Kolki hrošaj Rasija dała Łukašenku, pačynajučy z 2020-ha? Spojler: našmat bolš, čym vy dumajecie
Aficyjna viadoma, što biełaruskija ŭłady atrymali ad Rasii $1,5 miljarda. Adnak heta tolki častka, bo ŭ realnaści Rasija subsiduje Biełaruś nie tolki žyvymi hrašyma, ale jašče i ŭskosna — kuplajučy ablihacyi, pieravodziačy srodki na budaŭnictva AES, jakija niemahčyma prakantralavać, i, samaje hałoŭnaje — tannymi enierhanośbitami. Kali skłaści ŭsie hrafy padtrymki, to vychodzić adčuvalnaja dla Biełarusi suma. Kolki Maskvie kaštavała ŭtrymać uładu Alaksandra Łukašenki? Ličym razam z ekanamistam BEROC Źmitrom Krukom.
Aficyjna viadoma, što žyvymi hrašyma Rasija vydała Biełarusi $1,5 młrd: pa $500 miljonaŭ u kastryčniku 2020-ha, śniežni 2020-ha i červieni 2021-ha.
Pa pieršym tranšy farmalny kredytor nie Rasija, a Jeŭrazijski fond stabilizacyi i raźvićcia, ale asnoŭny jaho fundatar — RF.
Takija nievialikija abjomy rabili iluziju nieachvotnaj finansavaj padtrymki Łukašenki z boku Pucina.
Ale zvyčajna nie ŭličvajecca hałoŭny mietad Rasijskaj padtrymki — źnižki na enierhanośbity, u vyniku čaho Biełaruś atrymlivaje haz i naftu istotna tańniej, čym susiedzi.
Pa prośbie «Našaj Nivy» Dźmitryj Kruk padličyŭ, kolki hrošaj Łukašenka maje na takich źnižkach.
Mietadałohija acenki nastupnaja: paraŭnoŭvajecca rynkavaja cana nafty marki Urals i cana, pa jakoj Urals pastaŭlajecca ŭ Biełaruś.
Roźnica, jakaja składvajecca paśla padliku abjomaŭ impartu, ličycca ŭskosnym subsidavańniem biełaruskich uładaŭ.
Anałahična z hazam: siaredniejeŭrapiejskaja hadavaja cana paraŭnoŭvajecca ź siaredniehadavoj canoj dla Biełarusi, roźnica paśla padliku abjomaŭ impartu ličycca subsidyjaj.
U vyniku, kali skłaści naftavuju i hazavuju subsidyi, my atrymajem prykładnuju ličbu rasijskaj padtrymki, jakaja nie aformlenaja ŭ vyhladzie kredytaŭ.
Tak, u 2020-m siaredniehadavaja cana Urals na biržy składała $294 za tonu, a dla Biełarusi — $243. Heta 82,4% ad suśvietnych cen, što z ulikam abjomaŭ aznačaje $790 miljonaŭ subsidyj, abo 1,3% ad VUP.
U 2021-m cana Urals za tonu była $510, i $453 dla Biełarusi — heta 88,7% ad suśvietnaj cany, abo ŭ valucie — adzin miljard i $60 miljonaŭ, abo 1,58% ad VUP.
Što tyčycca hazu, to ŭ 2020-m siaredniejeŭrapiejskaja cana była $116 za tysiaču kubamietraŭ, a cana faktyčnaj pastaŭki dla Biełarusi — $130, ci 132% ad cany ŭ Jeŭropie.
Tady Łukašenka za hod prajhraŭ 600 miljonaŭ dołaraŭ.
Ale ŭ 2021-m — mała skazać što adyhraŭsia, bo siaredniaja cana ŭ Jeŭropie skłała $384 za tysiaču kuboŭ, a dla Biełarusi — $130.
Heta tolki 39,7% ad jeŭrapiejskaj cany, a značyć, vyhada — try z pałovaj miljardy dołaraŭ, abo cełych 5,2% ad VUP.
Ahułam ža za 2021 hod vychodzić, što ličba padtrymki tolki syravinnymi subsidyjami skłała 6,9% ad VUP!
Za vylikam hazavych «strat» u 2020-m, pamier enierhietyčnaha subsidavańnia z boku Rasii ŭ 2020-2021 hadach składaje amal $4,7 miljarda.
Aproč hetaha, Rasija rehularna patrochu, ale kuplaje biełaruskija ablihacyi, a taksama pieravodzić hrošy «na budaŭnictva AES». Łukašenka niejak chvaliŭsia, što zekanomiŭ i źbiraŭsia na ich pabudavać azotny kambinat. Ale dalejšy los zekanomlenych hrošaj pakul nieviadomy.
Kali brać i srodki, atrymanyja pa hetych dvuch punktach, to, pa padlikach Dźmitryja Kruka, vychodzić, što razam z kuplaj ablihacyj, tranšami «na AES», naŭprostavymi kredytami i enierhasubsidyjami Łukašenka za dva hady atrymaŭ kala 6,7 miljarda dołaraŭ.
Ale navat z takoj padtrymkaj biełaruski biudžet u 2020-m mieŭ 4 miljardy rubloŭ deficytu. Pa danych za studzień-listapad 2021-ha, deficyt skłaŭ 6,3 miljarda rubloŭ.
Suśvietny bank nazvaŭ Biełaruś najbujniejšym daŭžnikom Rasii. Jana na pieršym miescy ŭ rejtynhu z sumaj pazyki $8,1 miljarda. Praŭda, hetaja suma ŭličvaje tolki vydadzienyja kredyty.
Čytajcie taksama: Biełarusy nie vierać dziaržavie i rublu. Nacbank pakazaŭ statystyku pa kupli i prodažy valuty
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary