MAZ, šašłyki i machrovyja ručniki: piać faktaŭ ab piaci čynoŭnikach, jakich siońnia pryznačyŭ Łukašenka
Alaksandr Łukašenka zładziŭ 16 maja kadravy dzień. Pra niekatorych z pryznačencaŭ — u artykule «Našaj Nivy».
Kryminalny śled u bijahrafii hiendyrektara MAZa
48-hadovy Valeryj Ivankovič uznačaliŭ fłahmana biełaruskaha mašynabudavańnia — zavod MAZ.
Ivankovič rodam z Navapołacka. Kaža, što baćki byli prostymi rabočymi. Baćka — taksama Valeryj — 43 hady adpracavaŭ na «Palimiry».
Ivankovič skončyŭ Politechničnuju akademiju. Paśla hetaha jon viarnuŭsia ŭ Navapołack i ŭładkavaŭsia na pracu na toj samy «Palimir», dapracavaŭsia tam da kamiercyjnaha dyrektara.
Bijahrafija Ivankoviča idzie supolna ź bijahrafijaj Alaksandra Baroŭskaha, jaki ŭznačalvaŭ «Palimir» pry Ivankoviču. Kali Baroŭskaha ŭ 2006 hodzie zabrali ŭznačalić «Biełnaftachim», to jon zabraŭ z saboj Ivankoviča ŭ jakaści dyrektara «Biełaruskaha naftavaha handlovaha doma».
Kali ŭ 2007 hodzie KDB aryštavaŭ za raskradańni i złoŭžyvańnie słužbovymi paŭnamoctvami, to paviedamlałasia i pra zatrymańnie Ivankoviča. Ale taho ci chutka adpuścili, ci nie zatrymlivali ŭvohule.
Adznačym, što paśla pamiłavańnia Baroŭski ŭznačalvaŭ mienavita MAZ. Pryčym kiraŭnictva krainy było im nastolki zadavolenaje, što ŭručyła Orden Pašany. Zabraŭ Baroŭski Ivankoviča znoŭ z saboj — namieśnikam hiendyrektara AAT «BiełaŭtaMAZ».
Apošnija čatyry hady Ivankovič uznačalvaŭ pryvatnaje AAT «Amkador», jakoje naležyć biznesmienu Šakucinu. Faktyčna, Ivankovič źjaŭlaŭsia adnym z topavych mieniedžaraŭ krainy. Ciapier jon pierachodzić nazad na dziaržaŭnuju pracu.
Žonka Natalla taksama rodam z Navapołacka. U pary dvoje synoŭ — Illa i Arsienij. Starejšy Illa ŭ 2015 skončyŭ škołu, ciapier pracuje ŭ EPAM. Šmat padarožničaje pa śviecie. Jeździć u adpačynki i sam Valeryj Ivankovič, prynamsi jość jaho zdymki ź plažaŭ Ispanii i Turcyi. Małodšy — jašče školnik.
Hledziačy na akaŭnt Valeryja Ivankoviča Ukantakcie, možna zrazumieć, što jon supieražyvaje baskietbolnamu kłubu «Łos-Andželes Lejkiers» i ŭvohule sočyć za spabornictvami NBA. Na biełaruskamoŭnyja i biełaruskija ŚMI jon nie padpisany, zatoje sočyć za abnaŭleńniami na «Raša tudej».
Chto ŭznačaliŭ narhas?
Novamu rektaru BDEU Viačasłavu Šucilinu 50 hadoŭ. Jon rodam z rasijskaj Razani, ale ŭ škołu chadziŭ užo ŭ Minsku. Darečy, vučyŭsia ŭ škole №88 u Pieršamajskim rajonie, na miescy jakoj uźviali budynak dla milicyi.
U 1986 hodzie pastupiŭ u narhas na ŭlikova-ekanamičny fakultet, ale ŭžo praz hod byŭ vymušany pierarvać navučańnie praz słužbu ŭ armii.
Adrazu paśla skančeńnia zastaŭsia ŭ svajoj alma-mater u jakaści vykładčyka na kafiedry handlu srodkami vytvorčaści.
Admietna, što ŭ BDEU pracuje i žonka Viačasłava Natalla Šucilina. Jany vučylisia razam va ŭniviersitecie. Cikava, što Natalla Vasiljeŭna taksama naradziłasia ŭ Rasii. Ciapier jana źjaŭlajecca zahadčycaj kafiedry tavaraznaŭstva niecharčovych tavaraŭ.
U 2004 hodzie Viačasłaŭ Šucilin staŭ navukovym sakratarom BDEU, u 2008 — načalnikam upraŭleńnia padrychtoŭki navukovych kadraŭ vyšejšaj kvalifikacyi. Uznačalvaŭ daktaranturu i byŭ dekanam fakulteta mižnarodnych ekanamičnych adnosin.
Letaś jon staŭ pieršym prarektaram narhasa, a ŭžo praz vosiem miesiacaŭ atrymaŭ novaje pavyšeńnie.
U Viačasłava Šucilina dvoje synoŭ. Starejšamu Mikitu 20 hadoŭ, jon navučajecca na miechanika-matematyčnym fakultecie BDU, a taksama supracoŭničaje z kampanijaj rezidentam PVT Twistellar People. Małodšy syn Illa na dadzieny momant źjaŭlajecca 11-kłaśnikam minskaha Liceja №2.
Płaciła zarobki machrovymi ručnikami
45-hadovaja Taćciana Łuhina ŭznačaliła Biellehpram. Da hetaha jana była dyrektaram na pinskaj fabrycy «Paleśsie».
Jana sama rodam ź Pinsku. Vučyłasia ŭ Viciebsku, ŭ technałahičnym univiersitecie, pa śpiecyjalnaści «technałohija i kanstrujavańnie šviejnych vyrabaŭ». Potym zamacoŭvała adukacyju ŭ Akademii kiravańnia pry prezidencie.
Fabryka vierchniaha trykatažu adkryłasia ŭ Pinsku jašče ŭ 1968 hodzie. Niekatoryja krynicy pišuć, što na toj momant heta była najbujniejšaja ŭ Jeŭropie padobnaja vytvorčaść.
Tym nie mienš, užo ŭ časy niezaležnaści fabryka akazałasia na miažy bankructva. Łuhina ŭznačaliła pradpryjemstva ŭ 2014 hodzie. Sama jana kaža: «Na toj momant dumała, što praź niejki čas znojduć bolš vartuju kandydaturu».
«Pinskaja trykatažnaja fabryka zahrazła ŭ miljardnych stratach», — tak u 2014 hodzie pisała hazieta «Sovietskaja Biełoruśsija». Łuhina kazała, što adrazu adkinuła mahčymaść bankructva, bo heta laža cieniem na ŭsiu reputacyju «Paleśsia». Praź niejki čas pradpryjemstvu atrymałasia vyjści ŭ prybytak.
Chacia časy byli zusim niaprostymi. Navat letaś na pradpryjemstvie častku zarobkaŭ vypłačvali kansiervami i machrovymi ručnikami. Pry hetym siarednija zarobki tam składali ŭsiaho kala 300 rubloŭ.
Adznačym taksama, što Łuhina źjaŭlajecca deputatam Pinskaha haradskoha savieta deputataŭ pa Zornaj vybarčaj akruzie №17.
Sioleta jana stała «Žančynaj hoda» Bresckaj vobłaści. Jana zamužam, maje dvaich dziaciej. Žyvie nie ŭ Pinsku, a ŭ katedžy ŭ vioscy Haleva za niekalki kiłamietraŭ ad rajonnaha centra.
Amatar šašłykoŭ u Minbudaŭnictvie
Ihar Kaściukoŭ staŭ pieršym namieśnikam ministra architektury i budaŭnictva. Jon rodam z Kruhłaha Mahiloŭskaj vobłaści. Tam praciahvajuć žyć braty Alaksandr i Hienadź.
Apošnim časam Ihar Kaściukoŭ zajmaŭ pasadu načalnika hałoŭnaha ŭpraŭleńnia budaŭnictva Ministerstva architektury i budaŭnictva.
Kaściukoŭ viadzie vielmi jarkuju staronku ŭ sacyjalnaj sietcy Adnakłaśniki. Razam z žonkaj jon padarožničaje to ŭ Jehipiet, to ŭ Izrail. Nie saromiejecca brać z saboj u vandroŭki sełfi-pałku.
Adnak vyhladaje, što sapraŭdnaje chobi i zachapleńnie čynoŭnika — heta ježa. Jon piaščotna vykładaje ŭ svoj akaŭnt šmatlikija fotki miasnych narezak, a taksama buterbrodaŭ.
«Nie daviaraju ludziam, jakija nie lubiać šašłyki», — napisana ŭ jaho. Mabyć, možna ličyć za žyćciovaje kreda.
Šmat pastoŭ Kaściukoŭ napisaŭ na 9 Maja. Zvyčajna biełaruskaha kantekstu ŭ jahonych «łajkach» i «pierapostach» zusim niama.
Małady ŭznačaliŭ Žabinkaŭski rajon
Novamu staršyniu Žabinkaŭskaha rajvykankama Vitalu Kułaku ŭsiaho 34 hady. Da hetaha jon uznačalvaŭ kamitet pa sielskaj haspadarcy i charčavańni ŭ Bresckim abłvykankamie.
Kułak rodam ź Lachavičaŭ. Tam ža vučyŭsia ŭ ahrarnym kaledžy. Paśla słužyŭ u vojsku ŭ bresckim desancie. Atrymaŭ dypłom Hrodzienskaha ahrarnaha ŭniviersiteta pa śpiecyjalnaści «Ahranomija», vučyŭsia tam zavočna.
Pracavać pačynaŭ «Brestsortsiemharodnina». Adtul užo jaho zabrali ŭ abłvykankam.
Ukantakcie padpisana, što Kułak nie žanaty i padpisany na supołku «Hovoriť Laško».
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič24
Kamientary