Chto tyja siem čałaviek, kaho abvinavacili ŭ padrychtoŭcy zamachu na Łukašenku?
Telekanał ANT pakazaŭ ludziej, jakija nibyta rychtavali zamach na Alaksandra Łukašenku, a taksama členaŭ jahonaj siamji. Praanalizavali, što heta za ludzi.
Skrynšot videa ANT
Juraś Ziankovič — 43 hady. Byŭ aktyvistam Partyi BNF, abiraŭsia ŭ Ždanovicki sielski saviet i Minski rajsaviet na miascovych vybarach. Dabiŭsia, kab u pasiołku była vulica Vasila Bykava. U 2007 hodzie emihravaŭ u ZŠA, atrymaŭ tam hramadzianstva. Spačatku žyŭ u Denviery (štat Kałarada), pracavaŭ raznosčykam picy. Paśla pierabraŭsia ŭ Ńju-Jork, staŭ advakatam, zajmaŭsia spravami mihracyi.
Chacieŭ vyłučacca ad Partyi BNF kandydatam u prezidenty ŭ 2020 hodzie, ale prajhraŭ Alaksieju Janukieviču, jaki, u svaju čarhu, sabraŭ najmienš hałasoŭ na «prajmeryz» apazicyi i ŭ vyniku tak i nie vyłučaŭsia.
Ziankovič byŭ najbolš viadomy supiarečlivymi zajavami. Naprykład, paśla hibieli sałdata Koržyča jon zajaviŭ, što «heta narmalna, što ŭ vojsku zdarajucca nadzvyčajnyja stanoviščy i što navat hinuć ludzi».
U ZŠA z asobaj Ziankoviča źviazany šerah kanfliktaŭ u emihracyjnych asiarodkach.
U 2020-m Ziankoviča bačyli ŭ restaranie «Pajedziem pajadzim» kala Kurapat, jon tam sčapiŭsia z aktyvistami, jaki tuju ŭstanovu pikietavali.
Palityčny ŭpłyŭ i suviazi Ziankoviča minimalnyja.
Alaksandr Fiaduta — 56 hadoŭ. Palittechnołah, litaraturaznaviec-puškinist. Byŭ sakratarom kamsamoła. U 1994-m uvajšoŭ u kamandu Alaksandra Łukašenki, paśla pieramohi na vybarach staŭ kiraŭnikom upraŭleńnia hramadska-palityčnaj infarmacyi Administracyi prezidenta. Mienavita jon uziaŭ na siabie adkaznaść za źjaŭleńnie ŭ hazietach «biełych plamaŭ». U 1995 syšoŭ z pasady, supracoŭničaŭ z mnohimi niezaležnymi vydańniami. Aŭtar knihi «Łukašenka. Palityčnaja bijahrafija». U 2010 hodzie staŭ adnym z kiraŭnikoŭ kampanii «Havary praŭdu». U kancy taho ž hoda trapiŭ u «amierykanku», adsiadzieŭ čatyry miesiacy.
Alaksandr Pierapiečka — žyvie ŭ Sietle (ZŠA). Skončyŭ aśpiranturu BDU i daktaranturu Vašynhtonskaha ŭniviersiteta. Doktar fiłasofii pa śpiecyjalnaści «Ekanamičnaja, sacyjalnaja i palityčnaja hieahrafija». Udzielnik mižnarodnych navukova-analityčnych prahram u Biełarusi, Rasii, ZŠA i Francyi. Ekśpiert pa statystyčnych madelach i Uschodniaj Jeŭropie. Kansultant pa hieapalitycy, hieastratehii i elitach.
Pavieł Kułažanka — 36 hadoŭ. Žyvie ŭ Ńju-Jorku (ZŠA). Słužyŭ va ŭnutranych vojskach u Połacku i Minsku i AMAPie. Syšoŭ sa słužby ŭ 2011 hodzie. Skončyŭ jurydyčny fakultet BDU. U ZŠA źjechaŭ žyć pa hryn-karcie, pracuje trenieram. Letam 2020 padtrymaŭ pratesty ŭ Biełarusi.
Dźmitryj Ščyhielski — psichijatr, jaki ŭ 2001 hodzie zavočna pastaviŭ Łukašenku dyjahnaz. Paśla hetaha pakinuŭ Biełaruś, ciapier žyvie ŭ ZŠA, zajmajecca tam hramadskaj dziejnaściu. Jeździŭ na vajnu va Ukrainu dobraachvotnikam.
Ihar Makar — 43 hady. Rodam z Hrodna. Były namieśnik kamandzira bajavoj hrupy antyterarystyčnaha padraździaleńnia MUS Biełarusi «Ałmaz». Skončyŭ Akademiju fizičnaha vychavańnia i sportu. Pakinuŭ słužbu i ŭznačaliŭ achovu byłoha eks-kandydata ŭ prezidenty Alaksandra Kazulina, z 2006 hoda — u emihracyi. Ciapier blizki da Volhi Karač.
Ryhor Kastusioŭ — 64 hady. U savieckija časy — dyrektar u saŭhasach u Mahiloŭskaj vobłaści, z taho času asabista viedaje Alaksandra Łukašenku. U niezaležnaj Biełarusi staŭ siabram Partyi BNF. Uznačalvaŭ ŽKH u Škłovie. U 2010 hodzie byŭ kandydatam u prezidenty ad Partyi BNF, adnu noč paśla vybaraŭ pravioŭ u «amierykancy». Na hety momant staršynia Partyi BNF.
Čytajcie. Łukašenka zajaviŭ, što Ziankovič i Fiaduta rychtavali zamach na jaho
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu3
Kamientary