U Smalensku chłopca biez hałavy pryznali prydatnym da vajskovaj słužby
Z dakumientaŭ vynikaje, što małady čałaviek prajšoŭ miedkamisiju ŭžo paśla śmierci.
Alaksandr zahinuŭ u kastryčniku 2021 hoda. Jahonaje cieła z adździelenaj hałavoj znajšli na čyhunačnych puciach. Kryminalnaja sprava pa fakcie hibieli 19-hadovaha chłopca rasśledujecca dahetul.
Praz dva hady śledčy zapytaŭ asabistuju spravu Alaksandra ŭ vajenkamacie, kab udakładnić źviestki pra stan jahonaha zdaroŭja. Vyjaviłasia, što, miarkujučy pa danych vajenkamata, chłopiec na nastupny dzień paśla śmierci prajšoŭ miedkamisiju, piša telehram-kanał Baza.
U dakumientach paznačana, što jon nibyta skardziŭsia na zdaroŭje, chłopcu byccam by praviali niekalki abśledavańniaŭ, jon zdaŭ analizy, pa vynikach pravierki było składziena nie mienš za dva akty ahladu. Dakumienty padpisali piać daktaroŭ roznych śpiecyjalizacyj — i ŭsie jany adnahałosna pryznali Alaksandra abmiežavana prydatnym da vajskovaj słužby.
Svajaki chłopca źviarnulisia ŭ prakuraturu z patrabavańniem pravieryć dziejańni daktaroŭ na adpaviednaść zakonu, adnak užo hod čakajuć rašeńnia śledstva. Ekśpierty ministerstva justycyi niekalki razoŭ sprabavali vyznačyć daŭninu podpisaŭ i piačatak u miedycynskich dakumientach, ale da hetaha času nie zmahli ŭstanavić ich dakładnyja daty.
Jak raskazali rodnyja Alaksandra, da śmierci jon navat nie atrymlivaŭ pozvaŭ. U 2019 i 2021 hadach u dakumientach chłopca taksama sustrakalisia padazronyja zapisy: u roznyja pieryjady jon nibyta znachodziŭsia na abśledavańniach u roznych balnicach adnačasova.
Svajaki patrabujuć razabracca, ź jakoj metaj daktary zrabili słužbovuju padrobku.
Kamientary