Cichanoŭskaja: Pierapryznačeńnie Łukašenki nie maje nijakaha ŭpłyvu na maju dalejšuju pracu

Prezidentka-elekt i lidar biełaruskich demakratyčnych sił Śviatłana Cichanoŭskaja dała intervju «Ukrainskaj praŭdzie». Try hady nazad, u 2021 hodzie, razmova z žurnalistam adbyvałasia na ruskaj movie. Ciapier pytańni joj zadavali na ŭkrainskaj, a jana adkazvała na biełaruskaj.

Žurnalist pacikaviŭsia, jak źmianilisia pohlady demakratyčnych sił Biełarusi na Rasiju.

«My zaŭsiody viedali, što Rasija — vorah niezaležnaści Biełarusi. Ale kali adbylisia našy pratesty ŭ 2020 hodzie, u nas nie było mahčymaści jašče zmahacca i z Rasijaj, skažam tak. Tady my byli vielmi dypłamatyčnyja, aściarožnyja ŭ vykazvańniach suprać Rasii, bo bačyli, što Rasija padtrymlivaje Łukašenku, i nam treba było chacia b z Łukašenkam spravicca.

Ale, kali my ŭbačyli Buču, Irpień, Maryupal, hetuju vajnu, to, kaniečnie, užo tut nie da dypłamatyi. Treba nazyvać rečy svaimi imionami».

Jak i čym pavinna skončycca vajna?

«Vajna pavinna skončycca, i jana skončycca pieramohaj Ukrainy. Bo tolki tady budzie hety spraviadlivy mir, pra jaki ŭsie kažuć. Niedastatkova dla hetaha robiać, kaniečnie. Ale tolki tak ja baču našu budučyniu. Bo pieramoha Ukrainy važnaja nie tolki dla Ukrainy, nie tolki dla Biełarusi, ale i dla ŭsioj Jeŭropy, dla ŭsiaho demakratyčnaha śvietu.

Tamu śviet pavinien dać usio mahčymaje i niemahčymaje Ukrainie dla pieramohi», — ličyć Śviatłana Cichanoŭskaja.

— Što takoje pieramoha? — udakładniŭ žurnalist.

— Pieramoha, heta kali rasijskija vojski vyjduć z usioj terytoryi Ukrainy i bolš nie buduć spakušacca na vaš suvierenitet, vašu terytaryjalnuju cełasnaść, — adkazała Cichanoŭskaja.

Pra adnosiny z ukrainskaj uładaju

Lidar demakratyčnych siłaŭ Biełarusi, aceńvajučy stasunki z uładami Ukrainy, zaŭvažyła:

«Z pačatku vajny ŭ mianie była takaja ŭstanoŭka: kab nie naškodzić Ukrainie. I kali ja razumieła, što jość niejkija pieraškody dla bolš aficyjnych adnosin pamiž ukrainskimi ŭładami i demakratyčnymi siłami Biełarusi, — [značyć,] tak i treba. Nie treba «pušyć», nie treba farsiravać, bo treba dapamahčy Ukrainie. Kali vam heta vyhadna, my tut… Viedajecie, my nie nastojvajem. My nie nastojvajem, kab sustrakacca z prezidentam ci inšymi pradstaŭnikami [aficyjnych uładaŭ].

U nas jość kamunikacyja. My sustrakajemsia ź ministerstvam zamiežnych spraŭ, z daradcami spadara prezidenta Zialenskaha. I nam hetaha chopić. Nam treba razumieć adzin adnaho, razumieć, čaho my chočam, i tłumačyć i jašče raz tłumačyć, što Łukašenku nielha daviarać, što jon zaŭždy padmanie. Kolki razoŭ užo heta było. I kali ludzi dumajuć, što, moža, u niejki momant Łukašenka piarojdzie na bok Ukrainy… — hetaha nikoli nie budzie».

Chto takaja Śviatłana Cichanoŭskaja?

Heta pytańnie vyklikała dastatkova praciahłuju paŭzu. «Viedajecie, ciažka skazać, — zaŭvažyła Cichanoŭskaja i patłumačyła:

Pierš za ŭsio — ja žonka palitviaźnia. Moj muž u turmie bolš za čatyry hady. Tak los skłaŭsia, što ja stała lidarkaj demakratyčnaha ruchu Biełarusi, što ja abrany prezident Biełarusi. Ja mama dvaich dzietak. To-bok u mianie šmat rolaŭ.

Ale, kaniečnie, na mnie vialikaja adkaznaść za los krainy, za biełarusaŭ. Ale ja mocnaja nastolki, nakolki mocny biełaruski narod. Ja zaŭždy kažu, što adzin čałaviek nie moža ničoha zrabić. Ja rablu, što mahu, na mižnarodnaj arenie. My budujem adzinstva ŭ demakratyčnym ruchu. Ale heta adkaznaść kožnaha čałavieka, kožnaha biełarusa — rabić naš ruch, našu niezaležnuju krainu macniejšaj».

Ci skončycca rola Śviatłany Cichanoŭskaj z praviadzieńniem vybaraŭ u 2025 hodzie?

«U 2020 hodzie ja atrymała mandat ad biełarusaŭ da praviadzieńnia sumlennych, svabodnych vybaraŭ u Biełarusi. I ja pavinna vytryvać da hetaj mahčymaści. Toje, što robić Łukašenka, nie lehitymizuje jaho ni ŭ vačach biełarusaŭ, ni ŭ vačach našych zachodnich partnioraŭ. I ja spadziajusia, ni ŭ vačach ukraincaŭ taksama.

Tamu heta pierapryznačeńnie Łukašenki nie maje nijakaha ŭpłyvu na maju dalejšuju pracu. My jak pracavali, tak i budziem praciahvać asłablać režym Łukašenki. Mahčyma, asłablać i režym Pucina taksama. I ŭmacoŭvać usio biełaruskaje».

• 8
• 0
• 1
• 0
• 0
• 0
• 0
• 0