Sudy nad Babarykam i Cichanoŭskim, samalot Ryanair i mihranty, razhrom ŚMI i Andrej Zielcer: hałoŭnyja ludzi i padziei 2021 hoda
«Naša Niva» tradycyjna zhadvaje hałoŭnyja momanty hoda: samych jarkich asob, samyja cikavyja padziei. Heta byŭ niaprosty hod dla mnohich biełarusaŭ: doŭhi i ciažki, niaredka zmročny, napoŭnieny navinami pra zatrymańni i pieratrusy, sudy i palitviaźniaŭ. Ale ž tamu jaho i varta pamiatać.
Praces hoda — sud nad Viktaram Babarykam
Na farmalna adkryty praces puścili tolki dziaržaŭnuju presu i rasijskija ŚMI. Ludzi stajali ŭ čarzie na lutaŭskim marozie, kab trapić na pasiadžeńnie, ale ž u zału akramia svajakoŭ nie davali ŭvajści amal nikomu. U tych, kaho ŭsio ž puskali na praces, zabirali telefony.
Babaryku vinavacili va ŭchileńni ad padatkaŭ u asabliva bujnym pamiery, lehalizacyi srodkaŭ, atrymanych złačynnym šlacham, i ŭ «pryniaćci słužbovaj asobaj materyjalnych kaštoŭnaściaŭ u asabliva bujnym pamiery ŭ składzie arhanizavanaj hrupy». Spravu razhladaŭ Viarchoŭny sud, što aŭtamatyčna vyklučała mahčymaść apielacyi.
Viktar Babaryka nie pryznaŭ vinu. U apošnim słovie jon zajaviŭ: «Ja nie mahu pryznać złačynstva, jakoha nie rabiŭ. Mnie nie soramna pierad svajoj siamjoj, pierad žonkaj i dziećmi. Navat niahledziačy na toje, što syn znachodzicca ŭ turmie, tamu što asnoŭnaja vina jaho ŭ tym, što jon moj syn. Mnie nie soramna pierad maimi siabrami i blizkimi, uklučajučy nie tolki svajakoŭ, ale i ludziej, jakija byli sa mnoj pa žyćci, u tym liku i pa pracy. Mnie nie soramna pierad supracoŭnikami banka za toje, što razam ź imi na praciahu 25 hadoŭ my zrabili adzin z najlepšych bankaŭ hetaj krainy».
6 lipienia 2021 hoda sudździa Ihar Lubavicki prysudziŭ Viktaru Babaryku 14 hadoŭ kałonii. Pakarańnie palityk adbyvaje ŭ navapołackaj kałonii №1.
Katastrofa hoda — razhrom niezaležnych miedyja i NKA
U pačatku hoda adbylisia sudy nad žurnalistkami Kaciarynaj Barysievič (Tutbaj) i Kaciarynaj Andrejevaj i Darjaj Čulcova (Biełsat).
Barysievič atrymała 6 miesiacaŭ kałonii za materyjał ab tym, što Raman Bandarenka byŭ ćviarozym u viečar zabojstva. Andrejevu i Čulcovu pakarali za strym razhonu Płoščy pieramien, prysudziŭšy kožnaj 2 hady kałonii.
Byli zatrymanyja i źmieščanyja ŭ SIZA žurnalisty Dzianis Ivašyn, Andrej Pačobut.
A ranicaj 18 maja siłaviki pryjšli ŭ ofisy partała Tutbaj i kampanii Hoster.by. Pieratrusy prajšli doma ŭ hałoŭnaha redaktara i žurnalistaŭ, a taksama ŭ rehijanalnych ofisach.
Zatrymali hałoŭreda Marynu Zołatavu, dyrektarku Ludmiłu Čekinu, buchhałtarku Anžełu Asad, žurnalistku Alenu Tałkačovu — ahułam 15 čałaviek.
11 i pa siońnia znachodziacca ŭ SIZA, troje pad chatnim aryštam. U tym liku pad chatnim aryštam i Julija Čarniaŭskaja, udava zasnavalnika Tut.by Juryja Zisiera.
Sajt partała zabłakavany.
KDK zajaviŭ, što jurydyčnaja asoba redakcyi, jakaja ŭ 2019 hodzie stała rezidentam PVT, atrymała vyručku, «nie abumoŭlenuju dziejnaściu, dazvolenaj dla rezidentaŭ». I ŭ vyniku «nieabhruntavanaha vykarystańnia dziaržaŭnaj padtrymki pryčyniła dziaržavie škodu ŭ asabliva bujnym pamiery».
Da razhromu ŭ redakcyi pracavała 250 čałaviek. Nievialikaja častka vyjechała z krainy i zasnavała partał Zerkalo. Sajty i ŭsie sacyjalnyja sietki Tut.by i Zerkalo ŭłady pryznali ekstremisckimi.
Praz dva miesiacy začystka praciahnułasia. 8 lipienia ź pieratrusam pryjšli ŭ redakcyju i kvatery kiraŭnikoŭ «Našaj Nivy», sajt zabłakavali.
Zatrymali hałoŭreda Jahora Marcinoviča, kiraŭnika adździeła rekłamy Andreja Skurko, redaktara časopisa «Naša historyja» i dziciačych «Dudu» i «Aściarožna: dzieci!» Andreja Dyńko, a taksama hałoŭnuju buchhałtarku «Našaj Nivy» Volhu Rakovič. Paźniej Marcinovič paviedamlaŭ, što jaho bili pry zatrymańni.
Rakovič i Dyńko paźniej adpuścili z abaviazkam ab jaŭcy, a Jahor Marcinovič i Andrej Skurko praciahvajuć znachodzicca ŭ SIZA.
Ich abvinavačvajuć pa č. 2 art. 216 KK («Naniasieńnie majomasnaj škody biez prykmietaŭ raskradańnia hrupaj asob»). Pretenzija zaklučajecca ŭ tym, što apłata za kamunalnyja pasłuhi pamiaškańnia była pa taryfach dla fizasobaŭ, a treba było płacić pa taryfach dla jurasobaŭ.
8 lipienia i ŭ nastupnyja dziesiać dzion prajšła chvala pieratrusaŭ u niezaležnych miedyja ŭ Minsku i rehijonach. Šmat sajtaŭ byli zabłakavanyja, mnostva žurnalistaŭ byli vymušanyja pakinuć Biełaruś. Sajty bujnych miedyja zabłakavanyja na terytoryi Biełarusi, ich sacyjalnyja sietki i telehram-kanały pryznajucca ekstremisckimi. Niešmatlikija niezaležnyja ŚMI, jakija praciahvajuć pracavać ź Biełarusi, vymušanyja ihnaravać hramadska-palityčnyja temy. Siońnia za kratami zastajecca 31 pradstaŭnik biełaruskich miedyja.
Akramia taho, ułady «začyścili» niekamiercyjnyja hramadskija arhanizacyi. Prajšli dziasiatki pieratrusaŭ, niekatoryja pradstaŭniki i kiraŭniki NKA trapili ŭ SIZA: pravaabaroncy Valancin Stefanovič, Uładź Łabkovič, Aleś Bialacki, kiraŭnik «Achovy ptušak Baćkaŭščyny» Viktar Fiančuk. Bolš za 250 NKA likvidavali: ad partyj i pravaabaroncaŭ da kulturnych centraŭ i bortnikaŭ.
Mižnarodny skandał hoda — pasadka samalota Ryanair i zatrymańnie Ramana Pratasieviča
23 maja ŭ Minsku ekstranna sieŭ łajnier, jaki lacieŭ pa maršrucie «Afiny — Vilnius», na borcie byŭ žurnalist i aktyvist Raman Pratasievič.
Biełaruski dyśpietčar paviedamiŭ piłotam, što na poštu aeraportaŭ pryjšoŭ list ab bombie ŭ samalocie. Dyśpietčar paraiŭ ekstranna sadžać samalot u Minsku, što i było zroblena. Nijakaj bomby nie znajšli, ale paśla pasadki Ramana Pratasieviča i jaho dziaŭčynu Safiju Sapiehu zatrymali. Nieŭzabavie jany dali niekalki pakajannych intervju dziaržaŭnym miedyja.
Viadoma, što paru ŭtrymlivali nie ŭ SIZA, jany žyli niejki čas razam u domie ci kvatery pad nahladam siłavikoŭ.
Vakoł pasadki samalota razharnuŭsia vialiki mižnarodny skandał. Jeŭrasajuz zabaraniŭ usim dziaržaŭnym biełaruskim avijakampanijam paloty nad svajoj terytoryjaj. Bujnyja mižnarodnyja avijakampanii pačali budavać maršruty tak, kab nie ŭvachodzić u biełaruskuju avijaprastoru.
Taksama suprać Biełarusi ŭviali novyja sankcyi, pašyryli piersanalnyja sankcyjnyja śpisy.
Ciapier hramadzianku Rasii Sapiehu vinavaciać až pa siami artykułach KK, joj pahražaje da 12 hadoŭ kałonii. Jana napisała prašeńnie ab pamiłavańni na imia Łukašenki.
Što z kryminalnaj spravaj Pratasieviča, nieviadoma (jaho vinavacili pa troch artykułach, pakarańnie taksama da 12 hadoŭ).
Biełaruski avijadyśpietčar Aleh Halehaŭ, jaki sadžaŭ samalot, źjechaŭ u Polšču, dzie daŭ pakazańni i pryvioŭ dokazy, što samalot sadžali pad nahladam biełaruskich śpiecsłužbaŭ.
Šok hoda — pierastrełka pamiž KDB i ajcišnikam Zielceram
28 vieraśnia siłaviki pryjšli ŭ zvyčajnuju minskuju kvateru pa vulicy Jakuboŭskaha. Vyłamali dźviery — a ŭ kvatery ich sustreŭ uzbrojeny strelbaj 31-hadovy ajcišnik Andrej Zielcer. U pierastrełcy zahinuŭ sam Zielcer i supracoŭnik KDB Dźmitry Fiedasiuk. Žonku Zielcera, jakaja taksama była ŭ kvatery, zatrymali i źmiaścili ŭ SIZA, jaje vinavaciać u saŭdziele ŭ zabojstvie. Taksama praŭładnyja kanały apublikavali videa, źniataje z kvatery Zielceraŭ, ale jano zmantavanaje tak, što zastajecca šmat pytańniaŭ. Što prymusiła paśpiachovaha maładoha ajcišnika pajści na taki radykalny ŭčynak, navošta jon zdymaŭ svaje dziejańni na videa? Adkazaŭ pakul niama.
Zabojstva kadebešnika paciahnuła nastupstvy. Siłaviki papiaredzili, što ciapier pry zatrymańniach buduć dziejničać bolš žorstka: «Kali my nie ŭbačym padniatych ruk — vorah budzie źniščany». Bolš za sotniu čałaviek zatrymali za «niapravilnyja» kamientary na adras zabitaha siłavika ci navat za spačuvalnyja słovy na adras Zielcera.
Byŭ zatrymany i žurnalist biełaruskaj «Kamsamolskaj praŭdy» Hienadź Mažejka. Jon apublikavaŭ na sajcie vydańnia kamientar adnakłaśnicy Zielcera, jakaja zhadała taho dobrym słovam. Za heta Mažejku abvinavacili ŭ raspalvańni rasavaj, nacyjanalnaj abo relihijnaj varožaści abo roźni i abrazie pradstaŭnika ŭłady. Siońnia žurnalist za kratami.
Sajt biełaruskaj «Kamsamołki» zabłakavali, paśla pradstaŭnictva haziety ŭ Biełarusi ŭvohule zakryli.
Kryzis hoda — situacyja ź mihrantami na miažy
Paśla ŭviadzieńnia sankcyj Łukašenka paabiacaŭ, što Biełaruś bolš nie budzie strymlivać mihrantaŭ, jakija sprabujuć trapić praź jaje terytoryju ŭ Jeŭrasajuz.
Tak i adbyłosia, ź leta kolkaść haściej z Uschodu i Afryki płanamierna rasła, jany praryvalisia na terytoryi Litvy i Polščy, biełaruskija pamiežniki nijak hetamu nie pieraškadžali. Pieryjadyčna mihranty hinuli, ale heta nie spyniała ich suajčyńnikaŭ.
Paźniej usio pierarasło ŭ arhanizavany «pachod na miažu», a paśla i šturm biełaruska-polskaha pamiežnaha pierachodu, jaki z zadavalnieńniem tranślavali biełaruskija dziaržSMI. Palaki ŭžyvali haz i vadamioty, mihranty — pałki i kamiani.
Biełaruskija prapahandysty tut ža abvinavacili ŭ pamiežnym kryzisie krainy ES i niepasredna Polšču.
Paśla hetaha situacyja časova zacichła. Mihranty spačatku asieli ŭ pamiaškańni łahistyčnaha centra ŭ Bruzhach, kudy da ich jeździli žurnalisty, čynoŭniki i navat sam Łukašenka, a zatym pačali viartacca na radzimu. Pa stanie na 19 śniežnia ŭ Bruzhach zastavałasia kala 700 čałaviek, ź jakich 200 dziaciej.
Cikava, što mihranty parušyli ceły šerah praviłaŭ znachodžańnia ŭ pamiežnaj zonie i naŭprost biełaruskich zakonaŭ (vyrubka lesu, razbureńnie biełaruskaha pamiežnaha pierachodu), ale ž nikoha ź ich nie pakarali. Zamiest hetaha siłaviki pryjšli da žycharoŭ Homielščyny, jakija pakidali «niapravilnyja» kamientary — ludziej zatrymlivali i prymušali vybačacca na videa, paśla zapisy pakazvali na miascovym telekanale.
Samy žorstki prysud hoda — 18 hadoŭ Siarhieju Cichanoŭskamu, hihanckija terminy jaho paplečnikam i błohieram
U śniežni ŭ Homielskim SIZA vynieśli prysudy tak zvanaj «hrupie Cichanoŭskaha».
Siarhiej Cichanoŭski atrymaŭ 18 hadoŭ kałonii, Arciom Sakaŭ i Dźmitry Papoŭ — pa 16 hadoŭ, błohiery Ihar Łosik i Uładzimir Cyhanovič — pa 15 hadoŭ, Mikoła Statkievič — 14 hadoŭ. Statkievič budzie adbyvać pakarańnie ŭ kałonii asablivaha režymu, usie astatnija — va ŭmovach uzmocnienaha režymu.
Paźniej vialiki termin — 13 hadoŭ kałonii — dali i błohieru Eduardu Palčysu.
Sudy prachodzili ŭ zakrytym režymie, hramadstva nie viedaje, u čym zaklučajecca vina hetych ludziej, jak jany źviazany pamiž saboj i jakija złačynstvy zrabili. Ale niaredka za zabojstvy davali mienš, čym za sproby niešta źmianić u krainie.
A ŭ mai 2021 na tyja ž 18 hadoŭ byŭ asudžany kapitan Dzianis Urad, jaki byŭ dziažurnym pa śpiecsuviazi Hienštaba. Jon pieradaŭ telehram-kanałam infarmacyju pra płany siłavikoŭ na Dzień Voli, čym «nanios škodu dziaržaŭnaj biaśpiecy».
Zmova hoda — Fiaduta, Ziankovič, Kastusioŭ i padrychtoŭka pieravarotu
Amierykanskaha jurysta Jurasia Ziankoviča, biełaruskaha palitołaha i litaraturaznaŭcu Alaksandra Fiadutu zatrymali ŭ Maskvie, lidara partyi BNF Ryhora Kastusiova — u Škłovie. Ich abvinavacili ŭ padrychtoŭcy dziaržpieravarotu i zamachu na Łukašenku. ANT pakazała dakumientalny film, dzie demanstrujucca pieramovy ŭ zumie siami čałaviek: akramia zatrymanych tam byli psichijatr Ščyhielski, były amapaviec Kułažanka, eks-«ałmazaviec» Ihar Makar i inšyja.
Humarysty achryścili zmovu «zmovaj jurysta i puškinista», namiakajučy na Ziankoviča i Fiadutu, ale ž śmiešnaha ŭ situacyi ničoha niama. Troje zatrymanych niemaładych ludziej znachodziacca ŭ SIZA, im pahražaje ad 8 da 12 hadoŭ kałonii, a ŭ Kastusiova jašče i padazrajuć ankałohiju.
Palitviazień hoda — Maryja Kaleśnikava
Pryhožaja i mužnaja žančyna, jakaja śviadoma vybrała kraty na Radzimie zamiest voli za miažoju.
Kaleśnikavu ŭtrymlivali ŭ SIZA z taho samaha momantu na miažy, kali jana parvała svoj pašpart, kab nie być vykinutaj za terytoryju Biełarusi.
Bolš za hod jana praviała za kratami, jaje sudzili, abvinavaciŭšy ŭ zmovie, stvareńni ekstremisckaha farmiravańnia, zaklikach da zachopu ŭłady. Maryja paśmichałasia na sudzie, jaki pryhavaryŭ jaje da 11 hadoŭ kałonii.
Advakat hoda — Maksim Znak
Biełaruskuju advakaturu hramili ŭvieś hod, mietadyčna pazbaŭlajučy abaroncaŭ advakackich licenzij. Skončyłasia ŭsio ŭvohule pryznačeńniem na pasadu ministra justycyi byłoha siłavika.
Ale ž advakat Maksim Znak za svaju pazicyju i abaronu «nie taho» klijenta pazbaviŭsia nie tolki prafiesii, ale i voli. Jaho abvinavacili ŭ zmovie i zaklikach da zachopu ŭłady. U vieraśni Znaka sudzili razam z Maryjaj Kaleśnikavaj, jon atrymaŭ 10 hadoŭ kałonii.
Miedyk hoda — Uładzimir Martaŭ
Viciebski reanimatołah Uładzimir Jurjevič Martaŭ adnym ź pieršych biełaruskich miedykaŭ, jaki adkryta havaryŭ pra kavid i źviazanyja ź im prablemy.
Fota Alaksandra Vieledzimoviča dla partała «Imiena»
A ŭ sakaviku 2021 jon raskazaŭ pra avaryju na kisłarodnaj stancyi viciebskaj balnicy, u vyniku čaho pamierli niekalki pacyjentaŭ. Zdavałasia b, žachlivaja infarmacyja. Ale dalej usio było čakana: kamisii, Śledčy kamitet, zajavy Minzdaroŭja i navat Łukašenki — i nul vinavatych. A z samim Martavym nie praciahnuli kantrakt.
Siłavik hoda — Stanisłaŭ Łupanosaŭ
Padpałkoŭnik HUBAZiK Łupanosaŭ pieradaŭ ruchu za svabodnyja vybary vializny masiŭ unutranaj infarmacyi pra śpiecsłužby. Siońnia Łupanosaŭ znachodzicca za miažoj.
«Ja bačyŭ, jak raźvivajecca situacyja ŭ krainie, da jakoha krachu viaduć nas hetyja ŭłady, jak kalehi zajmajucca vidavočnymi złačynstvami, jak načalniki ich da hetaha padbuchtorvajuć. Va ŭsim hetym ja ŭdzielničać nie chacieŭ, — kazaŭ jon. — A prosta syści i nazirać moŭčki, jak hramiać maju krainu? Nie. Ja vyrašyŭ na karyść radzimy vykarystać svaje viedy, što ź Biełarusi b było zrabić niemahčyma».
Sprečka hoda — vakcynacyja
U 2021 hodzie ŭ Biełarusi narešcie pačali pryščaplać ad kavidu nasielnictva. Biaspłatna, vykarystoŭvajučy na vybar rasijskuju i kitajskuju vakcyny.
Amal adrazu ž hramadstva padzialiłasia na dźvie častki: prychilnikaŭ i kateharyčnych praciŭnikaŭ vakcynacyi. Pryčym, kali pieršyja spasyłalisia na daktaroŭ, to druhija čaściej za ŭsio na znajomych, jakim chtości štości dzieści paviedamiŭ, dalokich ad miedycyny błohieraŭ, amatarskija ci kanśpirałahičnyja artykuły ŭ siecivie.
Biełaruskija miedyki nahadvali pra nieabchodnaść pryščepki, zapeŭnivajučy, što heta adziny dziejsny sposab spynić pandemiju i abyjścisia bieź ciažkich nastupstvaŭ chvaroby. Ale ŭsie arhumienty raźbivalisia ab zvyčajnaje pobytavaje «nu ja niejak nie viedaju, niejak nie chaču». Častka ludziej vakcynavałasia b navat za hrošy, pry najaŭnaści jeŭrapiejskaj vakcyny. Ale, jak vyśvietliłasia, jaje nie pryvoźli śpiecyjalna. Łukašenka paviedamiŭ, što zachodnija vakcyny patrebnyja apazicyjanieram, kab «jany mahli pryščapicca, atrymać pašpart i jechać na Zachad instrukcyi atrymlivać».
Taksama prapahandu vakcynacyi pravaliła dziaržava. Sam Łukašenka vykazaŭsia, što kali biełarusy raspracujuć svaju vakcynu, tady jon i pryščepicca. A jaho pavodziny ŭ balnicy jaskrava śviedčać pra staŭleńnie da «karony» i mier biaśpieki:
Uvosieni ž, kali praciŭniki ŭłady pačali zaklikać ludziej «nasić masku, kali suprać Łukašenki». Sam Łukašenka ŭvohule admianiŭ abaviazkovy masačny režym, štrafy za adsutnaść masak, taksama zahadaŭ nie prymušać ludziej vakcynavacca.
Jak zvyčajna, sistema pajšła dalej — u handlovych ustanovach, aptekach, inšych publičnych miescach pačali terminova prybirać navat nadpisy pra nieabchodnaść i karyść masak.
Fatohraf hoda — Nadzieja Bužan
Fatohrafka «Našaj Nivy» Nadzieja Bužan zaniała druhoje miesca ŭ naminacyi spot news (haračyja naviny) samaha prestyžnaha konkursu prafiesijnaj fatahrafii ŭ śviecie — World Press Photo
Nadzieju ŭznaharodzili za zdymak, na jakim Volha Sieviaryniec z kvietkami bieznadziejna čakaje muža pad Akreścina.
Padtrymka hoda — Illa Mironaŭ
Homielski vałancior Illa Mironaŭ napisaŭ palitviaźniam bolš za 2500 listoŭ. Ale ŭvosieni sam staŭ adnym z palityčnych źniavolenych — jaho zatrymali za spačuvalny kamientar u adras Andreja Zielcera i źmiaścili ŭ homielski SIZA.
Viadoma, što Mironaŭ ciapier prachodzić pa kryminalnaj spravie pa artykułach 369 KK (abraza pradstaŭnika ŭłady) i 130 KK (raspalvańnie sacyjalnaj varožaści)
Muzyki hoda — «Krasnaja zieleń»
Zroblenyja na kalency satyryčnyja klipy Marharyty Laŭčuk i Andreja Pavuka źbirajuć sotni tysiač hledačoŭ. U topavych videa až 700-900 tysiač prahladaŭ!
Viasioły duet nazyvajecca «Krasnaja Zieleń».
Opiernaja zorka Laŭčuk vymušanaja była vyjechać na pracu za miažu paśla taho, jak zvolniłasia ź Vialikaha teatra Biełarusi. Pieśni jana zapisvaje z hitarystam i błohieram z Akciabrskaha Homielskaj vobłaści Andrejem Pavukom.
Padziaka hoda — Kaciaryna Vińnikava, vypusknica jurfaka BDU
Kaciaryna padčas uračystaha ŭručeńnia dypłomaŭ vykazała padziaku sa sceny Maksimu Znaku i zvolnienym pa palityčnych matyvach vykładčykam.
Zatym u jaje ŭ internacie adbyŭsia pieratrus, byŭ kanfiskavany noŭtbuk, a dziaŭčynu zatrymali, abvinavacili, što jana «praviała pikietavańnie», na jakoje nie byŭ atrymany dazvoł vykankama i asudzili na 15 sutak.
Paśla vychadu na volu dziaŭčyna daviedałasia, što jaje nie raźmiarkujuć u Ministerstva pa padatkach i zborach, jak płanavałasia. Zamiest hetaha Vińnikavu raźmierkavali na sielhaspradpryjemstva ŭ Čačerskim rajonie.
Dziciačy piśmieńnik hoda — Andrej Skurko
Kiraŭnik adździełu rekłamy «Našaj Nivy» za kratami pačaŭ pisać vieršy svajmu małomu synu — ale jany atrymali pryznańnie nie tolki siarod svajakoŭ Andreja!
Cieraź les idzie ciahnik —
zajcy jeduć na piknik!
Pravadnik u ich — babior,
a varona — kantralor.
Ciahničok «tu-tu!» śpiavaje,
mašynist jaho spyniaje,
bo la kožnaje nary
ich nadčekvajuć siabry.
Dźvie lisicy-pravadnicy
razdajuć źviaratam picu,
chamiaki, miadźviedź i sojki
paraźviazvali ssabojki.
Chaj sabie idzie ciahnik —
pačynajecca piknik!
Hetyja vieršy nastolki spadabalisia kamandzie biełaruskamoŭnaha YouTube-kanała «Bejbus», što aŭtary vyrašyli zapisać aŭdyjaknihu vieršaŭ našaniŭca. Nieabchodnaja suma ŭžo sabranaja, ale zbor vyrašyli nie zakryvać. Usie žadajučyja mohuć achviaravać hrošy dla vydańnia papiarovaj knihi ź vieršami Andreja Skurko.
Spartsmienka hoda — Hanna Soła
Bijatłanistka Soła ŭziała ŭ 2021 hodzie svajo pieršaje zołata na etapie Kubka śvietu i bronzu ŭ spryncie na Čempijanacie śvietu.
Akramia taho Hanna Soła — adzinaja bijatłanistka biełaruskaj zbornaj, jakaja paśla padziej žniŭnia 2020 hoda nie padpisała praŭładny list spartsmienaŭ. Tłumačačy svajo rašeńnie, jana adznačyła: «Mnie jość za što skazać dziakuj krainie, ale ŭ pieršuju čarhu chaciełasia b, kab sport zastavaŭsia pa-za palitykaj. Ciažka kancentravacca na spartyŭnych vynikach, kali čytaješ sumnyja naviny ź Biełarusi. Tamu maja pazicyja navat nie palityčnaja, a ahulnačałaviečaja: za mir, vykanańnie zakonaŭ i vyrašeńnie lubych pytańniaŭ biez prymianieńnia hvałtu».
Biahucha hoda — Kryścina Cimanoŭskaja
Na Alimpijadzie ŭ Tokia Kryścina ŭ svaim instahramie raskrytykavała kiraŭnictva zbornaj za rašeńnie raptoŭna pastavić jaje na estafietu 4 pa 400 mietraŭ, u jakoj jana nie płanavała ŭdzielničać.
Za publičnaje abureńnie dziaŭčynu chacieli prymusam viarnuć ź Japonii ŭ Biełaruś, u aeraport jaje supravadžaŭ psichołah zbornaj i pradstaŭnik delehacyi. Cimanoŭskaja admoviłasia sadzicca ŭ samalot i źviarnułasia pa dapamohu da miascovaj palicyi i ŭ Mižnarodny alimpijski kamitet.
Skončyłasia skandałam: źjaviłasia aŭdyja, na jakim členy biełaruskaj delehacyi ŭhavorvajuć spartsmienku «ničoha nie pisać, ničoha nie kamientavać», a taksama viarnuć sutačnyja. Na tym ža zapisu, čuvać, jak Cimanoŭskaja płača padčas «uhavoraŭ».
U vyniku, Kryścina z mužam paprasili prytułku ŭ Polščy. A prapahandyst Azaronak prabiŭ čarhovaje dno: u svaim telehramie niekalki razoŭ nieprystojna abaraziŭ dziaŭčynu i pažadaŭ «adpravić jaje tudy, kudy jana tak žadaje. U Jeŭropu. U Litvu. U łahier biežancaŭ. Da dźviuch socień dužych mužykoŭ ź Blizkaha Uschodu».
Tranśfier hoda — Lea Mieśsi ŭ Paryžy
Sioleta čutki stali realnaściu — lehienda «Barsiełony» Mieśsi syjšoŭ z kłuba, pravioŭšy ŭ im 18 hadoŭ. Jon vyrašyŭ praciahnuć karjeru ŭ «Pary Sen-Žermien».
Adznačym jašče dva važnych futbolnych tranśfiera. U PSŽ taksama pierajšoŭ i kapitan madrydskaha «Reała» Sierchia Ramas, a Kryšcijanu Ranałdu źmianiŭ italjanski «Juvientus» na anhlijski «MIU».
Intervju hoda — hutarka z Łukašenkam na BBC
Prykład bliskučaj žurnalisckaj pracy karespandenta Ściviena Rozenbierha, razmova, jakaja pakazała sapraŭdnaha Łukašenku. Jon navat pryznaŭ źbićcio pratestoŭcaŭ na Akreścina.
Paśla skaročanaja viersija vyjšła na VVS, zmantavanaja — na BT. Poŭnuju rasšyfroŭku razmovy možna pračytać tut.
Aŭdyja hoda — źlivy čynoŭnikaŭ i siłavikoŭ
Uvieś hod u sieciva vykładvali razmovy ludziej, čyje hałasy vielmi padobnyja na biełaruskich čynoŭnikaŭ i milicejskich kiraŭnikoŭ. Ź ich možna było zaŭvažyć, jak siłaviki staviacca da padziej 2020 hoda, da svaich kaleh, jak žyvuć i razmaŭlajuć, jak usprymajuć pratestoŭcaŭ i samich siabie. A taksama daviedacca pra «palavańnie na ludziej», jak nazyvali svaje rejdy praŭładnyja zrazalščyki stužak uvosieni 2020. Padčas adnaho z takich rejdaŭ byŭ zabity Raman Bandarenka.
Rospačny ŭčynak hoda — sproba samahubstva Ściapana Łatypava ŭ zali suda
Žychar «płoščy Pieramien», arbaryst Ściapan Łatypaŭ byŭ zatrymany ŭ vieraśni 2020, kali nie davaŭ zamalavać viadomy murał z dydžejami. Na Łatypava zaviali kryminałku, pradjavili ceły šerah abvinavačańniaŭ: machlarstva, niepadparadkavańnie milicyi, masavyja biesparadki.
Sud pačaŭsia ŭ mai 2021. Na pasiadžeńni Ściapan skazaŭ svajmu baćku: «Paśla spatkańnia [z taboj] da mianie pryjšoŭ HUBAZ, paabiacaŭ, što kali ja nie pryznaju vinu, u mianie budzie pres-chata, kryminalnyja spravy suprać rodnych i susiedziaŭ».
«Pres-chata ŭ mianie była — 51 dzień, — skazaŭ Ściapan baćku. — Tak što ty rychtujsia». Paśla Łatypaŭ uvatknuŭ sabie ŭ horła ručku.
Ściapan vyžyŭ, niejki čas pravioŭ u balnicy, paśla sud praciahnuŭsia. Łatypavu prysudzili 8,5 hadoŭ kałonii. Za ździeki nad im nie pakarali nivodnaha siłavika.
Mužnaść hoda: Roma Kahadoŭski i lotčyki Andrej Ničyporčyk i Mikita Kukanienka
U krasaviku ŭ Miadzielskim rajonie 12-hadovy chłopčyk Roma Kahadoŭski vynies z pałajučaj chaty svajho dvuchhadovaha bracika. Roma atrymaŭ mocnyja apioki, pieranios šerah apieracyj, paŭhoda pravioŭ u balnicy.
Romu ŭznaharodzili ordenam «Za asabistuju mužnaść». Fota sb.by
A 19 maja ŭ Baranavičach upaŭ vajskovy samalot JAK-130, zahinuli dvoje piłotaŭ: major Andrej Ničyporčyk i lejtenant Mikita Kukanienka.
Lotčyki advodzili samalot ad nasielenaha punkta i ŭ vyniku katapultavalisia zanadta pozna. Ich uznaharodzili zvańniami «Hierojaŭ Biełarusi» paśmiarotna.
Na žal, u abvodvuch vypadkach nie abyjšłosia biez palityki. Kahadoŭskaha pastajanna vykarystoŭvała dziaržprapahanda: u siužetach TB milicyjanty ŭračysta pieradavali baćkam chłopca hrošy, adsudžanyja ŭ pratestoŭcaŭ. Paśla vypiski Roma sustreŭsia z Łukašenkam, atrymaŭ orden, a paźniej stała viadoma, što chłopčyk budzie vučycca ŭ licei MUS.
Hibiel piłotaŭ ža stała nahodaj da pieršaha «prymušeńnia da žałoby» z boku siłavikoŭ. Jany praviali sapraŭdnuju začystku kamientataraŭ, jakija abraźliva ci prosta niejak «nie tak» vykazvalisia ŭ sacsietkach. Ludziej prymušali vybačacca na videa, niekatorych pakidali na niekalki sutak za kratami.
Błohier hoda — Siarhiej Čały
Chtości kaža — intelektualna i zachaplalna, chtości kaža — doŭha i nudna, ale ž imia Siarhieja Čałaha ciapier užo viedajuć amal usie. U štotydniovych pramych efirach analityk dzielicca prahnozami, raźbiraje pramovy Łukašenki, adkazvaje na pytańni jak pra ekanomiku i palityku, tak i pra piva dy futboł.
Jaho kanał «Čałyj Live» źjaviŭsia ŭ lutym i za niapoŭny hod sabraŭ amal 85 tysiač padpisčykaŭ. Samaje papularnaje videa prahladzieli 331 tysiaču razoŭ — vydatna dla biełaruskaha Jutuba.
Komik hoda — Słava Kamisaranka
Biełaruski stendapier, jaki ŭžo daŭno žyvie ŭ Maskvie, vystupaŭ i ŭ televizijnych šoŭ, i z solnymi kancertami. Ale ž sioleta Słava vyjšaŭ na novy ŭzrovień papularnaści. Jon zapuściŭ novy farmat u svaim Jutubie, źniaŭ solny kancert, narešcie pabyvaŭ u Dudzia. A jaho manałohi pra «Čyk-Čyryka» razarvali internet. Taksama Słava pastajanna pryciahvaŭ uvahu da taho, što adbyvałasia i adbyvajecca pa siońnia ŭ Biełarusi.
Simulakr hoda — Jury Vaskrasienski
Vaskrasienski ŭvieś hod staranna imitavaŭ kipučuju dziejnaść. Dasyłaŭ listy palitviaźniam, zaklikajučy tych pisać prašeńni ab pamiłavańni Łukašenku, nibyta praciahvaŭ stvarać dekaratyŭnyja psieŭdaapazicyjnyja partyi, jeździŭ va Ukrainu i Polšču.
Voś tolki vyniki jaho dziejnaści ci to sumnyja, ci to śmiešnyja. Partyi isnujuć chiba tolki na papiery, pamiłavali 13 čałaviek, i toje: častku pieraviali na «chimiju», nie vyzvalili nivodnaha fihuranta nivodnaj z hučnych spraŭ. Navat niaščasny Dzima Hopta, chłopiec z razumovaj adstałaściu, praciahvaje siadzieć u kałonii.
Apahieja «vaskrasienščyna» dasiahnuła ŭvosieni. Jury Vaskrasienski paviedamiŭ, što pradstaŭniki tak zvanaha Kruhłaha stała demakratyčnych siłaŭ naviedvajuć u Kijevie administracyjnyja budynki i pravodziać kansultacyi z aficyjnymi asobami. U jakaści paćvierdžańnia byŭ apublikavany fotazdymak «kiraŭnika pravaabarončaj kamisii KSDS» Kacarenki la dźviarej ukrainskaha Sakrataryjatu ŭpaŭnavažanaha Viarchoŭnaj rady pa pravach čałavieka.
Žurnalisty zacikaviłsia hetym faktam i dasłali zapyt u Sakrataryjat upaŭnavažanaha Viarchoŭnaj rady. I atrymali adkaz: toj Kacarenka ni z kim nie sustrakaŭsia i ŭvohule nie zachodziŭ u budynak. Jon prosta padyjšoŭ i sfatahrafaŭsia la dźviarej.
Zvalnieńnie hoda — Lidzija Jarmošyna
Jarmošyna kiravała CVK z 1996 hoda, ale vybary 2020 stali dla jaje apošnimi.
Fota Siarhieja Hudzilina
Imia Lidzii Jarmošynaj faktyčna stała sinonimam niačesnych vybaraŭ. «Jarmošyna — heta ŭžo nie proźvišča, heta brend stvareńnia paralelnaj realnaści, ničym nie padobnaj da taho, jak ludzi realna hałasujuć i jakija ličby ahučvajuć», — kazaŭ palitołah Valer Karbalevič.
Za čas svajoj addanaj słužby Jarmošyna straciła syna, i adkryta kazała, što zastałasia adna. «Budu čakać sychodu z žyćcia», — adkazvała jana na pytańnie, čym budzie zajmacca na piensii.
Jarmošynu zamianiŭ Hienadź Karpienka, kamunist, były ministr adukacyi.
Cytata hoda: «Ci mohuć być siabrami nieznajomyja ludzi? Mohuć, kali jany biełarusy!»
Hetyja słovy Vitolda Ašurka stali sapraŭdnym łozunham. Na žal, užo paśla śmierci ich aŭtara.
50-hadovy Vitold Ašurak, aktyvist i palitviazień ź Biarozaŭki byŭ asudžany ŭ Lidzie na zakrytym pracesie, jamu prysudzili 5 hadoŭ kałonii ahulnaha režymu. Ašurak byŭ siabram Partyi BNF, kaardynataram ruchu «Za Svabodu», byŭ biaskonca addany Biełarusi.
U mai Vitold raptoŭna pamior u škłoŭskaj kałonii. SK apublikavaŭ narezku ź videa, na jakich bačna, jak Ašurak padaje, paśla jamu bintujuć hałavu. Ź videa vynikaje, što Vitold utrymlivaŭsia ŭ štrafnym izalatary, čamu — nieviadoma.
Vyniki pravierki pa fakcie jaho śmierci taksama nieviadomyja. Kryminalnuju spravu nie zaviali.
Zatoje zaviali kryminalnuju spravu na ludziej, jakija pryjšli padtrymać Vitolda jašče zimoju, u dzień abviaščeńnia prysudu i skandavali ŭ sudovaj zali «Hańba!». Ciapier im pahražaje kałonija.
Admiena hoda — Čempijanat śvietu pa chakiei
ČS-2021 musiŭ prajści sumiesna ŭ Biełarusi i Łatvii. Ale paśla hvałtu z boku siłavikoŭ i dziaržaŭnych represij usio čaściej pačali hučać hałasy, kab u Biełarusi adabrali prava prymać turnir.
Rene Faziel prylataŭ u Minsk, sustrakaŭsia z Łukašenkam, fatahrafavaŭsia z Baskavym — ale biełaruskim spartovym funkcyjanieram heta nie dapamahło. U studzieni 2021 hoda kampanii «Nivieja», «Škoda», «Likvi Moli» zajavili, što nie buduć sponsarami turniru, kali matčy projduć u Biełarusi — paśla čaho było kančatkova vyrašana, što turnir projdzie tolki ŭ Łatvii.
Biełaruskaja zbornaja pajechała ŭ Łatviju, dzie vyjhrała adzin matč i prajhrała šeść.
Uciakač hoda — polski pamiežnik
U śniežni polski sałdat Emil Čečka źbieh u Biełaruś, dzie adrazu ž staŭ hierojem usich dziaržaŭnych ŚMI, raskazvajučy ŭ intervju fantasmaharyčnyja historyi pra žorstkaść połśkich siłavikoŭ. «Nikoli nie było takoj situacyi, kab my pravodzili mihrantaŭ i ich nie zabili», — kazaŭ Čečka, praŭda, nie pradastaŭlajučy nijakich dokazaŭ.
Palaki ŭ svaju čarhu paviedamili, što ŭ vieraśni Čečku sudzili za žorstkaje abychodžańnie ź blizkimi (pavodle žurnalistaŭ, jon źbiŭ maci), 12 śniežnia jon byŭ zatrymany za kiravańnie ŭ niećviarozym stanie. Paviedamlajecca taksama, što ŭ chłopca prablemy z ałkaholem i narkotykami.
Krynž hoda — Łukašenka i špic śviatkujuć Vadochryšča
Spačatku sabaka siadzieŭ na stale padčas intervju z rasijskaj žurnalistkaj Askier-Zade, ale heta byli jašče kvietački. Na Vadochryšča pres-słužba Łukašenki vykaciła videa, vartaje stužak ci to Devida Linča, ci to Sašy Barona Koena. Na im u pustoj paŭciomnaj altancy Łukašenka čokajecca kubačkam vady z sabakam. Absalutny šedeŭr.
Miem hoda — homielski vajenkam Kryvanosaŭ
Na Usiebiełaruskim narodnym schodzie vajskovy kamisar Homielskaj vobłaści Andrej Kryvanosaŭ paprasiŭ pacisnuć ruku Łukašenku, kab atrymać «zarad enierhii i rašučaści».
A praź niekalki dzion źjaviłasia adrazu niekalki videa, jak Kryvanosaŭ pieradaje «zarad rašučaści» svaim kaleham, a paśla i milicyjanieram.
Mietafara hoda — rybak sa Słucka
No comments.
Čytajcie taksama:
Čałaviek hoda pa viersii «Našaj Nivy» — Darja Łosik
U ZŠA pačaŭsia padlik hałasoŭ. Tramp pakul lidziruje z vynikam 101 na 49
Kamientary