Džejkab Hałachier, ahladalnik mužčynskaje mody The Wall Street Journal, naprykancy hoda tradycyjna robić padborku najbolš frykavatych rečaŭ pret-a-parte hoda: abutak z palcami, harnitury z krop-topam, nu i pamiž imi ŭsiakija štuki.
Za apošniaje dziesiacihodździe brendy adzieńnia i abutku zasvoili, što dla chajpu (asabliva ŭ Internecie) ty pavinien stvarać šakujučaje, a nie pryhožaje. Jak niadaŭna skazaŭ kreatyŭny dyrektar Gucci Alesandra Mikiele: «A mnie padabajecca aby-što».
Jak heta pracuje? Aby-što pradajecca — kali jano na słychu. Na sajcie Gucci śvitšot za 1250 dalaraŭ z nadrukavanaj na im frykavaścieńkaj istotaj ź ikłami amal raskupleny.
Jak i sumnieŭnaha hustu espadrylji na abcasie za 620 dalaraŭ, zaštampavanyja G G G G G G — pryntami Gucci.
Inšyja brendy stvarajuć rečy niedzie ŭ pramiežku miž hullivaj fihnioj i realnym vyrodstvam. Krasoŭki Yeezy Foam RNNR ad Adidas vyhladajuć, niby ŭziali pancyr ad čarapachi, jaki prapuścili praz Smush, prakałupali, pradziravali, i ciapier uciuchvajuć pa canie, utraja daražejšyja za pačatkovyja 80 dalaraŭ.
Na vierchnim kancy liniejki bucik-brend ERL raspradaje svaje puchaviki ŭ hamie a-la Peter Maks za niejkich usiaho tolki 865 dalaraŭ.
Sioleta anłajn-upłyŭ staŭ jašče važniejšy. Kavid nie ścichaje, tamu ludzi mienš zakuplalisia ŭ kramach, a modnyja brendy admianiali podyumnyja pakazy, a zamiest ich pravodzili videaprezientacyi. I bolšaść modnych krytykaŭ u hetym hodzie razhladali apranachi pieravažna na ekranie kampjutara — u tym liku i frykavatyja štuki, ad jakich chočacca skryvicca ci paržać.
U modzie byli pryhožyja abjomnyja ciomna-sinija švedry i luminiescentnyja biełyja krasoŭki — takoha dabra było mora (a, moža, i akijan), ale stvaryć niešta hienijalnaje, niezabyŭnaje, vyhadna niepryhožaje? Heta patrabuje majsterstva. Voś vam vosiem šedeŭraŭ trešu. I da sustrečy ŭ nastupnym hodzie…
1. Abutak ad Avavav «Very Slimy Feet» (Vielmi ślizkija nohi).
Hetyja ŭnisieks boty-biehiemoty koleru vodaraściaŭ i z palcami-pieraponkami ad italjanskaha łejbła Avavav, jaki ciapier na ŭzdymie, vyhladajuć tak, niby jany ŭciakli sa zdymačnaj placoŭki «Bałotnaj istoty» («Swamp Thing»).
2. Nieabdymny ružovy švedar ad Rafa Simansa (Raf Simons)
U sakaviku bielhijski dyzajnier Raf Simans adpraviŭ na podyumnuju darožku jarka-ružovy švedar sa słanovymi rukavami, ale ludzi realna zaŭvažyli miehatrykatažynu, tolki kali hulec baskietbolnaje kamandy Washington Wizards Kajł Kuźma apranuŭ jaho pierad listapadaŭskaj hulnioj. Huru ŭ tvitary paraŭnoŭvali švedar z nadzimanaj humovaj fihuraj, Ružovaj Panteraju i hierojami malunkaŭ Doktara Śjuza. Tolki fanaty pamiatajuć, ci pieramahli Wizards u toj viečar… ale švedar to pamiatajuć mnohija. Takoje jak adzin raz pabačyš, užo nikoli nie zabudzieš.
3. Hadzińnik mińjonaŭ ad Kanstancina Čajkina
Praz hadoŭ dziesiać paśla premjery filma «Hadki ja» rasijski majstar hadzińnikaŭ Kanstancin Čajkin sklapaŭ niajasny hadzińnik z krutlavymi vačyma pa temie tryndziučych, jak ukraincy ich nazyvajuć, posipak. Hadzińniki — u kolkaści ŭsiaho 38 štuk — pradavalisia pa canie kala 15 000 dalaraŭ. Usie pradalisia. «Hadkaje», vidać, u vačach hledača.
4. Čaraviki z malavanymi palcami Suicoke i Midorikawa
Paśla taho jak Balenciaga upieršyniu vyvieŭ na podyum abutak-z-palcami, heta stała dzikim trendam. Jak zrabić raspalcoŭku bolš urodskaj? Rasfarboŭvajem paznohci. Hetyja kałabaratyŭnyja vyčvareńni z višniovym «piedykiuram» kaštujuć 268 dalaraŭ. Zatoje za manikiurny sałon płacić nie treba… Ci nie tak?
5. Karotkija harnitury z urezanym topam Fendi
Ja nie suprać, chaj mužčyna ahalaje cieła. Trochi. Ale harnitur Fendi z aholenym pupkom — heta kali vy nastolki zasiarodžvajeciesia na demanstracyi svajho mahutnaha presa, što hublajecie ŭsialakija ramki. Dla plažnaha hety kaścium zanadta strohi, dla S-luksa —zanadta dziorzki. Hetaje paskudstva vyhladaje tak, niby šviejnaja mašynka zažavała druhuju pałovu.
6. Piakielnyja čaraviki ad Mschf
Hetyja krosy, padešvu jakich vyrablajuć (nu nibyta) z vykarystańniem čałaviečaj kryvi i jakija pijaryŭ Lil Nas X (cana, na siekundačku, 1018 baksaŭ), sudovy pazoŭ (paźniej adklikany) i raspaliŭ piakielny srač anłajn.
7. Pakiet kansoli Microsoft XBox x Gucci Series X Special Edition
XBox Series X pradajecca za 500 dalaraŭ. Mieha-mieha-elitnaja Gucci-viersija kansoli z manahramami na kantrolerach i skuranym futarałam pradavali za 10 000 dalaraŭ. I'm sorry, heta nie zrobić vas lepšym u «Call of Duty».
8. Zvyšdaŭhija Adidas Superstars ad estonskaha repiera Tomi Keša (Tommy Cash)
Tolki kali vam mocna treba, kab niechta ŭ druhim kancy kalidora spatyknuŭsia.
Kamientary