Były daradca Trampa raskazaŭ u miemuarach, navošta jeździŭ u Minsk

U svajoj knizie memuaraŭ «The Room Where it Happened» («Pakoj, u jakim usio adbyłosia») były daradca prezydenta ZŠA pa nacyjanalnaj biaśpiecy Džon Bołtan niekalki razoŭ zhadvaje Biełaruś, paviedamlaje Svaboda.

Pavialičyć

Jon apisvaje padziei, jakija adbyvalisia padčas i napiaredadni jaho vizytu va Ŭschodniuju Eŭropu ŭ letašnim žniŭni. Praź niekalki tydniaŭ jaho adpravili ŭ adstaŭku.

U memuarach Bołtan kaža, što abmiarkoŭvaŭ z prezydentam Ukrainy Zialenskim Biełaruś i Małdovu i ich prablemy z Rasiejaj i karupcyjaj.

«29 žniŭnia ja vylecieŭ z Kijevu ŭ Małdovu i Biełaruś, praciahvajučy svaje pajezdki pa byłych respublikach SSSR. Ja chacieŭ pakazać Rasiei, što my ŭvieś čas fakusujemsia na jaje peryferyi, a nia prosta pakidajem hetyja dziaržavy, jakija zmahajucca, sam-nasam z Maskvoj… U pryvatnaści, u Miensku, niahledziačy na toje, što ŭ Alaksandra Łukašenki byli nie nastolki admietnyja dasiahnieńni ŭ halinie pravoŭ čałavieka, ja chacieŭ dakazać, što ZŠA nia stali b prosta nazirać, jak Rasieja pahłynaje Biełaruś, što Pucin, padobna, razhladaŭ surjozna», — piša Džon Bołtan u svajoj knizie.

Były daradca prezydenta ZŠA pa nacyjanalnaj biaśpiecy, jaki pravioŭ 31 žniŭnia ŭ Varšavie sustreču sakrataroŭ radaŭ biaśpieki Biełarusi, Ukrainy i Polščy, tłumačyć, što taja sustreča pavinna była syhnalizavać «inšym byłym savieckim respublikam, što ni my, ni jany nie pavinny być pasiŭnymi, kali jany sutykajucca z vajaŭničaściu Rasiei ci pahrozami ich unutranamu kiravańniu… Paśla taho, jak ja pajšoŭ u adstaŭku, administracyja i inšyja, zdajecca, ruchalisia ŭ tym ža kirunku», — piša Džon Bołtan.

Napiaredadni vychadu knihi svaich memuaraŭ, jakaja jašče da publikacyi vyklikała skandał u Vašynhtonie, Džon Bołtan u interviju ABC daŭ acenku prezydentu Rasiei Ŭładzimiru Pucinu i palitycy administracyi Donalda Trampa ŭ dačynieńni da Maskvy.

Jak śćviardžaje Bołtan, prablema ciapierašniaj administracyi ZŠA ŭ tym, što ŭ jaje niama vyraznaj palityki ŭ dačynieńni da Rasiei. Jana zrabiła šerah krokaŭ, jakija sam Bołtan ličyć słušnymi: naprykład, abviaściła ab vychadzie z damovy pra rakiety siaredniaj i mienšaj dalokaści abo nakłała na Rasieju šerah sankcyjaŭ, — adnak za ŭsim hetym nie prasočvałasia celnaj palityčnaj linii.

Rezka skrytykavaŭ Bołtan niepasredna prezydenta Trampa, vysoka acaniŭšy pry hetym Uładzimira Pucina. Pavodle Bołtana, rasiejski prezydent «nia bačyć surjoznaha supiernika» u asobie Trampa i «moža hrać na im jak na skrypcy». Kankretnych prykładaŭ jon, zrešty, nie pryvioŭ.

• 0
• 0
• 0
• 0
• 0
• 0
• 0
• 0