U Biełarusi znoŭ pačała raści kolkaść novych vypadkaŭ kavidu. A što ŭ susiedziaŭ? HRAFIKI

A što z amikronam susiednich krainach? Ci isnuje karelacyja pamiž novaj chvalaj kavidu ŭ Biełarusi i situacyjaj u susiedziaŭ? Paraŭnoŭvajem hrafiki.

Voś tak vyhladaje hrafik kolkaści novych vypadkaŭ kavidu na 1 miljon žycharoŭ ź vieraśnia 2021 hoda pa hety čas (biarucca siarednija ličby za tydzień).

Na hrafiku — Biełaruś, susiedzi i śviet.

Hrafik kolkaści novych vypadkaŭ kavidu na 1 miljon žycharoŭ ź vieraśnia 2021 hoda pa hety čas (biarucca siarednija ličby za tydzień).

Na hrafiku možna pabačyć, što štodzionnaja kolkaść novych vypadkaŭ kavidu ŭ śviecie pačała imkliva raści z kanca 2021 hoda.

Kali pad kaniec 2021 hoda ŭ śviecie fiksavali krychu bolš za sto vypadkaŭ kavidu na miljon nasielnictva, to ciapier — u čatyry raz bolš.

Najbolš składanaj i tryvožnaj vyhladaje situacyja ŭ Litvie i Łatvii — tam imklivy rost kolkaści novych vypadkaŭ pačaŭsia ź vieraśnia, i dasiahnuŭ piku ŭ kancy kastryčnika 2021 hoda. Potym kolkaść (na fonie ŭzmacnieńnia kavidnych abmiežavańniaŭ) pačała padać.

Ale z kanca 2021 hoda pačaŭsia novy, jašče bolš imklivy rost. Kolkaść novych vypadkaŭ z kanca śniežnia 2021 hoda vyrasła ŭ razy. Łatvija fiksuje 2429 novych vypadkaŭ na miljon nasielnictva — biesprecedentnyja za čas pandemii ličby. U Litvie anałahičnaja situacyja — rekordnyja 2158 vypadkaŭ na miljon.

Na fonie krain Bałtyi, lepšaj była situacyja ŭ Polščy. Istotny rost kolkaści novych vypadkaŭ tam pačaŭsia ź siaredziny vosieni. Taja chvala dasiahnuła piku na pačatku zimy. Potym kolkaść vypadkaŭ pačała źnižacca, ale z kanca hoda — istotny rost.

Ciapier u Polščy 776 novych vypadkaŭ kavidu na miljon nasielnictva — bolš, čym padčas papiaredniaj chvali.

U Litvie, Polščy i Łatvii kolkaść vypadkaŭ pieravyšaje siaredniesuśvietnyja pakazčyki.

Va Ukrainie, Rasii i Biełarusi, pavodle statystyki, situacyja nibyta lepšaja. Ale i testaŭ tam robicca mienš, čym u krainach Bałtyi.

Va Ukrainie rekordnaja kolkaść novych vypadkaŭ była na pačatku listapada, ale potym chvala pajšła na spad. Z pačatku 2022 hoda nazirajecca novy rost, ale rekordy listapada 2021 hoda jašče nie pabityja.

U Rasii papiaredniaja chvala na maksimumie była taksama na pačatku listapada, ale novaja ŭžo pabiła papiarednija rekordy.

U Biełarusi farmalna kolkaść novych vypadkaŭ najmienšaja siarod susiedziaŭ. Što ździŭlaje ŭ biełaruskaj statystycy: u hrafikach susiednich krain možna pabačyć vyraznyja chvali ź istotnaj roźnicaj pamiž maksimumami i minimumami, a biełaruski hrafik bolš hładki, roźnicy miž ekstremumami nie takija vyraznyja.

Biełaruskaja statystyka fiksuje rost kolkaści novych vypadkaŭ ź siaredziny studzienia 2022 hoda.

A voś tak vyhladaje pracent ludziej, vakcynavanych ad kavidu.

Pracent vakcynavanych ludziej (adnoj dozaj i całkam)

Litva i Łatvija — siarod lidaraŭ. Tam pad 70% ludziej vakcynavanyja chacia b adnoj dozaj. Taksama ŭ hetych krainach pačałasia aktyŭnaja kampanija pa vakcynacyi bustaram.

U Litvie svoj bustar atrymała amal tracina nasielnictva.

Pracent ludziej, vakcynavanych bustarnaj dozaj.

U hetych bałtyjskich krainach pracent vakcynavanych vyšejšy za siaredni pa śviecie. U inšych krainach rehijona situacyja horšaja. Polšča vakcynavała chacia b adnoj dozaj 59% nasielnictva.

U Biełarusi i Rasii — pa 53% i 52% adpaviedna.

Najhoršaja situacyja va Ukrainie — tolki 35% nasielnictva atrymali chacia b adnu dozu. Tam, jak i va ŭsioj Uschodniaj Jeŭropie, antyvaksierskija nastroi zastajucca vielmi mocnymi.

Varta taksama adznačyć, što žycharam Litvy, Łatvii, Polščy i Ukrainy dastupnyja jakasnyja vakcyny, jakija majuć najbolšuju efiektyŭnaść. Žycharam Biełarusi dastupnaja tolki adna ŭchvalenaja SAAZ vakcyna — kitajskaja. A voś žychary Rasii mohuć pryščapicca tolki rasijskimi vakcynami — nivodnaja ź ich nie siertyfikavanaja SAAZ.

Heta hrafik, jaki pakazvaje aficyjnuju śmiarotnaść. I tut biełaruskaja aficyjnaja statystyka taksama pavodzić siabie dziŭnym čynam. Hrafik aficyjna abvieščanaj kolkaści śmierciaŭ ad kavidu ŭ Biełarusi vyhladaje nie tak, jak va ŭsim śviecie. Na takich hrafikach susiedziaŭ amplitudy našmat bolšyja, i tolki ŭ Biełarusi śmiarotnaść kali i źmianiajecca, to niaznačna.

Aficyjnyja ličby śmiarotnaści ad kavidu.

Na hetych hrafikach my bačym, što ŭ rehijonie byli dzie vialikija chvali śmiarotnaści.

Pieršaja pačałasia ŭ kancy 2020 hoda (va Ukrainu jany pryjšła sa spaźnieńniem).

Potym u siaredzinie hoda śmiarotnaść źmienšyłasia, i z vosieni pačaŭsia novy rost. Śmiarotnaść dasiahnuła piku ŭ rehijonie ŭ druhoj pałovie listapada, a potym pačała padać.

Admietna, što niahledziačy na imklivy rost novych vypadkaŭ kavidu z prychodam amikrona, kolkaść śmierciaŭ praciahvaje źnižacca. Heta aznačaje, što ludzi chacia i chvarejuć bolš, ale nie tak surjozna.

Navukoŭcy miarkujuć, što «amikron» źjaŭlajecca mienš niebiaśpiečnym dla zdaroŭja štamam. Taksama źnižeńnie śmiarotnaści źviazanaje z vyšejšym za papiarednija chvali ŭzroŭniem vakcynacyi, a taksama tym, što bolš ludziej pierachvareła i atrymała naturalny imunitet ad ciažkaha praciakańnia chvaroby.

Ale kab daviedacca realnyja ličby, varta hladzieć na ličby tak zvanaj zališniaj śmiarotnaści (heta kolkaść śmierciaŭ ad usich pryčyn u paraŭnańni z papiarednimi hadami na dušu nasielnictva).

Mienavita zališniaja śmiarotnaść dazvalaje acanić realny maštab katastrofy, jakuju pryniesła pandemija, tamu što jana ŭklučaje ŭ siabie tyja śmierci, jakich biez kavidu nie było b (kahości nie ŭličyła dziaržaŭnaja statystka, chtości pamior praź pierahružanyja špitali ad inšych chvarob, chtości svoječasova nie prajšoŭ dyjahnostyku, i hetak dalej).

Statystyka zališniaj śmiarotnaści ŭ Biełarusi z 2020 hoda zasakrečanaja, ale nam dastupnyja ličby susiedziaŭ.

Cikava, što hrafik biełaruskaj zališniaj śmiarotnaści nahadvaŭ rasijski hrafik (pakul biełaruskija ličby nie zasakrecili).

Zališniaja śmiarotnaść na miljon nasielnictva.

Čytajcie taksama:

Ad pandemii da endemii. Paśla amikrona dziaržavy mianiajuć svaju stratehiju adnosna kavidu

Jakija maski abaroniać ad nadzvyčaj zaraznaha «amikrona»? 

• 0
• 0
• 0
• 0
• 0
• 0