moža bank padkaža, chto ździajśniaŭ apošni płaciož, i tady ja mahu pakłaści hrošy na rachunak hetaha čałavieka. Ale mnie adkazali, što hrošy treba pryvieźci ŭ adździaleńnie.
Ja była na mašynie, da banka było piać chvilin, tamu ja pryjechała i napisała zajavu: dzie i kali znajšła hrošy, jakuju sumu. Pakinuła kupiuru i pajechała, a praź niejki čas pryjšoŭ list.
Da ździŭleńnia minčanki, bank adreahavaŭ na incydent udziačnaściu. Praŭda, jakich-niebudź padrabiaznaściaŭ pra toje, jak potym šukali ŭładalnika, u liście nie paviedamlałasia.
«Pierš za ŭsio vykazvajem vam udziačnaść za akazanaje sadziejničańnie i viartańnie ŭ bank znojdzienych vami ŭ pryładzie samaabsłuhoŭvańnia bankaŭskich srodkaŭ na sumu 10 rubloŭ. Vykładzienaja vami ŭ zajavie infarmacyja pryniataja bankam da viedama i ŭličana ŭ pracy banka dla viartańnia hrašovych srodkaŭ uładalniku», — kazałasia ŭ liście.
Nahadvajem, što viartańnie hrošaj — heta nie tolki plus u karmu: vypadki nieviartańnia traplajuć u zvodki milicyi. A Nadzieja kaža, što paśla hetaj historyi joj pašancavała ŭ inšym finansavym pytańni (tak što, mahčyma, plus u karmu ŭsio ž taki byŭ uličany).
«Hrošy z bankamata pieraličać, lišnija znojduć». Piać pytańniaŭ banku
Žurnalisty zadali «MTBanku» pytańni, što treba rabić klijentam u takich situacyjach i jak bank potym viartaje hrošy. Pryvodzim adkazy śpiecyjalistaŭ.
1. Čałaviek znajšoŭ hrošy ŭ bankamacie. Što rabić, jaki pavinien być ałharytm dziejańniaŭ?
— Kali klijent padyšoŭ da bankamata i vyjaviŭ tam čužyja najaŭnyja hrošy, nie treba zabirać hetyja kupiury z pryłady. Jak praviła, bankamaty naładžany takim čynam, što paśla peŭnaha času (30—60 siekund) pryłada zabiraje zabytyja hrošy nazad. Kali ž najaŭnyja hrošy ŭsio jašče znachodziacca na vidu i ich mohuć zabrać inšyja, lepš za ŭsio paviedamić pra hetuju situacyju ŭ bank — u toj, jakomu naležyć bankamat.
2. A kali čałaviek užo doma vyjaviŭ, što jon moh zabyć u bankamacie hrošy, što treba zrabić? I jakija kroki ŭ hetym vypadku pradprymaje bank? Ci rehistrujucca jak-niebudź zabytyja ŭ bankamata hrošy?
— Kali klijent zabyŭ hrošy ŭ bankamacie abo, naadvarot, atrymaŭ lišnija srodki, jamu nieabchodna źviarnucca ŭ najbližejšaje adździaleńnie banka, jaki vydaŭ płaciožnuju kartu. Śpiecyjalisty dapamohuć napisać zajavu, a paśla jaje atrymańnia buduć dziejničać zhodna z pryniatym u ZAT «MTBank» pałažeńniem, u jakim vyznačany paradak dziejańniaŭ pry ŭźniknieńni niestandartnych i zbojnych situacyj.
Pa słovach śpiecyjalistaŭ, usie apieracyi, u tym liku zbojnyja (zabytyja najaŭnyja, niapravilna vydanaja suma), fiksujucca ŭ pratakołach pracy bankamata. Potym ich možna vykarystoŭvać dla analizu raboty bankamata, a taksama dla atrymańnia statystyki rasśledavańnia incydentaŭ.
U asobnych vypadkach dla razhladu situacyi mohuć vykarystoŭvacca dadzienyja sistemy videanazirańnia bankamata.
— Dadatkova možna adznačyć, što ŭ banku rehularna pravodzicca rabota pa analizu apieracyj u pryładach. U vypadku vyjaŭleńnia zališkaŭ padčas inkasacyi bankamata, bank samastojna praviadzie rasśledavańnie i vyznačyć klijenta, u jakoha ŭtvarylisia hetyja zališki.
3. Kali nie zabrać hrošy, jany zastanucca ŭ łatku vydačy, i ich moža ŭbačyć inšy čałaviek? Ci moža bankamaty zabrać ich nazad?
— Pry vydačy najaŭnych hrošaj na ekranie bankamata vyvodzicca paviedamleńnie «Zabiarycie hrošy», łatok vydačy najaŭnych, jak praviła, abaznačajecca padśviatleńniem. Padadzienyja bankam kupiury možna zabrać z bankamata na praciahu 30 siekund. Kali klijent nie zabiare hrošy, bankamaty zabirajuć ich i źmiaščajuć u śpiecyjalnuju kasietu.
4. Jak časta byvajuć takija vypadki, kali ludzi zabyvajuć hrošy ŭ bankamataŭ?
— Vypadki, kali klijenty zabyvajuć zabrać hrašovyja srodki ŭ bankamataŭ «MTBanka», adzinkavyja. U takich situacyjach paśla inkasacyi, pieraliku najaŭnaści z kasiet bankamata i praviadzieńnia rasśledavańnia, pra miechanizm jakoha my raskazali vyšej, hrašovyja srodki bank viartaje na rachunki klijentaŭ.
5. U liście, jaki potym pryjšoŭ čytačcy z banka, havorycca, što infarmacyja, jakuju jana paviedamiła, «uličana ŭ pracy banka dla viartańnia hrašovych srodkaŭ uładalniku». Jak šukajuć ludziej, jakija zabyli hrošy? Ci byvali takija vypadki, kali hrošy zastavalisia niezapatrabavanymi, što ź imi adbyvajecca?
— Jak praviła, u takich vypadkach u pratakołach pracy bankamata fiksujecca fakt vymańnia niezabranych klijentam hrašovych srodkaŭ. U kasie banka pry pieraliku hrašovaj najaŭnaści kasiet bankamata vyjaŭlajucca zališki. Vyznačyć uładalnika dla śpiecyjalistaŭ banka zastajecca spravaj techniki.
Kamientary