Ideołah Minabarony Biełarusi raspaŭsiudžvaje staryja fejki pra pachodžańnie jeŭrapiejskich čynoŭnikaŭ ad hitleraŭcaŭ

Na sustrečy z aktyvam Homielskaj vobłaści pamočnik ministra abarony pa ideałahičnaj rabocie va ŭzbrojenych siłach, načalnik hałoŭnaha ŭpraŭleńnia ideałahičnaj raboty Ministerstva abarony Leanid Kasinski źviartaŭ uvahu na toje, što «lubuju infarmacyju treba ŭsprymać krytyčna, tamu što siońnia šmat fejkaŭ i niapraŭdy», paviedamlaŭ telehram-kanał «Fłahštok».

U toj ža čas Kasinski na ŭłasnym prykładzie pakazaŭ, jak jon adnosicca da pravierki infarmacyi, pryvioŭšy prydumany rasijskimi prapahandystami fejk ab blizkich svajakach jeŭrapiejskich palitykaŭ.

Ołaf Šolc — unuk hrupenfurera SS Fryca fon Šolca

U prezientacyi, jakuju demanstravaŭ Kasinski, śćviardžajecca, byccam by kancler Hiermanii Ołaf Šolc źjaŭlajecca ŭnukam hrupienfurera SS Fryca fon Šolca.

Hety fejk zapuściŭ u 2022 hodzie Jaŭhienij Pryhožyn. Ab tym, što fakt niesapraŭdny, u krasaviku 2022 hoda pisali niamieckija žurnalisty, jakija zmahli aznajomicca z archiŭnymi dakumientami i vyśvietlili, što ŭ Fryca fon Šolca nie było dziaciej.

Pavialičyć

Jon naradziŭsia ŭ horadzie Płzień, jaki na toj čas uvachodziŭ u skład Aŭstra-Vienhryi, a zatym razam z žonkaj žyŭ u aŭstryjskim horadzie Piorčach-am-Viorterzie (Pörtschach am Wörthersee). Da vajny mužčyna pracavaŭ chimikam. U 1944 hodzie jon zahinuŭ.

Što tyčycca Ołafa Šolca, to jaho babula ź dziadulem byli rodam z Hamburha i pracavali na čyhuncy. Što paćviardžajecca archiŭnymi dakumientami.

Hiermanskija ministry — «unuki» nacystaŭ

Akramia Šolca, «unukami» nacystaŭ u prezientacyi hałoŭnaha ideołaha Minabarony nazyvajucca ministr achovy zdaroŭja Hiermanii Karł Łaŭterbach i ministr finansaŭ Kryścijan Lindnier.

Jak i ŭ vypadku z Ołafam Šolcam, krynicaj hetaha fejku, jaki chutka razyšoŭsia pa prastorach internetu i staronkach ŚMI, a ŭ studzieni 2023 hoda byŭ ahučany ŭ prahramie «Čałaviek i zakon» na rasijskim «Pieršym kanale», źjaŭlajecca pres-słužba Jaŭhienija Pryhožyna.

Pavialičyć

Prapahandysty śćviardžajuć, što Karł Łaŭterbach źjaŭlajecca ŭnukam obierhrupienfiurera SS Chartmama Łaŭterbachiera. I nikoha nie biantežyć, što proźviščy «dzieda» i «ŭnuka» roznyja. Zrazumieła, što ŭ žyćci ŭsio zdarajecca, i proźvišča moža być adkarektavana.

Niamieckija žurnalisty pravieryli infarmacyju. Zhodna z archiŭnymi dakumientami, u obierhrupienfiurera SS Chartmana Łaŭterbachiera było troje dziaciej — Jorh, Kłaus i Ilzie. A baćki ministra achovy zdaroŭja Łaŭterbacha majuć imiony Vilhielm i Hiertruda. Takim čynam, ni imiony, ni proźviščy nie supadajuć. Jak śćviardžajuć žurnalisty, jany nie znajšli nijakaj suviazi pamiž ministram i nacysckim funkcyjanieram.

Kali źviarnuć uvahu na ministra finansaŭ Hiermanii Kryścijana Lindniera, to jaho proźvišča supadaje z nacystam Hierchardam Lindnieram, jaki na prezientacyi ideołaha Ministerstva abarony Biełarusi paznačany jak bryhadenfiurer SS. I heta pieršaja pamyłka. Na samoj spravie Hierchard Lindnier słužyŭ nie ŭ SS, a ŭ viermachcie, i mieŭ zvańnie hienierał-majora. Viadoma, što ŭ 1945 hodzie Lindnier byŭ aryštavany sajuźnikami i asudžany. U 1947 hodzie jon vyjšaŭ na svabodu. Pamior u 1982 hodzie ŭ horadzie Aŭrych u Nižniaj Saksonii.

Pavialičyć

Što tyčycca dzieda ministra finansaŭ, to, jak pisaŭ Kryścijan Lindnier u aŭtabijahrafii, jakaja vyjšła ŭ 2017 hodzie, jaho dziadula i babula vałodali piakarniaj u horadzie Vupiertal, jaki znachodzicca ŭ ziamli Paŭnočny Rejn-Viestfalija.

Navat kali dapuścić, što były hienierał viermachtu paśla vajny staŭ piekaram, to nie supadajuć ni daty, ni miesca. Bo Hierchard Lindnier pamior u Nižniaj Saksonii ŭ 1982 hodzie, a Kryścijan Lindnier naradziŭsia ŭ 1979 hodzie ŭ horadzie, jaki znachodzicca ŭ inšaj fiederalnaj ziamli. Ministr zhadvaje ŭ knizie, što dziadula z babulaj zajmalisia svajoj piakarniaj, kali jon byŭ padletkam. A heta značyć, što našmat paźniej za hod śmierci hienierała viermachtu Lindniera.

Ursuła fon der Lajen — unučka nacysta

Nastupnaj «unučkaj» nacysta ŭ prezientacyi nazyvajecca kiraŭnica Jeŭrakamisii Ursuła fon der Lajen. Śćviardžajecca, što jaje dzied — Karł Albrecht, jaki byŭ načalnikam upraŭleńnia MZS i handlova-haspadarčych viedamstvaŭ Treciaha Rejcha i pracavaŭ na terytoryi akupavanaj Ukrainy. Mužčyna mieŭ niepasrednaje dačynieńnie da hvałtoŭnaha prymusu da rabskaj pracy ŭkraincaŭ.

U vypadku z fon der Lajen heta nie pieršy takoha kštałtu fejk. Jašče ŭ 2022 hodzie ŭ internecie raspaŭsiudziłasia infarmacyja ab tym, što jaje dzied inšy Albrecht — adzin z kiraŭnikoŭ SS Karł Albrecht Obierh pa mianušcy «Paryžski miaśnik».

Ale ŭsio heta niapraŭda. Infarmacyju pra hienieałohiju hłavy Jeŭrakamisii možna adšukać na sajcie Geneastar.org. Dzied Ursuły fon der Lajen — Karł Eduard Albiert. Jon byŭ viadomym psichaterapieŭtam i aŭtaram knihi «Psichałohija mistyčnaj śviadomaści».

Dzied prezidenta Polščy — ukrainski nacyjanalist

Kasinski ŭ svaim vystupleńni śćviardžaŭ, što dziedam prezidenta Polščy Andžeja Dudy źjaŭlajecca paručyk Ukrainskaj paŭstanckaj armii Michajła Duda, siabar Ściapana Bandery.

Pra toje, adkul źjaviŭsia hety fejk, «Naša Niva» pisała raniej. Jaho historyja pačynajecca jašče ŭ 2015 hodzie. U 2022 hodzie hetu chłuśniu paŭtaryŭ hienieralny prakuror Biełarusi Andrej Švied.

Nasamreč dzieda polskaha lidara pa baćkavaj linii zvali Aloiz Duda. Jon byŭ palakam, pracavaŭ kušniarom, žyŭ u Starym Sončy i pamior u 1992 hodzie. Hetyja fakty paćviardžajucca archiŭnymi dakumientami. Infarmacyja pra prodkaŭ Dudy dobra zadakumientavanaja ažno da 1810 hoda. 

Premjer-ministr Polščy — unuk nacysta

U prezientacyi, pakazanaj aktyvu Homielskaj vobłaści, paŭtorany jašče adzin stary fejk ab tym, što dziedam premjer-ministra Polščy Donalda Tuska źjaŭlajecca rejchśfiurer SS Jozef Tusk.

Pavialičyć

Jašče ŭ 2019 hodzie faktčekiery ź niezaležnaha centra rasśledavalnickaj žurnalistyki CORRECTIV vyśvietlili, što dzied Donalda Tuska Juzaf pracavaŭ na čyhuncy. U 1939 hodzie jon byŭ aryštavany hiestapa, byŭ viaźniem dvuch niamieckich kancentracyjnych łahieraŭ. U 1944 hodzie mužčyna byŭ pryzvany na słužbu va ŭzbrojenyja siły Hiermanii, adkul u sakaviku 1945 hoda dezierciravaŭ i viarnuŭsia ŭ Polšču.

Admietna, što stvaralniki fejku navat fota realnaha rejchśfiurera SS Jozefa Tuska nie zdoleli adšukać, a ŭziali vyjavu nieviadomaha nacysckaha aficera z fota 1939 hoda.

• 1
• 0
• 2
• 2
• 0
• 0
• 0
• 0