Zorki biełaruskaha telebačańnia 1990-ch i 2000-ch: čym jany zajmajucca ciapier
Biełaruskaje telebačańnie 1990-ch i 2000-ch pry ŭsich svaich minusach naradziła šerah cikavych prajektaŭ i viadomych imionaŭ. Ale siońnia bolšaść tvaraŭ «staroha» TB źnikła: chtości syšoŭ z prafiesii, chtości ŭvohule źjechaŭ ź Biełarusi. «Naša Niva» ŭzhadała samych viadomych telezorak i pacikaviłasia, čym jany zajmajucca siońnia.
Jahor Chrustaloŭ
Chrustaloŭ, napeŭna, byŭ pieršaj supierzorkaj ajčynnaha telebačańnia. Paŭpłyvała na heta nie tolki jaho praca na TB, ale i burlivaje pryvatnaje žyćcio.
U televizary Chrustaloŭ źjaviŭsia, kali jašče byŭ studentam žurfaka. Jon vioŭ pieršaje tok-šou «Karambol». Farmat byŭ standartny: hutarka viadoŭcy ź viadomym hościem. Pryčym nie abaviazkova pop-zorkaj, u studyju zaprašali, naprykład, i paeta Ryhora Baradulina!
Pra papularnaść maładoha televiadučaha śviedčyć pačesny tytuł ajčynnaha «Seks-simvała — 1997».
U pačatku 2000-ch Chrustaloŭ syšoŭ na ANT. Vioŭ tok-šou «Vybar», pracavaŭ jak pradziusar nad inšymi prajektami. Akramia taho, pisaŭ pieśni — naprykład, dla śpiavački Haliny Šyškovaj, ź jakoj u žanataha Chrustalova zakruciŭsia raman. Šyškova navat naradziła syna ad Chrustalova, viadučy pryznaŭ dzicia, ale ź siamji sychodzić nie staŭ.
U 2009 hodzie Chrustaloŭ na niejki čas źjechaŭ u Rasiju, byŭ pradziusaram na kanale STS. Ale ŭ 2014 hodzie viarnuŭsia ŭ Biełaruś, vioŭ šou «Viečar ciažkaha dnia» na «Biełaruś 1».
Ciapier jon pracuje ŭ kampanii «Jeŭrahandal», jakaja vałodaje sietkaj kramaŭ «Jeŭraopt». Chrustaloŭ zajmaje pasadu pres-sakratara.
Aleś Kruhlakoŭ
Kaliści z efiraŭ Kruhlakova pačynali ranicu tysiačy — kali nie sotni tysiač — biełarusaŭ. Kala vaśmi hadoŭ Aleś Kruhlakoŭ vioŭ pieradaču «Dobraj ranicy, Biełaruś!», kamientavaŭ «Jeŭrabačańnie» (na biełaruskaj movie!).
Ale ŭ 2006 hodzie jaho źniali z efiraŭ. Pryčyny nie ahučvalisia, aficyjna heta nijak nie było źviazana z prafiesijnymi zdolnaściami viadučaha. Reč u tym, što Kruhlakoŭ sumiaščaŭ efiry z pracaj u pres-słužbie pasolstva ZŠA ŭ Biełarusi, što mahło vyklikać pytańni ŭ kiraŭnictva Biełteleradyjokampanii.
Čytajcie:
Lehiendarny viadučy BT Aleś Kruhlakoŭ emihravaŭ u ZŠA: Z małym synam razmaŭlaju pa-biełarusku
U vyniku viadučy źjechaŭ u Złučanyja Štaty, dzie i žyvie siońnia. Jon pracavaŭ karespandentam ruskaj słužby «Hołasa Amieryki», ciapier pracuje na telekanale «Ciapierašni čas». Heta sumiesny prajekt «Radyjo Svaboda» i «Hołasa Amieryki».
Śviatłana Baroŭskaja
Uradženka Maładziečna sprabavała stać aktrysaj, paśla škoły pastupiła ŭ teatralna-mastacki instytut. Navat paznajomiłasia tam z budučym mužam, akcioram Anatolem Kacianiovym. Ale ŭ samoj Śviatłany karjera ŭ kino nie skłałasia. Zatoje skłałasia na telebačańni. Kala 20 hadoŭ Baroŭskaja viała pieradačy «Dobraj ranicy, Biełaruś» i «Dobry dzień, Biełaruś».
Siońnia Baroŭskaja praciahvaje pracu viadučaj na biełaruskim telebačańni.
Darečy, sioleta jana śviatkuje jubilej — u listapadzie Śviatłanie Baroŭskaj spoŭnicca 50 hadoŭ.
Siarhiej Darafiejeŭ
Papularnaść televiadučamu pryniesła praca na kanale ANT. Darafiejeŭ vioŭ tok-šou «Vybar», mienavita jaho namahańniami pieradača stała sapraŭdy vostraj prahramaj.
Ale efir 19 śniežnia 2010 hoda staŭ dla Darafiejeva apošnim. Abmierkavańnie prezidenckich vybaraŭ padčas masavaj akcyi na Płoščy było sapraŭdy vostrym. Ale na nastupny dzień Łukašenka vykazaŭ svajo niezadavalnieńnie pieradačaj.
Paśla Darafiejeva adchilili ad efira, karjera na ANT faktyčna skončyłasia. Jon źjechaŭ va Ukrainu, rabiŭ aŭtarskuju prahramu na «5 kanale», navat mieŭ prafiesijnyja ŭznaharody jak najlepšy intervjujer.
Paśla Siarhiej Darafiejeŭ papracavaŭ na «Radyjo Svaboda», žyŭ u Prazie. Ale praz 3,5 hoda zvolniŭsia.
«Atrymałasia takaja niečakanaja štuka: adjazdžaŭ u amierykanskuju kampaniju «Radyjo Svaboda», a pryjechaŭ na kanał «Rasija». Takoje ideałahičnaje ŭtrymańnie mianie nie mahło zadavalniać. Heta tyčycca štatnaha napaŭnieńnia i ŭ peŭnaj miery navinavaha kantentu kanała», — raskazvaŭ Darafiejeŭ partału The Village.
U 2018 hodzie Siarhiej Darafiejeŭ viarnuŭsia ŭ Kijeŭ. Tam jon uvajšoŭ u štab kandydata ŭ prezidenty Ukrainy Ramana Biaśśmiertnaha, dacenta Kijeŭskaha ŭniviersiteta kultury i mastactvaŭ i hramadskaha dziejača (darečy, Biaśśmiertny raniej pracavaŭ pasłom Ukrainy ŭ Biełarusi). U štabie palityka Darafiejeŭ adkazvaŭ za infarmacyjnuju častku i analityku. Ale ž u druhi tur vybaraŭ Biaśśmiertny nie prajšoŭ.
Malavanyč (Alaksandr Ždanovič)
Imia minskaha akciora Alaksandra Ždanoviča, napeŭna, viadomaje nie nadta šyrokamu kołu telehledačoŭ. Ale amal kožny ŭzhadaje Malavanyča, jakoha Ždanovič hraŭ amal 20 hadoŭ u pieradačy «Kałychanka». Pieršy vypusk vyjšaŭ ažno ŭ 1996 hodzie!
Ale ŭ 2015 hodzie televizijnaja karjera Ždanoviča skončyłasia.
«Čamu? Nu, pryjšli novyja ludzi, zachacieli štości tam pamianiać… Pytańnie nie da mianie», — kaža Ždanovič.
Siońnia Alaksandr Ždanovič praciahvaje hrać u teatry. Akramia taho, jon šmat pracuje ź dziećmi. Ždanovič — zasnavalnik i kiraŭnik dziciačaha teatra-studyi «Radaść» dla dziaciej-invalidaŭ i sirot pry Śviata-Jelisaviecinskim manastyry, mastacki kiraŭnik Mižnarodnaha kaladnaha fiestyvalu batleječnych i lalečnych teatraŭ «Niabiosy».
Siarhiej Filimonaŭ
U 1990-ch biełarusy daviedvalisia pra apošnija naviny mižnarodnaha šou-bizu i kinapremjery praź pieradaču «Vidźma-Niavidźma». Pieršy vypusk vyjšaŭ u 1992 hodzie.
Jaje stvaralnik i viadučy Siarhiej Filimonaŭ pa adukacyi historyk. 20 hadoŭ jon vypuskaŭ pieradaču na BT, paśla na kanale STB.
Ale ŭ 2011 hodzie supracoŭnictva ź Filimonavym spynili. Ciapier jon pracuje na telekanale «Biełsat», dzie z 2012 hoda i pa siońnia vychodziać novyja vypuski kultavaj pieradačy.
Dźmitryj Šepieleŭ
Karjera budučaha televiadučaha i śvieckaha lva pačałasia daŭno: tady jašče vučań 9 kłasa Šepieleŭ staŭ viadučym pieradačy dla padletkaŭ «5Ch5». Šou vychodziła ŭ žyvym efiry.
Paśla Šepieleŭ pracavaŭ dydžejem na radyjo, žyŭ va Ukrainie, dzie vioŭ raznastajnyja šou na miascovych kanałach. A ŭ 2008 hodzie jaho zaprasili ŭ Maskvu, vieści karaokie na Pieršym kanale.
Paśla Šepieleŭ kančatkova pierabraŭsia na rasijskaje TB, vioŭ šerah paśpiachovych zabaŭlalnych prajektaŭ. Ale pastajannym hierojem śvieckaj chroniki jon staŭ paśla trahičnaha ramana z pop-zorkaj Žannaj Fryskie.
U 2013 hodzie śpiavačka zaciažarała ad Šepieleva, i padčas abśledavańnia ŭ jaje znajšli nieapierabielnuju puchlinu mozhu. Fryskie naradziła zdarovaha syna Płatona, sprabavała lačycca, ale ŭ 2015 hodzie pamierła. Šepieleŭ padtrymlivaŭ svaju kachanuju, a paśla jaje śmierci navat vypuściŭ knihu «Žanna», pryśviečanuju Fryskie.
Siońnia Dźmitry Šepieleŭ praciahvaje pracavać na rasijskim Pieršym kanale, jon viadzie pieradaču «Na samaj spravie». Heta čarhovaja «małachaŭščyna»: tok-šou, na jakim udzielniki abmiarkoŭvajuć siamiejnyja kanflikty zorak ci adno adnaho. Pry hetym udzielniki šou padklučanyja da detektaraŭ chłuśni.
Lucyja Łuščyk
Minijaciurnaja błandzinka z halivudskaj uśmieškaj upieršyniu źjaviłasia na Pieršym muzyčnym telekanale. Tady jaje praca nazyvałasia modnym słovam «vi-džej».
Na Pieršym muzyčnym Łuščyk praviała 6 hadoŭ. Paśla pierajšła na ANT. Siońnia Lucyja ŭžo i nie błandzinka, i navat nie Łuščyk — jana vyjšła zamuž za biznesoŭca Andreja Hieraščanku i ŭziała jaho proźvišča.
Z Hieraščankam i jaho byłoj žonkaj Iłonaj źviazany skandał, u jaki trapiła Lucyja. Iłona i Andrej Hieraščanki paśla razvodu nie mahli vyrašyć, z kim zastaniecca ich dačka. Da sprečak dałučyłasia i novaja žonka biznesmiena Lucyja, jakaja, naturalna, padtrymała muža.
Ale pacichu skandały zabylisia. Ciapier Lucyja Hieraščanka —televiadučaja kanała ANT. Pracuje ŭ pieradačach «Naša ranica» i «Chit na śniadanak».
Alaksandr Zimoŭski
Proźvišča Zimoŭskaha — i pa siońnia sinonim uzornaha dziaržaŭnaha prapahandysta.
Hetaha nie admaŭlaŭ i jon sam: «Ja prapahandyst u čystym vyhladzie. Ja kazaŭ ludziam, što pisać, što havaryć i jakija musiać być akcenty».
Ciaham šaści hadoŭ (1995—2001) Zimoŭski byŭ aŭtaram i viadučym «infarmacyjna-analityčnaj» prahramy «Rezanans», u jakoj plažyŭ apazicyju i ŭchvalaŭ łukašenkaŭskuju ŭładu.
Paśla «Rezanansu» Zimoŭski ŭznačalvaŭ spačatku Staličnaje telebačańnie, zatym Biełteleradyjokampaniju. Ale ŭ 2010 hodzie Zimoŭskaha zamianili Hienadziem Davydźkam.
Čym siońnia žyvie Zimoŭski, dakładna nieviadoma. Sam jon nazyvaje siabie «miedyjakansultantam». Były televiadučy šmat času pravodzić u Pieciarburhu, ale časta jaho bačać i ŭ Minsku.
Alaksandr Avierkaŭ
Jašče adzin prapahandyst — były viadučy «Konturaŭ» Alaksandr Avierkaŭ.
Cikava, što Avierkaŭ maje akciorskuju adukacyju, ale jaho ž karjera ŭ kino abmiežavałasia druhasnymi sieryjałami.
Spačatku Avierkaŭ vioŭ na ANT naviny. U 2002 hodzie staŭ viadučym «Konturaŭ», jakija padsumoŭvali vyniki tydnia. Ale ž u 2015 hodzie Avierkava źniali z efiru.
Jašče adzin cikavy fakt: kaliści Avierkaŭ ahučvaŭ vaŭka Vovu z «Kałychanki».
Siońnia Avierkaŭ praciahvaje pracu na ANT, pracuje viadučym u dyrekcyi infarmacyjnaha viaščańnia.
Kamientary