Sotni tysiač vyjšli ŭ niadzielu na vulicy Kijeva. Chronika niadzieli

Jak paviedamlaje karespandent Radyjo Svaboda, na siońniašniaje vieča apazicyi ŭ Kijevie sabrałasia značna bolš ludziej, čym u minułuju niadzielu — nie mienš za 200 tysiač čałaviek. Infarmahienctva Unian daje ličbu niekalki socień tysiač.

Udzielniki narodnaha vieča, jakija prybyli na Majdan Niezaležnaści ŭ Kijevie, źnieśli zaharadžalnyja mietaličnyja ščyty, jakimi byŭ abniesieny miesca zbudavańni navahodniaj jełki. Paśla hetaha častka milicyjantaŭ, jakija stajali za ščytami, razyšłasia.

Udzielniki akcyi pačali załazić na karkas jełki i viešać ściahi Ukrainy i ES na jaje.

13.56

Na Jeŭramajdan prylacieli polskija palityki i vice-prezident Jeŭraparłamienta.

U Kijevie da akcyi apazicyi — Narodnaha vieča — dałučylisia jeŭrapiejskija dypłamaty.

Vice-prezident Jeŭraparłamienta Jacek Pratasievič, były kiraŭnik Jeŭraparłamienta Ježy Buzek, były kiraŭnik polskaha ŭrada, lidar partyi «Zakon i spraviadlivaść» Jarasłaŭ Kačyński prylacieli ŭ Kijeŭ.

Kałona, jakuju ŭznačalvajuć lidary apazicyi Arsień Jaceniuk, Vital Kličko, Aleh Ciahnibok i deputaty ad apazicyi, užo dajšła da Majdana Niezaležnaści.

Kałona skanduje «Bandu — heć!» «Kijeŭ — ustavaj!».

14:53

U Kijeŭskaj radzie ŭsie šyby na pieršych pavierchach i dźviery raźbityja, a dźviery ŭ dom kijeŭskaj ułady adčynienyja. Kali ich raźbili i kim — nieviadoma.

Adnačasova ŭ Kijeŭskaj radzie ŭdzielniki akcyi złavili dvuch maładych ludziej, jakija mieli tak zvany «kaktejl Mołatava». Zapalnaja sumieś raźlita pa chodnikach. U adnaho z zatrymanych kanfiskavali vykidny nož. Jon admaŭlajecca skazać, chto jamu skazaŭ pryjści z hetaj sumieśsiu na akcyju. Uzdoŭž Chreščacika nie vidać milicyja ŭ formie. Peŭnaja kolkaść pravaachoŭnikaŭ — tolki la pomnika Leninu

Tolki dvor Kabinieta ministraŭ zaniali bajcy śpiecpadraździaleńnia «Bierkut».

Sotni bajcoŭ u poŭnym ryštunku, u šlemach, broniekamizelkach, z humovymi dubinkami, prybiehli z Maryinskaha parku i raźmiaścilisia va ŭnutranym dvary Doma ŭrada. U parku stajać dziasiatki aŭtobusaŭ z supracoŭnikami milicyi.

15:10

Apazicyja pravodzić vieča na Majdanie Niezaležnaści ŭ Kijevie.

Lidar frakcyi «Baćkaŭščyna» Arsień Jaceniuk skazaŭ: «Majdan ciapier naležyć nam — ukraincam. My zastajemsia na Majdanie».

«Baćkaŭščyna» nazyvaje kolkaść prysutnych u 500 tys. čałaviek.

15:20

Aktyvisty pajšli šturmavać ačapleńnie na Bankavaj, dzie mieścicca Administracyja prezidenta. Pra heta paviedamlaje ŭ pramym efiry Hramadskaje TB.

Ačapleńnie z aŭtobusaŭ «Bierkuta» rasšturchvajuć buldozieram.

U dvor kidajuć dymavyja šaški i fajery.

15:52

Masavyja akcyi pratestu va Ukrainie ŭžo pieraraśli ŭ revalucyju, pierakanany lidar ruchu «Treciaja ŭkrainskaja respublika», Juryj Łucenka.

«Naš płan zrazumieły: heta ŭžo nie mitynh, nie akcyja. Heta — revalucyja», — skazaŭ jon, vystupajučy na narodnym viečy na Majdanie Niezaležnaści.

Ludzi, jakija sabralisia pačali skandavać: «Revalucyja». Ju. Łucenka padkreśliŭ, što siońnia va Ukrainie hramadzianskaja supolnaść i palityki skančajuć toje, što było nie zavieršana padčas masavych akcyj pratestu ŭ 1991 i 2004 hadach.

«Siońnia tut pamiraje USSR. Heta jaje pachavańnie», — skazaŭ jon.

15:58

Ludzi ŭvarvalisia ŭ budynak Kijeŭskaj rady. Aktyvisty patłumačyli, što zajšli pahrecca i arhanizavać pracu štaba.

Svabodaviec Juryj Leŭčanka ŭ kałonnaj zale KHHA, jakuju ŭziali mitynhoŭcy, zaklikaŭ ničoha nie łamać i ŭ inšyja pamiaškańni nie zachodzić.

«My prosta siudy pryjšli viarnuć našu kamunalnuju ŭłasnaść sabie i zabiaśpiečyć štab revalucyi», - zajaviŭ jon i zaklikaŭ usich pavodzicca prystojna.

15:59

Svabodaviec Aleh Ciahnibok zaklikaje stavić namioty na Majdanie. U Domie prafsajuzaŭ raźbivajuć štab.

«My pačynajem ahulnanacyjanalny strajk», - zajaviŭ jon, vystupajučy na Majdanie Niezaležnaści.

Pry hetym jon dadaŭ: «Pačynajučy z hetaj chviliny, my tut zastajemsia».

Juryj Łucenka patrabuje praviadzieńnia daterminovych parłamienckich vybaraŭ, adstaŭki Viktara Janukoviča z pasady prezidenta, adstaŭki ŭrada Mikałaja Azarava, a taksama praviadzieńnia suda nad ministram unutranych spraŭ Vitalom Zacharčankam.

17:20

Prezident Ukrainy Viktar Janukovič ciapier znachodzicca ŭ rezidencyi «Miežyhorje» pad Kijevam, dzie pravodzić naradu. Pra heta paviedamlaje ITAR-TASS sa spasyłkaj na krynicy va ŭradzie.

Pavodle ich źviestak, u «Miežyhorji» ciapier znachodziacca sakratar Rady biaśpieki Andrej Klujeŭ, kiraŭnik MUS Vital Zacharčanka, staršynia Kijeŭskaj haradskoj dziaržadministracyi Alaksandr Papoŭ, a taksama šerah kiraŭnikoŭ ministerstvaŭ i viedamstvaŭ.

Pavodle nieaficyjnych źviestak, u paniadziełak u krainie moža być uviedziena nadzvyčajnaje stanovišča.

Pa dadzienych krynicy, va ŭradzie z hetaj nahody pravodzicca narada z udziełam čynoŭnikaŭ Kabmina i administracyi prezidenta.

Nie vyklučajecca, što nadzvyčajnaje stanovišča moža abmiežavacca Kijevam.

Pavodle zakanadaŭstva krainy, nadzvyčajnaje stanovišča, u pryvatnaści, moža być uviedziena ŭ vypadku ŭźniknieńnia masavych biesparadkaŭ, jakija supravadžajucca hvałtam nad hramadzianami, jakija abmiažoŭvajuć ich pravy i svabody; sproby zachopu dziaržaŭnaj ułady abo źmianieńnia kanstytucyjnaha ładu Ukrainy šlacham hvałtu.

U Kijevie na Majdanie Niezaležnaści abvieščana ahulnanacyjanalnaja zabastoŭka. Udzielniki pratestnych akcyj taksama zachapili Dom prafsajuzaŭ i budynak Kijeŭskaj haradskoj rady.

Idzie šturm pravakatarami administracyi prezidenta na Bankavaj.

18:30

Lidar frakcyi «UDAR» Vital Kličko zaklikaŭ udzielnikaŭ narodnaha vieča na Majdanie Niezaležnaści nie paddavacca na pravakacyi.

«U nas jość dakładny płan … i nie paddavajciesia na pravakacyi. Pravakataraŭ vielmi šmat», — skazaŭ V.Kličko, vystupajučy ŭ niadzielu na Majdanie Niezaležnaści ŭ Kijevie.

«My razumiejem, što ciapier pačynajecca pravakacyja. Jany chočuć, kab praliłasia kroŭ… ułada budzie rabić usio, kab vykarystoŭvać zbroju, abaraniacca», — dadaŭ lidar frakcyi.

Jon asabliva źviarnuŭ uvahu, nakolki niebiaśpiečnym moža być spravakavany i niepadmacavany ahulnym rašeńniem udzielnikaŭ akcyi šturm ad dziaržaŭnych ustanoŭ.

Palityk vykazaŭ pierakananaść, što hramadzianie Ukrainy zmohuć źmianić uładu ŭ krainie cyvilizavanym šlacham.

19:00

Milicyja pierakryła darohu na Miežyhorje, dzie znachodzicca rezidencyja prezidenta Ukrainy Viktara Janukoviča.

Pra heta paviedamlaje ŭ svaim Facebook aktyvist Vital Umaniec.

«Milicyja pierakryła nam darohu na Miežyhorje. Pieramovy praciahvajucca», - paviedamiŭ jon.

20:03

U kramach na Majdanie Niezaležnaści stajać vializnyja čerhi, u kaviarniach skončylisia pradukty i papiarovyja stakančyki, a ŭ bankamatach — hrošy.

Kali ranicaj u kaviarniach byli tablički: «Čaj i kava dla mitynhoŭcaŭ biaspłatna», to ciapier tam niama ni kavy, ni harbaty.

U kramkach, dzie pradavali vypiečku, taksama ŭsio raskupili. Akramia taho, u bankamatach na centralnaj płoščy horada skončylisia hrošy. Płoščaj chodziać studenty, jakija padkormlivajuć mitynhoŭcaŭ piečyvam, buterbrodami i mandarynami.

20:39

Na Majdanie Niezaležnaści budujuć barykady. Šmat ludziej.

Na Kreščaciku stajać 4 mašyny, na jakich staić scena. Namioty pakul nie staviać. Nijakaj milicyi niama..

21:12

Deputaty Adeskaha abłasnoha i Adeskaha haradskoha savietaŭ u paniadziełak źbirajucca na pazačarhovyja siesii.

Pres-słužba Adeskaha abłsavieta ŭ niadzielu ŭviečary paviedamiła ab praviadzieńni pasiadžeńnia ŭ paniadziełak u 16.00. Nazva pazačarhovaj siesii nie paviedamlajecca.

Na abodvuch siesijach buduć abmiarkoŭvać situacyju ŭ Kijevie.

Tak, u Daniecku na paradku dnia pasiadžeńnia — adno pytańnie «Ab zvarocie deputataŭ Danieckaha abłasnoha savieta ŭ suviazi z palityčnaj situacyjaj u Ukrainie».

21:45

Apazicyjnyja parłamienckija palityčnyja siły zaklikajuć usich hramadzian Ukrainy z roznych rehijonaŭ pryjechać u Kijeŭ dla ŭdziełu ŭ akcyi pratestu, zajaviŭ lidar frakcyi «Baćkaŭščyna» Arsienij Jaceniuk.

«My siońnia źviartajemsia da ŭsioj Ukrainy — pryjdzicie, kali łaska, u Kijeŭ na Majdan. Niama čaho rabić u haradach … tut (u Kijevie) siońnia adbyvajecca hałoŭnaja baraćba za Ukrainu», — zajaviŭ jon na pres - kanfierencyi ŭ niadzielu ŭviečary.

Jon padkreśliŭ, što ŭsim, chto pryjedzie z rehijonaŭ, buduć harantavanyja ŭsie ŭmovy dla narmalnaha žyćciezabieśpiačeńnia ŭ Kijevie.

Sa svajho boku, lidar frakcyi «Svaboda» Aleh Ciahnibok adznačyŭ, što na siońnia ŭ centralnym štabie, raźmieščanym u Domie prafsajuzaŭ, užo arhanizavany kruhłasutačnyja dziažurstvy, abstalavany miedpunkt, dzie 25 čałaviek užo atrymali miedycynskuju dapamohu.

21:55

Da pravaparušeńniaŭ la administracyi prezidenta datyčnyja bolš za 300 radykalna nastrojenych členaŭ arhanizacyi «Braterstva», jakija dziejničali pad nahladam Dźmitryja Karčynskaha.

Pra heta havorycca ŭ paviedamleńni ŭpraŭleńnia MUS Ukrainy na staroncy ŭ Facebook.

Akramia taho, zatrymanyja paviedamili, što biesparadki kala budynku Kijeŭskaj haradskoj administracyi supravadžalisia pradstaŭnikom VA «Svaboda» pa proźviščy Mirašničenka.

Ab datyčnaści hetych hramadzian da padziejaŭ u centry stalicy paviedamlajuć aktyvisty, jakija niadaŭna byli zatrymanyja pravaachoŭnikami, adznačyli ŭ MUS.

Akramia taho, niepravamiernyja dziejańni kala Kabinieta ministraŭ byli arhanizavany pry aktyŭnym ŭdziele kala 100 hramadzian, dziejańni jakich kaardynavaŭ hramadzianin pa imieni Andrej Fieščuk.

Taksama ŭ MUS źviarnulisia da hramadzian z zaklikam pradastaŭlać infarmacyju «ŭsimi dastupnymi sposabami» ab pravakatarach.

22:02

Lidar «UDARa» Vital Kličko pryjechaŭ na vulicu Bankovaja ŭ stalicy Ukrainy, dzie raniej adbylisia sutyknieńni, i zaklikaŭ pazastałych mitynhoŭcaŭ na Majdan Niezaležnaści.

Jon prajšoŭ praz kardony «Bierkuta», ustanoŭlenyja na padychodach da Administracyi prezidenta.

Adzin z prysutnych pasprabavaŭ spynić Kličko — toj skazaŭ: «Ty što, siabar, ty pjany? Častka ludziej užo na Majdanie, ja pryjšoŭ zabrać astatnich».

Vulica ŭžo amal pustaja, u pačatku jaje staić kardon ź milicyjantaŭ, u kancy — tyja, chto nie choča jašče iści. Kličko zaklikaje apošnich pajści na Majdan Niezaležnaści.

Šmat moładzi.

Tym časam praciahnuta praca kijeŭskaha mietro, pavialičany kolkasny skład ciahnikoŭ.

22:44

Na Majdanie Niezaležnaści pačali stavić namioty.

Adzin turystyčny namiot užo staić kala Hałoŭpaštamta na prajeznaj častki vulicy.

Taksama mitynhoŭcy pieraharodžvajuć Kreščacik mietaličnymi ščytami z boku vulicy Haradzieckaha.

Na Majdanie zaraz kala 15 tys. čałaviek, paviedamlaje Ukr. praŭda.

23:12

Adzin ź lidaraŭ ukrainskaj apazicyi Arsienij Jaceniuk, vystupajučy ŭviečary pierad mitynhoŭcami, zaklikaŭ Majdan sabracca a 8 ranicy, kab patrabavać ad parłamientu adstaŭki ŭrada.

U paniadziełak a 8.00 (9:00 pa Minsku) na Majdanie adbudziecca zbor na pikiet budynka Kabinieta ministraŭ: «Zaŭtra budzie naša pieršaja sumiesnaje palityčnaje patrabavańnie — rezalucyja niedavieru ŭradu. Dałoŭ urad Azarava - Janukoviča. Heta pavinny prahałasavać u parłamiencie».

Jon zaklikaŭ hramadstva nie paddavacca na pravakacyi: «My nie paddamosia. Naša zadača — heta mirny pratest. My tut staim zhodna z našaj Kanstytucyjaj, dzie napisana «ŭłada va Ukrainie naležyć ukrainskamu narodu».

«Tut my staim ŭsiu noč. Abaraniajem našu terytoryju: namioty źjaŭlajecca, ježa jość, ciapło jość, i što najbolš važna — naš duch», — skazaŭ Jaceniuk.

00:07

Kaardynatary akcyi pratestu na Majdanie Niezaležnaści ŭ Kijevie zaklikajuć mitynhoŭcaŭ nie ŭžyvać śpirtnych napojaŭ, udzielnikaŭ akcyi zaklikajuć «ŭvieści fejs-kantrol», kab na akcyju nie patrapili žabraki, pjanicy.

Zaraz na hałoŭnaj płoščy stalicy ŭstanoŭlena bolš za 10 namiotaŭ i praciahvajecca mantaž stacyjanarnaj sceny.

Pa stanie na 22.40 u akcyi biaruć udzieł kala 10 tysiač čałaviek.

Apytanka

***

Načalnik kijeŭskaj milicyi padaŭ u adstaŭku, ministr unutranych spraŭ vybačyŭsia pierad ukraincami za razhon

***

Janukovič abiacaje «ŭsio ad jaho zaležnaje» dla zbližeńnia ź ES

• 0
• 0
• 0
• 0
• 0
• 0