Historyja ź minułaha: u dzień sustrečy Łukašenki i Bierazoŭskaha niedaloka ad ściežki, dzie jany pavinny byli iści, znajšli minu
Niekali historyju pra toje, jak Barys Bierazoŭski z Alaksandram Łukašenkam ledź nie padarvalisia na minie, kali sustrakalisia kala bazy adpačynku «Krasnasielskaje», što niedaloka ad Minska, «Našaj Nivie» raskazvaŭ adzin surazmoŭca. U jaho traktoŭcy heta vyhladała tak: «Laśnik «Krasnasielskaha», robiačy abychod, pa małoj patrebie zbočyŭ na mietr u bok z darohi i ŭbačyŭ, jak niešta blisnuła — pryhladzieŭsia, a tam pravady, jakija złučajuć miny».
«Paśla hetaha na razbor palotaŭ pryjechali nie tolki supracoŭniki Słužby biaśpieki prezidenta razam z sapiorami, ale i brytanskija śpiecsłužby, pad čyjoj achovaj tady znachodziŭsia Barys Bierazoŭski, — raskazvaŭ naš surazmoŭca. — Brytancy zrabili ŭłasnyja ekśpiertyzy i pryjšli da vysnovy, što miny byli realnymi. Pa ich viersii, heta rabota ruk rasijskich śpiecsłužb, a nie biełaruskich. Paśla hetaha brytancy zabaranili Bierazoŭskamu jeździć u Biełaruś».
«U vyniku vybuchu dźviuch min zdetanavała i treciaja, jakaja nie była znojdzienaja»
Niejki čas usio heta vyhladała jak mastackaja vydumka. Adnak u starych milicejskich zvodkach «Našaj Nivie» udałosia adšukać historyju, jakaja vielmi padobnaja da raskazu našaha surazmoŭcy.
U zvodcy za 2 červienia 2011 hoda značycca voś jakaja infarmacyja:
«1 červienia ŭ 12:44 u apieratyŭna-dziažurnuju słužbu Minskaha RUUS pastupiła paviedamleńnie ad vykonvajučaha abaviazki dyrektara Krasnasielskaha laśnictva «Minskaha lashasa» Andreja Stanisłavaviča, 1976 hoda naradžeńnia, što jaho padnačalenym, Siarhiejem Piatrovičam, 1971 hoda naradžeńnia, jaki pracuje leśnikom Krasnasielskaha laśnictva, pry abychodzie lasnoha masivu na adlehłaści 15 mietraŭ ad prasiałkovaj darohi i 1800 mietraŭ ad voziera Siaredniaje dy voziera Pralnia, kala dreva vyjaŭleny pradmiet, padobny da bomby».
«Sapiornaj hrupaj ustanoŭlena, što va ŭkazanym miescy lasnoha masivu na drevie, na vyšyni nie bolš jak 20 santymietraŭ ad pačatku dreva, na adlehłaści 50 santymientarŭ adzin ad adnaho vyjaŭlenyja dźvie supraćpiechotnyja miny typu «MOP-50», jakija asobna prymacavanyja da dreva mietaličnymi płaścinami z dapamohaj samarezaŭ, złučanych miž saboj šurupami, — havorycca ŭ dakumiencie. — U zapalnyja hniozdy ustaŭlenyja detanatary, złučanyja z datčykami ŭ płastykavaj karobcy. Paśla takoha paviedamleńnia na miesca zdareńnia vybyli śledča-apieratyŭnaja hrupa Minskaha RUUS i sapiorna-piratechničnaja hrupa z čaści № 5448.
Na adlehłaści ŭ 50 santymietraŭ ad ukazanych min vyjaŭlenaja karobka pamierami 226×66×156mm, mierkavana — błok kiravańnia da ŭkazanych vybuchovych pryładaŭ».
«Sapiorami prymalisia zachady pa adździaleńni błoka ŭpraŭleńnia ad vybuchovych pryład z dapamohaj pnieŭmaŭdaru. U vyniku dźvie pryłady vybuchnuli. Pry ahladzie ŭstanoŭlena, što ŭ vyniku vybuchu dźviuch min, detanavała i treciaja mina, raźmieščanaja la padnožža susiedniaha dreva, na adlehłaści 9 mietraŭ ad pieršych min, jakaja raniej nie była znojdzienaja.
Padčas ahladu, na adlehłaści 30 mietraŭ ad miesca vybuchu, znojdzienaja paškodžanaja karobka pamierami 10×15 sm., snaradžanaja vybuchovaj pryładaj. Ź miesca zdareńnia karobka nie zabirałasia, a pierasunutaja na biaśpiečnuju adlehłaść, aceplenaja i achoŭvajecca supracoŭnikami Minskaha RUUS da prybyćcia «Ałmaza». Paškodžanyja haliny i kara drevaŭ», — paviedamlali siłaviki.
U vyniku pa hetym fakcie zaviali kryminalnuju spravu pa č. 2 art. 295 Kryminalnaha kodeksa — «Niezakonnyja dziejańni ŭ dačynieńni da zbroi». Ź miesca zabrali frahmienty macavańniaŭ, detanatara, pravadoŭ i hetak dalej.
Pra hety vypadak nijakich nie zhadvałasia ŭ pres-relizach MUS i dziaržaŭnych ŚMI. «Naša Niva» źviazałasia ź leśnikom, jaki fihuryravaŭ u zvodcy, ale ad kamientaryjaŭ jon admoviŭsia.
Što rabiŭ Barys Bierazoŭski tady ŭ Biełarusi?
Jak śćviardžajecca ŭ rasśledavańni «Mieduzy», Bierazoŭski jašče ŭ 2008 hodzie «zahareŭsia idejaj adarvać Łukašenku ad Pucina».
«Kali vy pamiatajecie, u hetyja časy ŭ Baćki z Pucinym byli napružannyja adnosiny. Pra jaho rabili film «Chrosny baćka», pucinskija ŚMI jaho ŭsialak «mačyli», kryŭdzili i havaryli pra jaho ŭsialakija hadaści, — kazaŭ u hutarcy z žurnalistami «Mieduzy» paplečnik Bierazoŭskaha Alaksandr Holdfarb. — Baćka ŭ hety čas, sa słovaŭ Barysa Abramaviča, mocna aburaŭsia: ja, kaža, ničym nie adroźnivajusia ad Saakašvili, jon robić toje samaje, što i ja, tolki Saakašvili čamuści siabra Zachadu i pravadnik demakratyi, a ja apošni dyktatar Jeŭropy».
Pa słovach Holdfarba, dla Bierazoŭskaha heta byŭ u pieršuju čarhu palityčny prajekt pa stvareńni svojeasablivaha aljansu krain-transparciroŭščykaŭ rasijskaj nafty, kab mieć mahčymaść dyktavać svaje ŭmovy pa taryfach. Bierazoŭski, jak ličyŭ Holdfarb, takim čynam moh naškodzić Pucinu. Nu, i ŭ dadatak jon raźličvaŭ zarabić na pryvatyzacyju niekatorych biełaruskich pradpryjemstvaŭ.
Mienavita Bierazoŭski źvioŭ Łukašenku ź pijar-kampanijaj Cimaci Beła — Bell Pottinger. Jana pavinna była źmianić imidž Łukašenki pierad Zachadam. Raschody hetaj firmy, pa infarmacyi krynic «Mieduzy», taksama apłočvaŭ Bierazoŭski.
Łukašenka płan adobryŭ i «vydzieliŭ Bierazoŭskamu asabniak z uzmocnienaj achovaj pad Minskam», dzie i była časovaja štab-kvatera Bell Pottinger pa ŭpraŭleńni prajektam. Dzie kankretna znachodziłasia hetaja rezidencyja, nieviadoma.
Ale praviarnuć svoj płan Bierazoŭski nie zmoh. Paśla prezidenckich vybaraŭ 2010 hoda rasijski aliharch na niekatory čas jašče zatrymaŭsia ŭ Biełarusi pad harantyi biaśpieki samoha Łukašenki, ale ŭ vyniku vymušany byŭ źjechać.
Čytajcie taksama: «Łukašenka tak chacieŭ utrymacca va ŭładzie, što achviaravaŭ svaim narodam». Koratka pierakazvajem film Dudzia pra biełarusaŭ, ad jakoha mnoha chto płača
Čym ciapier žyvie hierainia stylovaha fota z Maršu žančyn 2020-ha8
Kamientary